Yeremia 38:1-28
38 Shefatia murwa wa Matani, Gedalia murwa wa Phashuri, Yukali+ murwa wa Shelemia na Phashuri+ murwa wa Malakia vha pfa mulaedza we Yeremia a u vhudza vhathu vhoṱhe, a tshi ri:
2 “Yehova u ri, ‘Ane a sala kha wonoyu muḓi u ḓo vhulawa nga banga, nga nḓala na nga dwadze.+ Fhedzi ane a ḓikumedzela kha Vhakaladea u ḓo tsireledza vhutshilo hawe, a si vhulawe.’+
3 Yehova u ri, ‘Ngangoho uyu muḓi u ḓo kumedzelwa mmbi ya khosi ya Babele, i ḓo u thuba.’”+
4 Vhakololo vha amba na khosi vha ri: “Ri khou humbela uri hoyu munna a vhulawe,+ ngauri u khou kula nungo maswole o salaho kha uno muḓi na vhaṅwe vhathu vhoṱhe nga u vha vhudza eneo mafhungo. Ngauri hoyu munna ha ṱoḓi havha vhathu vha tshi vha na mulalo, fhedzi u ṱoḓa vha tshi welwa nga khombo.”
5 Khosi Tsedekia a fhindula a ri: “U zwanḓani zwaṋu, khosi a i koni u ni thivhela.”
6 Ndi hone vha tshi fara Yeremia vha mu dzhenisa dindini ḽa Malakia murwa wa khosi, ḽe ḽa vha ḽi Muṱani wa Vhalindi.+ Vha tsitsa Yeremia nga dzithambo. Fhedzi ḽeneḽo dindi ḽo vha ḽi si na maḓi, ḽi na matope fhedzi, Yeremia a thoma u phirimela matopeni.
7 Ebede-meleke+ wa Muetopia, we a vha e khombe* ya nḓuni* ya khosi, a pfa uri Yeremia o dzheniswa dindini. Nga tshenetsho tshifhinga, khosi yo vha yo dzula Khoroni ya Benyamini,+
8 Ebede-meleke a ya nḓuni* ya khosi a amba nayo, a ri:
9 “Thovhela muṋe wanga, zwe avha vhanna vha ita Yeremia zwo vhifha nga maanḓa! Vho mu dzhenisa dindini, u ḓo fa nga nḓala ngauri a hu tshee na zwiḽiwa* muḓini.”+
10 Ndi hone khosi i tshi vhudza Ebede-meleke wa Muetopia ya ri: “Ṱuwa na vhanna vha 30, ni ye ni bvise muporofita Yeremia dindini a sa athu u fa.”
11 Ebede-meleke a ṱuwa na vhenevhaḽa vhanna a ya nḓuni* ya khosi vha dzhena kamarani ye ya vha i nga fhasi ha mbulungelo,+ vha dzhia zwiambaro zwo ṱahalaho na malabi o kheruwaho, vha zwi tsitsela fhasi tshisimani kha Yeremia nga dzithambo.
12 Ebede-meleke wa Muetopia a amba na Yeremia a ri: “Vhea zwiambaro na malabi kha magwakwa* uri thambo dzi si u vhaise.” Yeremia a ita nga u ralo,
13 vha kokodza Yeremia nga dzithambo vha mu bvisa dindini. Yeremia a dzula Muṱani wa Vhalindi.+
14 Khosi Tsedekia a rumela vhathu uri vha vhidze muporofita Yeremia uri a ḓe khoroni ya vhuraru, ine ya vha nḓuni ya Yehova, khosi ya amba na Yeremia ya ri: “Hu na zwine nda ṱoḓa u u vhudzisa. U songo ndzumbela na tshithihi.”
15 Yeremia a fhindula Tsedekia a ri: “Arali nda u vhudza, u ḓo mmbulaya. Arali nda u eletshedza, a u nga nthetshelesi.”
16 Khosi Tsedekia a anela Yeremia tshiphirini a ri: “Ndi ana nga Yehova we a ri ṋea vhutshilo, ndi nga si u vhulaye, ndi nga si u kumedzele zwanḓani zwa avha vhanna vhane vha khou ṱoḓa u u vhulaya.”
17 Yeremia a amba na Tsedekia a ri: “Yehova Mudzimu wa mavhuthu, Mudzimu wa Isiraele u ri, ‘Arali wa ḓikumedzela kha vhakololo vha khosi ya Babele, a u nga vhulawi, hoyu muḓi a u nga fhiswi nga mulilo, iwe na vha muṱa wau a ni nga vhulawi.+
18 Fhedzi arali wa sa ḓikumedzela kha vhakololo vha khosi ya Babele, wonoyu muḓi u ḓo kumedzelwa Vhakaladea vha u fhisa nga mulilo,+ iwe u nga si ponyoke zwanḓani zwavho.’”+
19 Khosi Tsedekia a amba na Yeremia a ri: “Ndi ofha Vhayuda vhe vha shavhela kha Vhakaladea, ngauri arali nda kumedzelwa khavho, vha nga mpfara nga nḓila ya tshiṱuhu.”
20 Fhedzi Yeremia a ri: “A u nga kumedzelwi zwanḓani zwavho. Ndi humbela uri u thetshelese zwine Yehova a khou u vhudza a tshi shumisa nṋe, zwi ḓo u tshimbilela, wa bvela phanḓa u tshi khou tshila.
21 Fhedzi arali wa hana u ḓikumedzela, Yehova o ndzumbululela hezwi:
22 Vhafumakadzi vhoṱhe vho salaho nḓuni* ya khosi ya Yuda vha khou iswa kha vhakololo vha khosi ya Babele,+ vha ri,‘Vhanna vhe wa vha u tshi vha fhulufhela* vho u fhura na u u kunda.+
Vho ita uri mulenzhe wau u phirimele matopeni.
Zwino vho u ṱutshela.’
23 Vhafumakadzi vhau vhoṱhe na vharwa vhau vhoṱhe vha khou iswa kha Vhakaladea, a u nga ponyoki zwanḓani zwavho, fhedzi u ḓo farwa nga khosi ya Babele,+ wonoyu muḓi u ḓo fhiswa nga mulilo nga nṱhani hau.”+
24 Tsedekia a amba na Yeremia a ri: “Hezwi zwithu u songo zwi vhudza muthu na muthihi, uri u si vhulawe.
25 Arali vhakololo vha pfa uri ndo amba na iwe, vha ḓa kha iwe vha ri, ‘Ri humbela uri u ri vhudze zwe wa vhudza khosi. U songo ri dzumbela na tshithihi, a ri nga u vhulayi.+ Khosi yo u vhudza mini?’
26 u vha fhindule u ri, ‘Ndo vha ndi tshi khou i humbela uri i songo tsha nkhumisela nḓuni ya Yehonathani uri ndi si fele henengei.’”+
27 Nga u ya ha tshifhinga vhakololo vhoṱhe vha ya ha Yeremia vha mu vhudzisa. A vha vhudza zwoṱhe zwe khosi ya mu vhudza zwone uri a zwi ambe. A vho ngo tsha dovha vha mu vhudzisa tshithu, ngauri a hu na na muthihi we a pfa yeneyo nyambedzano.
28 U swika nga ḓuvha ḽe Yerusalema wa thubiwa, Yeremia o vha a tshi khou dzula Muṱani wa Vhalindi;+ o dzula henefho u swika Yerusalema u tshi thubiwa.+
Ṱhaluso dzi re magumoni a siaṱari
^ Kana “muḓinḓa.”
^ Kana “pfamoni.”
^ Kana “pfamoni.”
^ Thevhedz., “vhurotho.”
^ Kana “pfamoni.”
^ Kana “magopwa.”
^ Kana “pfamoni.”
^ Thevhedz., “Vhanna vhe wa vha u na mulalo navho.”
