Yeremia 39:1-18
39 Nga ṅwaha wa vhuṱahe wa Tsedekia khosi ya Yuda, nga ṅwedzi wa vhufumi, Nebukadanetsara khosi ya Babele na mmbi yawe yoṱhe vho ḓa Yerusalema vha u tanga.+
2 Nga ṅwaha wa vhu 11 musi hu tshi khou vhusa Tsedekia, nga ṅwedzi wa vhuṋa nga ḓuvha ḽa vhuṱahe, vho kwasha luvhondo lwa muḓi vha dzhena.+
3 Vhakololo vhoṱhe vha khosi ya Babele vho dzhena vha dzula Khoroni ya Vhukati,+ vho vha vhe Neregala-saretsere wa Musamugara, Nebo-sarasekimi wa Murabasarisi, Neregala-saretsere wa Murabemaga* na vhaṅwe vhakololo vhoṱhe vha khosi ya Babele.
4 Musi Tsedekia khosi ya Yuda na maswole oṱhe vha tshi vha vhona, vha shavha,+ vha bva muḓini vhusiku vha tshi shumisa nḓila i re tsimuni ya khosi, vha bva nga khoro i re vhukati ha mbondo mbili, vha bvela phanḓa vha tshi tshimbila nga nḓila i yaho Araba.+
5 Fhedzi mmbi ya Vhakaladea ya vha pandamedza, ya fara Tsedekia midavhini ya soga ya Yeriko.+ Ya mu fara ya mu isa kha Nebukadanetsara khosi ya Babele ngei Ribila+ shangoni ḽa Hamathi,+ he a mu haṱula hone.
6 Khosi ya Babele yo ita uri vharwa vha Tsedekia vha vhulawe a tshi zwi vhona ngei Ribila, khosi ya Babele ya ita uri vharangaphanḓa vhoṱhe vha Yuda vha vhulawe.+
7 Nga murahu ya swingisa maṱo a Tsedekia, ya mu vhofha nga ngeḓane dza koporo uri i mu ise Babele.+
8 Vhakaladea vha fhisa nnḓu* ya khosi na nnḓu dza vhathu,+ vha wisa mbondo dza Yerusalema.+
9 Nebusaradani+ muhulwane wa vhalindi a dzhia vhathu vhoṱhe vho salaho muḓini, vho shavhelaho khae na vhoṱhe vho salaho, a vha isa vhuthubwani ngei Babele.
10 Fhedzi Nebusaradani muhulwane wa vhalindi a sia vhaṅwe vha vhathu vha shayaho vhukuma shangoni ḽa Yuda, vha si na tshithu na tshithihi. O dovha a ita uri vha shume kha tsimu dza minḓirivhe na masimuni* nga ḽeneḽo ḓuvha.+
11 Nebukadanetsara khosi ya Babele a ṋea Nebusaradani muhulwane wa vhalindi hedzi ndaela dzine dza kwama Yeremia, a ri:
12 “Mu dzhie u mu ṱhogomele; u songo mu huvhadza, u mu ṋee tshiṅwe na tshiṅwe tshine a u humbela.”+
13 Nebusaradani muhulwane wa vhalindi, Nebusasibani wa Murabasarisi,* Neregala-saretsere wa Murabemaga* na vharangaphanḓa vhoṱhe vha khosi ya Babele vha rumiwa
14 vha ya vha dzhia Yeremia Muṱani wa Vhalindi+ vha mu isa kha Gedalia+ murwa wa Ahikamu+ murwa wa Shafani+ uri a iswe nḓuni yawe. A dzula na vhaṅwe vhathu.
15 Musi Yeremia e Muṱani wa Vhalindi,+ Yehova a amba nae, a ri:
16 “Tshimbila u ye u vhudze Ebede-meleke+ wa Muetopia uri, ‘Yehova wa mavhuthu, Mudzimu wa Isiraele, u ri: “Kha hoyu muḓi ndi khou ḓisa khombo ye nda amba nga hayo, hu si zwithu zwavhuḓi, nga ḽeneḽo ḓuvha u ḓo vhona zwi tshi itea.”’
17 “‘Fhedzi ndi ḓo u tshidza nga ḽeneḽo ḓuvha,’ u ralo Yehova, ‘a u nga ḓo kumedzelwa kha vhanna vhane wa vha ofha.’
18 “‘Ndi ḓo ita uri u ponyoke, a u nga vhulawi nga banga. U ḓo tshidzwa+ ngauri wo mpfulufhela,’+ u ralo Yehova.”
Ṱhaluso dzi re magumoni a siaṱari
^ Kana “muhulwane wa vhamadambi (muḓivhi wa ṋaledzi).”
^ Kana “pfamo.”
^ Kana khamusi, “O dovha a vha ṋea mushumo wa u kombetshedzwa.”
^ Kana “muḓinḓa muhulwane.”
^ Kana “muhulwane wa vhamadambi (muḓivhi wa ṋaledzi).”
