Yeremia 40:1-16
40 Yehova a amba na Yeremia musi Nebusaradani+ muhulwane wa vhalindi o no mu vhofholola ngei Rama.+ O vha o mu isa henengei o vhofhiwa nga ngeḓane, o vha e na mathubwa oṱhe a Yerusalema na a Yuda e a vha a tshi khou iswa vhuthubwani ngei Babele.
2 Ndi hone muhulwane wa vhalindi a tshi dzhia Yeremia, a amba nae a ri: “Yehova Mudzimu wau o vha o zwi amba uri u ḓo ḓisa khombo henefha fhethu,
3 Yehova o ita zwe a amba, ngauri inwi no khakhela Yehova ni si thetshelese zwe a amba. Ndi ngazwo hezwi zwithu zwoṱhe zwi tshi khou itea kha inwi.+
4 Ṋamusi ndi khou vhofholola ngeḓane dzi re zwanḓani zwau. Arali u tshi vhona zwo tea u ṱuwa na nṋe Babele, iḓa ri ṱuwe, ndi ḓo u ṱhogomela. Fhedzi arali u sa ṱoḓi u ṱuwa na nṋe, u songo ḓa. Shango kheḽi. Iya hune wa funa.”+
5 Musi Yeremia a sa athu u humela murahu, Nebusaradani a ri: “Humela murahu kha Gedalia+ murwa wa Ahikamu+ murwa wa Shafani,+ we khosi ya Babele ya mu vhea uri a lange miḓi ya Yuda, u dzule nae na vhaṅwe vhathu; kana u ye hune wa funa.”
Muhulwane wa vhalindi a mu ṋea zwiḽiwa na tshifhiwa, a mu litsha a ṱuwa.
6 Yeremia a ya kha Gedalia murwa wa Ahikamu ngei Mitsipa,+ a dzula nae na vhaṅwe vhathu vho salaho kha ḽeneḽo shango.
7 Nga u ya ha tshifhinga, vhalangammbi vha re masimuni na vhanna vha re navho, vho pfa uri khosi ya Babele yo vhea Gedalia murwa wa Ahikamu uri a lange shango, vhanna, vhafumakadzi na vhana vha vhathu vha vhashai kha ḽeneḽo shango, vhe vha si iswe vhuthubwani ngei Babele.+
8 Vhe vha ya kha Gedalia ngei Mitsipa+ ho vha hu: Ishimaele+ murwa wa Nethania, Yohanani+ na Yonathani vharwa vha Karea, Seraya murwa wa Thanumethe, vharwa vha Ofai wa Munetofa na Yesanya+ murwa wa Mumaakate na vhanna vha re navho.
9 Gedalia murwa wa Ahikamu murwa wa Shafani a vha anela khathihi na vhanna vha re navho, a ri: “Ni songo ofha u shumela Vhakaladea. Dzulani kha ḽeneḽi shango ni shumele khosi ya Babele, zwi ḓo ni tshimbilela.+
10 Nṋe ndi ḓo dzula Mitsipa uri ndi ni imelele kha Vhakaladea vhe vha ḓa kha riṋe. Fhedzi inwi ni kuvhanganye waini, mitshelo ya tshilimo na mapfura ni zwi vhee khalini, ni dzule kha miḓi ye na i dzhia.”+
11 Na Vhayuda vhoṱhe vha re ngei Moaba, Amoni na Edomo na vha re kha maṅwe mashango oṱhe, na vhone vho pfa zwa uri khosi ya Babele yo tendela masalela a tshi dzula ngei Yuda na uri yo vhea Gedalia murwa wa Ahikamu murwa wa Shafani uri a vha lange.
12 Vhayuda vhoṱhe vha thoma u humela murahu vha tshi bva fhethu hoṱhe he vha vha vho balanganela hone, vha vhuyelela shangoni ḽa Yuda kha Gedalia ngei Mitsipa. Vha kuvhanganya waini na mitshelo ya tshilimo zwa vha zwinzhi.
13 Yohanani murwa wa Karea na vhalangammbi vhoṱhe vha re masimuni, vha ya kha Gedalia ngei Mitsipa.
14 Vha amba nae vha ri: “Naa a u zwi ḓivhi uri Baalisi khosi ya Vhaamoni,+ o ruma Ishimaele murwa wa Nethania uri a ḓe a u vhulaye?”+ Fhedzi Gedalia murwa wa Ahikamu a si tende zwe vha vha vha tshi khou mu vhudza.
15 Yohanani murwa wa Karea a amba na Gedalia tshiphirini vhe ngei Mitsipa, a ri: “Ndi khou ṱoḓa u ya u vhulaya Ishimaele murwa wa Nethania, a hu na ane a ḓo zwi ḓivha. Ndi ngani a tshi fanela u u vhulaya, ndi ngani vhathu vhoṱhe vha Yuda vhe vha ḓa vha u kuvhanganela vha tshi fanela u balanganywa na masalela a Yuda a tshi fanela u lovha?”
16 Fhedzi Gedalia+ murwa wa Ahikamu a amba na Yohanani murwa wa Karea a ri: “U songo zwi ita zwenezwo, ngauri zwine wa khou ambela Ishimaele ndi mazwifhi.”
