Yeremia 41:1-18
41 Nga ṅwedzi wa vhusumbe Ishimaele+ murwa wa Nethania murwa wa Elishama, wa muṱa wa vhuhosini,* we a vha e muṅwe wa vharangaphanḓa vha khosi, a ḓa ngei Mitsipa+ kha Gedalia murwa wa Ahikamu e na vhaṅwe vhanna vha fumi. Musi vha tshi khou ḽa vhoṱhe zwiḽiwa ngei Mitsipa,
2 Ishimaele murwa wa Nethania na vhanna vha fumi vhe a vha e navho vha takuwa vha vhulaya Gedalia murwa wa Ahikamu murwa wa Shafani nga banga. O vhulaya muthu we a vha o vhewa nga khosi ya Babele uri a lange shango.
3 Ishimaele a vhulaya Vhayuda vhoṱhe vha re na Gedalia ngei Mitsipa u katela na maswole a Vhakaladea e a vha e henengei.
4 Nga ḓuvha ḽa vhuvhili musi Gedalia o no vhulawa, musi zwi sa athu u ḓivhiwa nga muthu,
5 ha ḓa vhanna vha 80 vha bvaho Shikeme,+ Shiḽo+ na Samaria.+ Ndebvu dzavho dzo vha dzo vheulwa, zwiambaro zwavho zwo kherukanywa, vho ḓitshetshekanya,+ vho fara zwifhiwa zwa thoro na zwioro zwitshena+ uri vha zwi ḓise nḓuni ya Yehova.
6 Ishimaele murwa wa Nethania a bva ngei Mitsipa a ḓa a vha ṱanganedza a tshi khou tshimbila a tshi lila. Musi a tshi tou vha vhona a amba navho a ri: “Iḓani kha Gedalia murwa wa Ahikamu.”
7 Fhedzi musi vha tshi dzhena muḓini, Ishimaele murwa wa Nethania na vhanna vhe a vha e navho vha vha vhulaya vha vha posa dindini.
8 Fhedzi ho vha hu na vhaṅwe vhanna vha fumi khavho vhe vha amba na Ishimaele vha ri: “U songo ri vhulaya, ngauri ro dzumba goroi, baḽi, mapfura na mutoli ngei masimuni.” A si vha vhulaye na vhaḽa vhaṅwe.
9 Ishimaele a dzhia zwitumbu zwa vhanna vhe a vha vhulaya a zwi posa dindini ḽihulu, ḽe ḽa bwiwa nga Khosi Asa nga tshifhinga tsha musi a tshi khou lwa na Baasha khosi ya Isiraele.+ Ḽeneḽi ndi dindi ḽe Ishimaele murwa wa Nethania a ḽi ḓadza nga zwitumbu.
10 Ishimaele a thuba vhathu vhoṱhe vha re ngei Mitsipa,+ u katela na vhananyana vha khosi na vhoṱhe vho salaho ngei Mitsipa vhe Nebusaradani muhulwane wa vhalindi a ita uri vha langwe nga Gedalia+ murwa wa Ahikamu. Ishimaele murwa wa Nethania o vha thuba a fara lwendo uri a pfukele kha Vhaamoni.+
11 Musi Yohanani+ murwa wa Karea na vhalangammbi vhoṱhe vhe a vha e navho vha tshi pfa nga ha vhuvhi he Ishimaele murwa wa Nethania a vhu ita,
12 vha dzhia vhanna vhoṱhe vha ṱuwa navho uri vha lwe na Ishimaele murwa wa Nethania, vha mu wana tsini na maḓi manzhi* ngei Gibeoni.
13 Vhathu vhoṱhe vha re na Ishimaele vha takala musi vha tshi vhona Yohanani murwa wa Karea na vhalangammbi vhoṱhe vhe a vha e navho.
14 Vhathu vhoṱhe vhe Ishimaele a vha thuba ngei Mitsipa+ vha huma na Yohanani murwa wa Karea.
15 Fhedzi Ishimaele murwa wa Nethania na vhanna vha malo vha shavha musi vha tshi vhona Yohanani, vha ya kha Vhaamoni.
16 Yohanani murwa wa Karea na vhalangammbi vhoṱhe vha re nae vha dzhia vhathu vhoṱhe vhane vha bva ngei Mitsipa, vhe vha vha tshidza kha Ishimaele murwa wa Nethania, musi o no vhulaya Gedalia+ murwa wa Ahikamu. Vha vhuya na vhenevho vhanna, maswole, vhafumakadzi, vhana na vhaḓinḓa vha tshi bva ngei Gibeoni.
17 Vho ṱuwa vha ya vha dzula ngei Kinehamu tsini na Betlehema,+ vha tshi ṱoḓa u ya ngei Egipita+
18 uri vha shavhe Vhakaladea. Ngauri vho vha vha tshi khou vha ofha, samusi Ishimaele murwa wa Nethania o vhulaya Gedalia murwa wa Ahikamu, we khosi ya Babele ya mu vhea uri a lange shango.+
