Yeremia 43:1-13
43 Musi Yeremia o no fhedza u vhudza vhathu vhoṱhe zwoṱhe zwe Yehova Mudzimu wavho a zwi amba, tshiṅwe na tshiṅwe tshe a vha o rumiwa nga Yehova Mudzimu wavho uri a vha vhudze tshone,
2 Asaria murwa wa Hosaya, Yohanani+ murwa wa Karea na vhanna vhoṱhe vha u ḓikukumusa vha amba na Yeremia vha ri: “Zwine wa khou amba ndi mazwifhi! Yehova Mudzimu washu ho ngo u ruma uri u ri vhudze u ri, ‘Ni songo ya na dzula henengei Egipita.’
3 Fhedzi Baruki+ murwa wa Neria u khou u ṱuṱuwedza uri u ri kumedzele zwanḓani zwa Vhakaledea uri vha ri vhulaye kana vha ri ise vhuthubwani ngei Babele.”+
4 Yohanani murwa wa Karea na vhalangammbi vhoṱhe na vhathu vhoṱhe vha si thetshelese zwe Yehova a amba musi a tshi ri vha dzule shangoni ḽa Yuda.
5 Nṱhani hazwo, Yohanani murwa wa Karea na vhalangammbi vhoṱhe vha dzhia masalela oṱhe a Yuda e a vha o vhuya shangoni ḽa Yuda a tshi bva kha tshaka dzoṱhe dze a vha o balanganyelwa khadzo.+
6 Vho dzhia vhanna, vhafumakadzi, vhana, vhananyana vha khosi na vhoṱhe vhe Nebusaradani+ muhulwane wa vhalindi a vha sia na Gedalia+ murwa wa Ahikamu+ murwa wa Shafani,+ vha dovha vha dzhia na muporofita Yeremia na Baruki murwa wa Neria.
7 Vha ya shangoni ḽa Egipita, ngauri a vho ngo thetshelesa zwe Yehova a amba, vha swika na Thahapanese.+
8 Yehova a amba na Yeremia ngei Thahapanese, a ri:
9 “Hwala matombo mahulu u a dzumbe nḓilani yo itwaho nga zwidina, u a shele daka henefho muṋangoni wa nnḓu ya Farao ngei Thahapanese, vhanna vha Vhayuda vha tshi zwi vhona.
10 U ambe navho uri, ‘Yehova wa mavhuthu, Mudzimu wa Isiraele, u ri: “Ndi khou rumela mushumeli wanga, Nebukadanetsara khosi ya Babele,+ ndi ḓo vhea khuluṋoni yawe nṱha ha haya matombo o dzumbiwaho, u ḓo engedza dennde ḽawe ḽa vhuhosi khao.+
11 U ḓo ḓa a lwa na shango ḽa Egipita.+ O fanelwaho nga u fa nga vhulwadze u ḓo fa nga vhulwadze, o fanelwaho nga u thubiwa u ḓo thubiwa, o fanelwaho nga u vhulawa nga banga u ḓo vhulawa nga banga.+
12 Ndi ḓo fhisa nnḓu* dza midzimu ya Egipita nga mulilo,+ u ḓo i fhisa na u i thuba. U ḓo ambara shango ḽa Egipita sa mulisa a tshi ambara tshiambaro tshawe, u ḓo ṱuwa henefho nga mulalo.*
13 U ḓo kwashekanya phuphu dza ngei Bethe-semesi shangoni ḽa Egipita, u ḓo fhisa nnḓu* dza midzimu ya Egipita nga mulilo.”’”
