Yeremia 44:1-30
44 Zwe Yeremia a vhudzwa zwone uri a zwi vhudze Vhayuda vhoṱhe vha dzulaho shangoni ḽa Egipita,+ ngei Migidolo,+ Thahapanese,+ Nofe*+ na shangoni ḽa Patarosi,+ ndi hezwi:
2 “Yehova wa mavhuthu, Mudzimu wa Isiraele, u ri, ‘No vhona khombo yoṱhe ye nda i ḓisa Yerusalema+ na kha miḓi yoṱhe ya Yuda, zwino yo no vha mashubi, a i tsha dzulwa nga muthu.+
3 Ndi nga nṱhani ha vhuvhi hoṱhe he vha vhu ita uri vha ntsinyuse nga u ṋekedza zwiṱhavhelo+ na u shumela miṅwe midzimu ye vhone na vhomakhulukuku wavho vha vha vha sa i ḓivhi.+
4 Ndo ni rumela vhashumeli vhanga vha vhaporofita lunzhi-lunzhi, nda ri: “Ni songo ita zwenezwi zwithu zwi nengisaho zwine nda zwi vhenga.”+
5 Fhedzi a vho ngo thetshelesa uri vha rembuluwe kha vhuvhi havho, vho bvela phanḓa vha tshi ṋekedza miṅwe midzimu zwiṱhavhelo.+
6 Mbiti dzanga dza shuluwa na vhuhali hanga ha duga ha fhisa miḓi ya Yuda na nḓila dza Yerusalema zwa vha shubi na soga, na ṋamusi zwi kha ḓi vha zwo tou ralo.’+
7 “Yehova Mudzimu wa mavhuthu, Mudzimu wa Isiraele, u ri, ‘Ndi ngani ni tshi khou ita uri ni welwe nga khombo khulu, uri munna na mufumakadzi, ṅwana na lutshetshe, vha lovhe ngei Yuda, zwa ita uri ni sale ni si na masalela?
8 Ndi ngani ni tshi ntsinyusa nga mishumo ya zwanḓa zwaṋu nga u ṋekedza miṅwe midzimu zwiṱhavhelo shangoni ḽa Egipita he na ya na dzula hone? Ni ḓo lovha na u vha na samba na nyadziwa nga dziṅwe tshaka dzoṱhe dza ḽifhasi.+
9 Naa no hangwa mishumo mivhi ya vhomakhulukuku waṋu na mishumo mivhi ya mahosi a ngei Yuda+ na mishumo mivhi ya vhafumakadzi vhao,+ u katela na mishumo mivhi yaṋu na mishumo mivhi ya vhafumakadzi vhaṋu,+ ye na i ita shangoni ḽa Yuda na nḓilani dza Yerusalema?
10 A vha athu u ḓiṱukufhadza u swika na ṋamusi+ kana u tevhedza mulayo wanga na maitele anga e nda ṋea inwi na vhomakhulukuku waṋu.’+
11 “Yehova wa mavhuthu, Mudzimu wa Isiraele, u ri, ‘Ndo ḓiimisela u ni ḓisela khombo, uri ndi fhelise ḽoṱhe ḽa Yuda.
12 Ndi ḓo dzhia masalela a vha Yuda vho ḓiimiselaho u ya u dzula shangoni ḽa Egipita, nda fhelisa vhoṱhe shangoni ḽa Egipita.+ Vha ḓo vhulawa nga banga na u fa nga nḓala; u bva kha muṱuku u swika kha muhulwane, vha ḓo vhulawa nga banga na nga nḓala. Vha ḓo vha samba, vha ḓo goḓiwa, vha welwa nga khombo na u nyadziwa.+
13 Vhane vha dzula ngei shangoni ḽa Egipita ndi ḓo vha pfisa vhuṱungu samusi ndo pfisa vhuṱungu vhane vha dzula Yerusalema, nga banga, nga nḓala na nga dwadze.+
14 Masalela a Yuda e a ya a dzula ngei shangoni ḽa Egipita a nga si ponyoke kana u tshila uri a humele shangoni ḽa Yuda. A ḓo tama u humela uri a dzule henengei, fhedzi a nga si humele, hu ḓo tou vhuyelela masalela a si gathi.’”
15 Vhanna vhoṱhe vhane vha ḓivha uri vhafumakadzi vhavho vha khou ṋekedza miṅwe midzimu zwiṱhavhelo na vhafumakadzi vhoṱhe vho imaho henefho, vhe tshigwada tshihulu na vhathu vhoṱhe vha re shangoni ḽa Egipita,+ vha tshi khou dzula ngei Patarosi,+ vha fhindula Yeremia vha ri:
16 “A ri nga thetshelesi zwine wa ri vhudza dzinani ḽa Yehova.
17 Nṱhani hazwo, ri ḓo ita zwoṱhe zwe ra zwi amba, ra ṋekedza zwiṱhavhelo Mufumakadzi wa Ḽiṱaḓulu* na u mu tevhulela zwifhiwa zwa u nwiwa,+ sa zwe riṋe, vhomakhulukuku washu, mahosi ashu na vhakololo vhashu vha zwi ita miḓini ya Yuda na nḓilani dza Yerusalema misi ri tshee ro fushea nga vhurotho, ro pfuma, ri sa welwi nga khombo.
18 U bva tshee ra litsha u ṋekedza Mufumakadzi wa Ḽiṱaḓulu* na u mu tevhulela zwifhiwa zwa u nwiwa ri khou tambula, ri khou vhulawa nga banga na nga nḓala.”
19 Vhafumakadzi vha dovha vha ri: “Musi ri tshi ṋekedza Mufumakadzi wa Ḽiṱaḓulu* zwiṱhavhelo na u mu tevhulela zwifhiwa zwa u nwiwa, naa vhanna vhashu vho vha vha sa ri ṋei thendelo musi ri tshi baka khekhe dza tshivhumbeo tshawe na u mu tevhulela zwifhiwa zwa u nwiwa?”
20 Yeremia a amba na vhathu vhoṱhe, vhanna na vhafumakadzi vhavho na vhathu vhoṱhe vhe vha amba nae, a ri:
21 “Zwiṱhavhelo zwe inwi, vhomakhulukuku waṋu, mahosi aṋu, vhakololo vhaṋu na vhathu vha ḽeneḽo shango na zwi ita miḓini ya Yuda na nḓilani dza Yerusalema,+ Yehova o zwi humbula, zwa ḓa mbiluni yawe!
22 Ndi ngazwo Yehova a songo kona u konḓelela mishumo yaṋu na zwithu zwi nengisaho zwe na zwi ita, shango ḽaṋu ḽa vha shubi, tshigoḓo na fhethu ho semiwaho hu sa dzuli muthu, sa zwine zwa vha zwone na ṋamusi.+
23 Ndi nga nṱhani ha uri no ṋekedza zwenezwi zwiṱhavhelo na nga nṱhani ha uri no khakhela Yehova nga u sa thetshelesa zwe Yehova a amba na u tevhedza mulayo wawe, maitele awe na khumbudzo dzawe zwa ita uri ni welwe nga yeneyi khombo, sa zwine zwa vha zwone na ṋamusi.”+
24 Yeremia a amba na vhathu vhoṱhe na vhafumakadzi vhoṱhe a ri: “Thetshelesani zwe Yehova a zwi amba, inwi noṱhe vha ngei Yuda ni re shangoni ḽa Egipita.
25 Yehova wa mavhuthu, Mudzimu wa Isiraele u ri, ‘Zwe inwi na vhafumakadzi vhaṋu na zwi amba no zwi ita nga zwanḓa zwaṋu, ngauri no ri: “Ri ḓo ita zwe ra ana ra ṋekedza Mufumakadzi wa Ḽiṱaḓulu* zwiṱhavhelo na u mu tevhulela zwifhiwa zwa u nwiwa.”+ Inwi vhafumakadzi ni ḓo tevhedza zwe na ana na zwi ita.’
26 “Ipfani zwine Yehova a amba inwi noṱhe vhathu vha Yuda vha dzulaho shangoni ḽa Egipita: ‘“Ndi ana nga dzina ḽanga ḽihulu,” u ralo Yehova, “uri dzina ḽanga a ḽi tsha ḓo vhidzelelwa nga muthu muṅwe na muṅwe wa Yuda+ musi a tshi ita muano shangoni ḽa Egipita a tshi ri, ‘Ndi ana nga Yehova Murena Muvhusahoṱhe a tshilaho!’+
27 Zwino ndo vha lavhelesa uri ndi vha ḓisele khombo hu si zwivhuya;+ vhanna vhoṱhe vha Yuda vha re shangoni ḽa Egipita vha ḓo vhulawa nga banga na u fa nga nḓala u swika vha tshi fhela.+
28 Ndi vha si gathi fhedzi vhane vha ḓo ponyoka banga, vha vhuyelela shangoni ḽa Yuda vha tshi bva Egipita.+ Masalela oṱhe a Yuda e a ḓa uri a dzule henefho shangoni ḽa Egipita a ḓo ḓivha uri kha nṋe kana one, ndi nnyi we a vha a tshi khou amba ngoho!”’”
29 “‘Tshiga tshine nda ḓo ni sumbedza tshone ndi hetshi,’ u ralo Yehova, ‘ndi ḓo ni pfisa vhuṱungu henefha fhethu, uri ni kone u ḓivha uri khombo ye nda ni fhulufhedzisa yone i ḓo ḓa zwa vhukuma.
30 Yehova u ri: “Ndi khou kumedzela Farao Hofura khosi ya Egipita zwanḓani zwa maswina awe na zwa vhane vha khou ṱoḓa u mu vhulaya, samusi ndo kumedzela Tsedekia khosi ya Yuda zwanḓani zwa Nebukadanetsara khosi ya Babele, we a vha e swina ḽawe, a tshi khou ṱoḓa u mu vhulaya.”’”+
Ṱhaluso dzi re magumoni a siaṱari
^ Kana “Memifisi.”
^ Ndi dzina zwaḽo ḽa mudzimukadzi we a vha a tshi rabelwa nga Vhaisiraele vha vhagunei; khamusi ndi mudzimukadzi wa mbebo.
^ Ndi dzina zwaḽo ḽa mudzimukadzi we a vha a tshi rabelwa nga Vhaisiraele vha vhagunei; khamusi ndi mudzimukadzi wa mbebo.
^ Ndi dzina zwaḽo ḽa mudzimukadzi we a vha a tshi rabelwa nga Vhaisiraele vha vhagunei; khamusi ndi mudzimukadzi wa mbebo.
^ Ndi dzina zwaḽo ḽa mudzimukadzi we a vha a tshi rabelwa nga Vhaisiraele vha vhagunei; khamusi ndi mudzimukadzi wa mbebo.
