Yeremia 49:1-39
49 Kha Vhaamoni,+ Yehova u ri:
“Naa Isiraele ha na vharwa?
Naa ha na muḽaifa?
Ndi ngani Malikamu+ o dzhia shango ḽa Gada?+
Ndi ngani vhathu vhawe vha tshi khou dzula miḓini ya Isiraele?”
2 “‘Maḓuvha a khou ḓa,’ u ralo Yehova,‘Ane ngao nda ḓo ita uri mukosi wa nndwa u pfale muḓini wa Raba+ wa Vhaamoni.+
U ḓo vha tshikwara tshi sa dzuli muthu,Na miḓana ya nga tsini* i ḓo fhiswa nga mulilo.’
‘Na Isiraele u ḓo dzhia shango ḽa vhe vha dzhia shango ḽawe,’+ u ralo Yehova.
3 ‘Lila, Iwe Hesiboni, ngauri ḽa Ai ḽo fheliswa!
Lilani, Inwi miḓana i re tsini na Raba.
Ambarani madzanganda.
Lilani ni mone na zwitumba zwa matombo,*Ngauri Malikamu u ḓo iswa vhuthubwani,Khathihi na vhotshifhe vhawe na vhakololo vhawe.+
4 Ndi ngani u tshi zuwa nga ha magovha au,Nga ha mudavhi wau u elelaho maḓi, Iwe ṅwananyana a sa fhulufhedzei,Ane a fhulufhela lupfumo lwaweNa ane a ri: “Ndi nnyi ane a ḓo lwa na nṋe?”’”
5 “‘Ndi khou u ḓisela zwi u ofhisaho,’ u ralo Yehova wa mavhuthu, Murena Muvhusahoṱhe,‘Zwi tshi bva kha vhoṱhe vho u tangaho.
U ḓo balanganyelwa thungo dzoṱhe,A hu na ane a ḓo kuvhanganya vha shavhaho.’”
6 “‘Nga murahu ndi ḓo kuvhanganya mathubwa a Vhaamoni,’ u ralo Yehova.”
7 Kha Edomo, Yehova wa mavhuthu u ri:
“Naa a hu tshee na vhuṱali ngei Themani?+
Naa a hu tshee na nyeletshedzo yavhuḓi i bvaho kha vha re na ṱhalukanyo?
Naa vhuṱali havho a vhu tshee na mushumo?
8 Shavhani ni humele murahu!
Tshimbilani ni ye u dzumbama, inwi vhadzulapo vha Dedani!+
Ngauri Esau ndi ḓo mu ḓisela khomboMusi tshifhinga tshi tshi swika tsha uri ndi mu pfise vhuṱungu.
9 Arali vhafuli vha nḓirivhe vha ḓa kha iwe,Naa vho vha vha sa ḓo fula vha sia dziṅwe?
Arali mbava dza ḓa vhusiku,Dzo vha dzi tshi ḓo tshinyadza nga hune dza funa.+
10 Fhedzi Esau ndi ḓo mu bvula zwiambaro.
Fhethu hawe ha u dzumbama ndi ḓo hu ita ha vha khagala,Uri a si tsha kona u dzumbama.
Vhana vhawe na mashaka awe na vhahura vhawe vha ḓo fheliswa vhoṱhe,+Ha tsha ḓo vha hone.+
11 Litsha vhana vhau vha si na vhokhotsi,Ndi ḓo vha tshidza,Na tshilikadzi dzau dzi ḓo fhulufhela nṋe.”
12 Yehova u ri: “Arali vhathu vha songo haṱulelwaho u nwa kha tshinwelo vha tshi tea u nwa, naa iwe u ḓo litshwa u songo pfiswa vhuṱungu? A u nga litshwi u songo pfiswa vhuṱungu, ngauri u tea u tshi nwa.”+
13 “Ngauri ndo ana nga nṋe muṋe,” u ralo Yehova, “uri Bosira u ḓo vha tshithu tshi ofhisaho,+ tsho nyadziwaho, tsho tshinyadzwaho na tsho semiwaho; na miḓi yawo yoṱhe i ḓo tshinyadzwa lwa tshoṱhe.”+
14 Ndo pfa zwe Yehova a zwi amba,Muḓinḓa o rumiwa kha tshaka uri a ri:
“Kuvhanganani noṱhe ni lwe nawo;Ḓilugiseleleni u lwa.”+
15 “Ndo u ita uri u si vhe wa ndeme kha tshaka,Na uri u vhengiwe nga vhathu.+
16 Nḓila ye wa tshuwisa ngayo vhathu yo u fhura,U ḓihudza ha mbilu yau,Iwe ane a khuda tomboni ḽihulu,Ane a dzula tshikwarani tshihulu.
Naho wo fhaṱa tshiṱaha tshau nṱha-nṱha sa goni,Ndi ḓo u tsitsa u henefho,” u ralo Yehova.
17 “Edomo ḽi tea u vha tshithu tshi tshuwisaho.+ Ane a fhira nga henefho u ḓo ḽi sedza a tshuwa a lidza muludzi nga nṱhani ha maṱungu aḽo oṱhe.
18 Samusi ho fheliswa Sodoma na Gomora na miḓana ya nga tsini,”+ Yehova u ri, “a hu na ane a ḓo dzula henefho, a hu nga dzuli muthu.+
19 “Hu na muthu ane a ḓo ḓa a fhelisa mafulo o tsireledzeaho sa ndau+ i tshi bva ḓakani ḽihulu ḽi re tsini na Yorodane, fhedzi ndi ḓo ita uri a ṱutshele ḽeneḽo shango nga u ṱavhanya. Ndi ḓo vhea muthu ane a ḓo ḽi langa. Ngauri ndi nnyi ane a nga nṋe, ndi nnyi ane a ḓo imedzana na nṋe? Ndi ufhio mulisa ane a nga ima phanḓa hanga?+
20 Inwi vhathu, ipfani zwe Yehova a phetha nga ha Edomo na zwe a humbula u zwi ita kha vhadzulapo vha ngei Themani,+ ndi hezwi:
Ngwana dzi ḓo kokodziwa.
U ḓo tshinyadza fhethu hune dza dzula hone nga nṱhani havho.+
21 Ḽifhasi ḽo dzinginyea musi vha tshi wa.
Hu khou liliwa!
Zwo pfala na ngei Lwanzheni Lutswuku.+
22 U ḓo fhufha na u kavha sa goni,+A ṱharamudzela phapha dzawe kha Bosira.+
Nga ḽeneḽo ḓuvha vhahali vha ngei EdomoVha ḓo nga mufumakadzi a tshi beba.”
23 Kha Damaseko+ ndi ri:
“Hamathi+ na Aripada yo shoniswa,Ngauri vho pfa mafhungo a si avhuḓi.
Vho tshuwa.
Lwanzhe lwo halifha, a lu dziki.
24 Vha Damaseko vho kulea nungo.
Vho rembuluwa uri vha shavhe, fhedzi vho tshuwa.
Vho tsikeledzea, vha khou pfa vhuṱungu,Sa mufumakadzi ane a khou beba.
25 Ndi ngani muḓi une wa khoḓiwa u sa athu u laṱiwa,Muḓana une wa huliswa?
26 Ngauri vhaṱhannga vhawo vha ḓo wa dzikhoroni,Maswole oṱhe a ḓo fheliswa nga ḽeneḽo ḓuvha,” u ralo Yehova wa mavhuthu.
27 “Ndi ḓo fhisa luvhondo lwa Damaseko nga mulilo,U ḓo fhisa mitsheṱo yo khwaṱhaho ya Benihadada.”+
28 Kha Kedara+ na kha mivhuso ya Hatsoro, ye Nebukadanetsara khosi ya Babele a i kunda, Yehova u ri:
“Takuwa u ye Kedara,U fhelise vharwa vha Vhubvaḓuvha.
29 Madennde avho na masambi avho zwi ḓo dzhiiwa,Na malabi a madennde avho na thundu dzavho dzoṱhe.
Gamela dzavho dzi ḓo dzhiiwa,Vha ḓo vha lilela vha ri, ‘Ro tangwa nga nyofho!’”
30 “Shavhani ni ye kule!
Tshimbilani ni ye ni dzumbame, Inwi vhadzulapo vha Hatsoro,” u ralo Yehova.
“Ngauri Nebukadanetsara khosi ya Babele o ni vhambela maano,U ṱoḓa u lwa na inwi.”
31 “Takuwa u ye u lwa na lushaka lune lwa vha na mulalo,Lwo tsireledzeaho!” u ralo Yehova.
“A lu na mavothi kana dzikhoro; vha dzula vhe vhoṱhe.
32 Vha ḓo dzhielwa gamela dzavho,Na masambi avho manzhi a ḓo thubiwa.
Ndi ḓo vha balanganyela thungo dzoṱhe,Vhane vha gera mavhudzi avho vha sia a vhukati ha ṱhoho,+Ndi ḓo vha ḓisela khombo i tshi bva thungo dzoṱhe,” u ralo Yehova.
33 “Hatsoro hu ḓo vha haya ha dziphunguwe,Hu ḓo vha shubi ḽa lini na lini.
A hu na ane a ḓo dzula henefho,A hu nga dzuli muthu.”
34 Zwe Yehova a amba na muporofita Yeremia nga ha ngei Elamu,+ musi Tsedekia+ khosi ya Yuda a tshi thoma u vhusa, ndi hezwi:
35 “Yehova wa mavhuthu u ri, ‘Ndi khou vunḓa vhura ha Vhaelamu,+ vhune ha vha tshisima tshavho tsha maanḓa.
36 Ndi ḓo ḓisela Elamu maḓumbu a bvaho thungo dzoṱhe dza ḽiṱaḓulu, nda vha balanganyela kha eneo maḓumbu. A hu nga ḓo vha na lushaka lune vhathu vha ngei Elamu vha sa ḓo ya khalwo.’”
37 “Ndi ḓo kwasha Vhaelamu phanḓa ha maswina avho na phanḓa ha vhane vha ṱoḓa u vha vhulaya; ndi ḓo vha ḓisela khombo, ndi ḓo vha sinyutshela,” u ralo Yehova. “Ndi ḓo vha rumela banga u swikela ndi tshi vha fhedza.”
38 “Khuluṋoni yanga ndi ḓo i vhea ngei Elamu,+ ndi ḓo fhelisa khosi na vhakololo henengei,” u ralo Yehova.
39 “Fhedzi maḓuvhani a vhufhelo, ndi ḓo kuvhanganya mathubwa a Elamu,” u ralo Yehova.
