Yeremia 50:1-46
50 Zwe Yehova a amba a tshi shumisa muporofita Yeremia nga ha Babele,+ nga ha shango ḽa Vhakaladea ndi hezwi:
2 “Zwi ḓivhadze na u zwi huwelela kha dzitshaka.
U imise tshiga, u huwelele nga hazwo.
U songo dzumba tshithu!
U ambe u ri, ‘Babele ḽo thubiwa.+
Bele o shoniswa.+
Merodaka o tshuwa.
Zwifanyiso zwaḽo zwo shoniswa.
Zwifanyiso zwaḽo zwi nengisaho* zwo tshuwa.’
3 Ngauri lushaka lune lwa bva devhula lwo ḓa u lwa naḽo.+
Lwa ita uri shango ḽi vhe tshithu tshi ofhisaho;A hu na ane a kha ḓi dzula khaḽo.
Vhathu na zwipuka zwo shavha;Zwo ṱuwa.”
4 “Misini yeneyo na nga tshenetsho tshifhinga,” u ralo Yehova, “vhathu vha Isiraele na vha Yuda vha ḓo ṱangana.+ Vha ḓo tshimbila vha tshi khou lila,+ vhoṱhe vha ḓo ṱoḓa Yehova Mudzimu wavho.+
5 Vha ḓo vhudzisa nḓila i yaho Tsioni, zwifhaṱuwo zwavho zwo sedza henengei,+ vha ri, ‘Iḓani ri vhe vhathu vha Yehova nga u vhofha mulanga wa lini na lini une wa sa ḓo hangwiwa.’+
6 Vhathu vhanga ndi sambi ḽo xelaho.+ Vhalisa vhavho vho vha xedza.+ Vho vha isa thavhani, vha vha bvisa kha thavha vha vha isa tshikwarani. Vho hangwa vhuawelo havho.
7 Vho fhedza vhoṱhe vhe vha vha wana,+ maswina avho o ri, ‘A ri na mulandu ngauri vho khakhela Yehova, ane zwivhuya zwa dzula khae, Yehova fhulufhelo ḽa vhomakhulukuku wavho.’”
8 “Shavhani ni bve Babele,Ibvani shangoni ḽa Vhakaladea,+Ni nge zwifuwo zwo rangaho sambi phanḓa.
9 Ndi khou ḓisela ḽa BabeleTshigwada tsha tshaka khulwane dzi bvaho shangoni ḽa devhula.+
Dzi ḓo ḽi ḓela dzo ḓilugiselela u lwa;Dza ḽi thuba.
Misevhe yadzo i nga ya muhaliI sia vhana vha si na vhabebi;+A dzi vhuyi dzi songo vuledza.
10 Shango ḽa Vhakaladea ḽi ḓo thubiwa.+
Vhoṱhe vhane vha ḽi thuba vha ḓo fushea,”+ u ralo Yehova.
11 “No pembela na takala+Musi ni tshi khou dzhia ifa ḽanga.+
No kandekanya hatsi sa kholomo i sa athu u dzwalaho,*No lila sa bere.
12 Mme au o shoniswa.+
Ene we a u beba o shoniswa.
Ndi ene muṱuku kha dzitshaka,Ndi soga ḽi si na maḓi.+
13 A ḽi nga dzulwi nga nṱhani ha mbiti dza Yehova;+Ḽi ḓo vha shubi.+
Ane a fhira nga henefho u ḓo ḽi sedza a tshuwaA lidza muludzi nga nṱhani ha maṱungu aḽo oṱhe.+
14 Iḓani no lugela u lwa na Babele ni tshi bva thungo dzoṱhe,Inwi vhane na kokodza vhura.
Ḽi pfuleni, ni songo sia na musevhe na muthihi,+Ngauri ḽo khakhela Yehova.+
15 Ḽi ṱavheleni mukosi wa nndwa thungo dzoṱhe.
Ḽo ḓikumedzela kha inwi.
Phuphu dzaḽo dzo wa, mbondo dzaḽo dzo wisiwa,+Ngauri Yehova u khou ḽi lifhedza.+
Ḽi lifhedzeni.
Ḽi iteni zwe ḽa ita vhaṅwe.+
16 Fhelisani ane a zwala Babele
Na ane a fara segere nga tshifhinga tsha khaṋo.+
Nga nṱhani ha banga ḽa tshiṱuhu, muṅwe na muṅwe u ḓo humela kha vhathu vha hawe,Muṅwe na muṅwe u ḓo shavhela shangoni ḽa hawe.+
17 “Vhathu vha Isiraele ndi nngu dzo balanganaho.+ Ndau dzo vha balanganya.+ Ho thoma khosi ya Asuri+ ya vha fhedza; ha tevhela Nebukadanetsara khosi ya Babele a ḓa a kukuna marambo avho.+
18 Nga zwenezwo, Yehova wa mavhuthu, Mudzimu wa Isiraele, u ri: ‘Ndi ḓo shumana na khosi ya Babele na shango ḽayo nga nḓila i fanaho na ye nda shumana na khosi ya Asuri.+
19 Isiraele ndi ḓo mu humisela pfuloni yawe,+ u ḓo fula a fushea Karamele na Bashani+ na thavhani dza Efuraimi+ na Giḽiada.’”+
20 “Misini yeneyo na nga tshenetsho tshifhinga,” u ralo Yehova,“Mulandu wa Isiraele u ḓo ṱoḓiwa,Fhedzi a u nga wanali,Zwivhi zwa Yuda a zwi nga waniwi,Ngauri ndi ḓo hangwela vhe nda vha tendela uri vha sale.”+
21 “Gonyani ni ye u lwa na shango ḽa Merathaimi na vhadzulapo vha Pekoda.+
Vha vhulayeni ni vha fhelise tshoṱhe,” u ralo Yehova.
“Itani zwoṱhe zwe nda ni laya.
22 Shangoni hu na mukosi wa nndwa,Ndi bonyongo ḽihulu.
23 Hamula ye ya kanḓa tshaka dza ḽifhasi ḽoṱhe yo vunḓiwa na u kwashiwa!+
Babele ḽo no vha fhethu hu ofhisaho kha dzitshaka!+
24 Iwe Babele, ndo u vhetshela tshikwekwe, tsho u fasha,A wo ngo zwi ḓivha.
Wo waniwa wa thubiwa,+Ngauri wo vha u tshi khou lwa na Yehova.
25 Yehova o vula ḓulu ḽawe,A bvisa zwiṱhavhane zwine a zwi shumisa musi o sinyuwa.+
Ngauri Yehova wa mavhuthu, Murena Muvhusahoṱhe u na mushumoShangoni ḽa Vhakaladea.
26 Iḓa u lwe naḽo u tshi bva ngei kule.+
U vule maḓulu aḽo.+
U ḽi kuvhanganye sa thulwi ya thoro.
Ḽi fhelise tshoṱhe.+
Ngavhe ḽi tshi sala ḽi si na muthu na muthihi.
27 Vhulaya mbohwana dzaḽo dzoṱhe;+Dzi litshe dzi ye u ṱhavhiwa.
Khombo khadzo, ngauri ḓuvha ḽadzo ḽo swika,Tshifhinga tsha u haṱulwa hadzo!
28 Hu na mukosi wa vhane vha khou shavha,Vhane vha khou shavha shangoni ḽa Babele,Uri vha ḓivhadze ndifhedzo ya Yehova Mudzimu washu ngei Tsioni,U khou lifhedzela thembele yawe.+
29 Vhidza vhapfuli uri vha ḓe vha lwe na Babele,Vhoṱhe vhane vha kokodza vhura.+
Vha fhaṱe mishasha u mona naḽo; vha si tendele na muthihi a tshi ponyoka.
U ḽi lifhedze u ya nga zwe ḽa ita.+
U ḽi ite zwe ḽa ita vhaṅwe.+
Ngauri ḽo ḓikukumusa phanḓa ha Yehova,Phanḓa ha Mukhethwa wa Isiraele.+
30 Vhaṱhannga vhaḽo vha ḓo wela dzikhoroni,+Na maswole aḽo a ḓo lovha* nga ḽeneḽo ḓuvha,” u ralo Yehova.
31 “Iwe u sa thetshelesi,+ ndi khou lwa na iwe,”+ u ralo Yehova wa mavhuthu, Murena Muvhusahoṱhe,“Ngauri ḓuvha ḽau ḽi tea u ḓa, tshifhinga tshine nda ḓo u vhona mulandu.
32 U ḓo khukhulwa wa wa, iwe u sa thetshelesi,Wa shaya na wa u u vusa.+
Ndi ḓo fhisa miḓi yau nga mulilo,U ḓo fhisa zwoṱhe zwi re tsini na iwe.”
33 Yehova wa mavhuthu u ri:
“Vhathu vha Isiraele na vha Yuda vha khou tsikeledzwa,Vhoṱhe vhane vha khou vha isa vhuthubwani a vha tendi vha tshi ṱuwa.+
Vho hana vha tshi humela murahu.+
34 Fhedzi Murengululi wavho u na maanḓa.+
Dzina ḽawe ndi Yehova wa mavhuthu.+
U ḓo vha sengela,+U itela uri shango ḽavho ḽi awele+Na u ita uri vhadzulapo vha Babele vha vhilaele.”+
35 “Hu na banga ḽine ḽa khou ḓela Vhakaladea,” u ralo Yehova,“Ḽi khou ḓela vhadzulapo vha Babele na vhakololo vhaḽo na vhaṱali vhaḽo.+
36 Hu na banga ḽine ḽa khou ḓela vhane vha amba zwi si na mushumo,* vha ḓo ita zwa vhutsilu.
Hu na banga ḽine ḽa khou ḓela vhahali, vha ḓo tshuwa.+
37 Hu na banga ḽine ḽa khou ḓela bere dzavho na gariki dzavho dza nndwa,Ḽi khou ḓela na vhatsinda vhoṱhe vha re khaḽo,Vha ḓo nga vhafumakadzi.+
Hu na banga ḽine ḽa khou ḓela lupfumo lwaḽo, lu ḓo dzhiiwa.+
38 Maḓi aḽo o dzikuwaho, a ḓo xiswa.+
Ngauri ndi shango ḽi re na zwifanyiso zwo vhaḓiwaho,+Nga nṱhani ha mabono avho a ofhisaho, vha ita zwa vhutsilu.
39 Nga zwenezwo, zwipuka zwa sogani zwi ḓo dzula na maṱarelwa,*Mphwe dzi ḓo dzula khaḽo.+
A ḽi tsha ḓo dovha ḽa dzulwa,A ḽi tsha ḓo dovha ḽa vha fhethu hune vhathu vha dzula hone lwa mirafho yoṱhe.”+
40 “Samusi Mudzimu o fhelisa Sodoma na Gomora+ na miḓana ya nga tsini,”+ u ralo Yehova, “a hu na ane a ḓo dzula henefho, a hu nga dzuli muthu.+
41 Vhathu vha khou ḓa vha tshi bva devhula;Hu ḓo vuswa lushaka luhulu na mahosi mahulu+U bva ngei zwipiḓani zwa kule zwa ḽifhasi.+
42 Vho fara vhura na pfumo.+
Vha na tshiṱuhu, a vha nga pfeli vhuṱungu.+
Mikosi yavho i ḓo nga lwanzhe lwo halifhaho,+Musi vho ṋamela bere dzavho.
Iwe ṅwananyana wa Babele, vho ima nga vhuthihi vho lugela u lwa na iwe.+
43 Khosi ya Babele yo pfa muvhigo nga havho,+Ya kulea nungo.+
Ya tshuwa,Ya farwa nga vhuṱungu vhu ngaho ha mufumakadzi a tshi beba.
44 “Hu na muthu ane a ḓo ḓa a fhelisa mafulo o tsireledzeaho sa ndau i tshi bva ḓakani ḽihulu ḽi re tsini na Yorodane, fhedzi ndi ḓo ita uri vha ṱutshele ḽeneḽo shango nga u ṱavhanya. Ndi ḓo vhea muthu ane a ḓo ḽi langa.+ Ngauri ndi nnyi ane a nga nṋe, ndi nnyi ane a ḓo imedzana na nṋe? Ndi ufhio mulisa ane a nga ima phanḓa hanga?+
45 Inwi vhathu, ipfani zwe Yehova a phetha nga ha Babele+ na zwe a humbula u zwi ita kha shango ḽa Vhakaladea.
Ngwana dzi ḓo kokodziwa.
U ḓo tshinyadza fhethu hune dza dzula hone nga nṱhani havho.+
46 Musi hu tshi pfala mukosi wa u thubiwa ha Babele, ḽifhasi ḽi ḓo dzinginyea,Hu ḓo pfala tshililo kha dzitshaka.”+
Ṱhaluso dzi re magumoni a siaṱari
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “sa ṱholana.”
^ Thevhedz., “fhumudzwa.”
^ Kana “vhaporofita vha mazwifhi.”
^ Kana “mmbwa dza ḓaka.”
