Yeremia 52:1-34
52 Tsedekia+ o vha e na miṅwaha ya 21 musi a tshi vha khosi, o vhusa miṅwaha ya 11 e Yerusalema. Mme awe o vha a tshi pfi Hamutali,+ ṅwananyana wa Yeremia wa ngei Libina.
2 O bvela phanḓa a tshi ita zwi sa takadzi Yehova, o ita zwoṱhe zwe zwa itwa nga Yehoyakimi.+
3 Hezwi zwithu zwo itea ngei Yerusalema na ngei Yuda nga nṱhani ha uri Yehova o vha o sinyuwa, a vha bvisa phanḓa hawe.+ Tsedekia o shandukela khosi ya Babele.+
4 Nga ṅwaha wa vhuṱahe musi hu tshi khou vhusa Tsedekia, nga ṅwedzi wa vhufumi, nga ḓuvha ḽa vhufumi ḽa ṅwedzi, Nebukadanetsara khosi ya Babele a ḓa na mmbi yawe yoṱhe a tshi ṱoḓa u lwa na muḓi wa Yerusalema. Vha atha madennde u mona nawo na u fhaṱa luvhondo u mona nawo woṱhe.+
5 Wonoyo muḓi wo tangiwa u swika nga ṅwaha wa vhu 11 musi hu tshi khou vhusa Khosi Tsedekia.
6 Nga ṅwedzi wa vhuṋa, nga ḓuvha ḽa vhuṱahe ḽa wonoyo ṅwedzi,+ nḓala ya vha khulu kha wonoyo muḓi, vhathu vho vha vhe si na zwiḽiwa kha ḽeneḽo shango.+
7 Vha kwasha luvhondo lwa wonoyo muḓi, maswole oṱhe a shavha muḓini vhusiku, a bva nga khoro i re vhukati ha mbondo mbili dzi re tsini na tsimu ya khosi, ngeno Vhakaladea vho tanga muḓi; o bvela phanḓa a tshi khou shavha nga nḓila i yaho Araba.+
8 Fhedzi mmbi ya Vhakaladea ya pandamedza Khosi Tsedekia,+ ya mu fara ngei midavhini ya soga ḽa Yeriko, maswole awe oṱhe o vha o mu shavha.
9 Ya fara Khosi Tsedekia ya mu isa kha khosi ya Babele ngei Ribila shangoni ḽa Hamathi, khosi ya mu haṱula.
10 Khosi ya Babele ya vhulaya vharwa vha Tsedekia a tshi zwi vhona, ya dovha ya vhulaya na vhakololo vhoṱhe vha Yuda henefho Ribila.
11 Khosi ya Babele ya swingisa Tsedekia,+ ya mu vhofha nga ngeḓane dza koporo, ya mu isa Babele, ya mu valela dzhele u swika a tshi fa.
12 Nebusaradani muhulwane wa vhalindi, we a vha e muḓinḓa wa khosi ya Babele, a ḓa Yerusalema nga ṅwedzi wa vhuṱanu, nga ḓuvha ḽa vhufumi ḽa wonoyo ṅwedzi, we wa vha u ṅwaha wa vhu 19 musi hu tshi khou vhusa Nebukadanetsara khosi ya Babele.+
13 A fhisa nnḓu ya Yehova, nnḓu*+ ya khosi na nnḓu dzoṱhe dza Yerusalema; a fhisa na nnḓu dzoṱhe khulwane.
14 Mbondo dzo tangaho muḓi wa Yerusalema dza wiswa nga mmbi yoṱhe ya Vhakaladea i re na muhulwane wa vhalindi.+
15 Nebusaradani muhulwane wa vhalindi a dzhia vhaṅwe vha vhathu vha shayaho na vhathu vhoṱhe vho salaho muḓini, a vha isa vhuthubwani. O dzhia na vhathu vho shavhelaho kha khosi ya Babele na vhatsila vhoṱhe.+
16 Fhedzi Nebusaradani muhulwane wa vhalindi a sia vhaṅwe vhathu vha shayaho vhukuma vha ḽeneḽo shango uri vha shume tsimuni dza minḓirivhe nga u tou kombetshedzwa.+
17 Vhakaladea vha kwashekanya phuphu dza koporo+ dza nnḓu ya Yehova na zwigoloi+ na sambelo ḽihulu ḽo itwaho nga koporo ḽi vhidzwaho Lwanzhe,+ zwe zwa vha zwi nḓuni ya Yehova, vha dzhia koporo yoṱhe vha i isa Babele.+
18 Vha dzhia na zwa u kumbela miḽora, fosholo, zwa u dzima mulilo, zwigoḓelo,+ zwinwelo+ na thundu dzoṱhe dza koporo dzine dza shumiswa thembeleni.
19 Muhulwane wa vhalindi a dzhia masambelo,+ zwa u oka mulilo, zwigoḓelo, midzio ya u kumbela miḽora, zwiṱomambone,+ zwinwelo na zwigoḓelo zwo itwaho nga musuku vhukuma na siḽiva vhukuma.+
20 Phuphu mbili, sambelo ḽihulu ḽi vhidzwaho Lwanzhe, mboho dza 12 dzo itwaho nga koporo+ dze dza vha dzi nga fhasi ha sambelo ḽihulu ḽi vhidzwaho Lwanzhe na zwigoloi zwe Khosi Salomo a zwi itela nnḓu ya Yehova, koporo ya zwenezwo zwithu zwoṱhe yo vha i nnzhi vhukuma i sa kalei.
21 Phuphu iṅwe na iṅwe yo vha i vhulapfu ha khubithi* dza 18, u mona nayo yo vha i tshi kalwa nga thambo ya vhulapfu ha khubithi dza 12;+ vhudenya hayo ho vha hu vhuphara ha minwe miṋa,* yo vha i na dindi.
22 Ṱhoho ya phuphu yo itwa nga koporo; ṱhoho nthihi i vhulapfu ha khubithi ṱhanu;+ i na maphomagraneithi o itwaho nga koporo o ṱumanaho u mona nayo. Phuphu ya vhuvhili yo vha i tshi fana na iḽa iṅwe, na yone yo vha i na maphomagraneithi.
23 Yo vha i na maphomagraneithi a 96 u mona nayo; o fhelela o vha e maphomagraneithi a 100 o ṱumanaho u mona nayo.+
24 Muhulwane wa vhalindi a dzhia na Seraya+ muhulwane wa vhotshifhe, Tsefanya+ ane a vha tshifhe a tevhelaho Seraya na vhalindi vha miṋango vhararu.+
25 Henefho muḓini, a dzhia muḓinḓa muthihi we a vha a tshi langa maswole na khonani dza sumbe dza khosi dze dza wanala muḓini, a dzhia na muṅwaleli wa mulangammbi, we a vha a tshi kuvhanganya vhathu vha ḽeneḽo shango, a dzhia na vhanna vha 60 kha vhathu zwavho vha ḽeneḽo shango vhe vha wanala muḓini.
26 Nebusaradani muhulwane wa vhalindi a vha dzhia a vha isa kha khosi ya Babele ngei Ribila.
27 Khosi ya Babele ya vha vhulayela ngei Ribila+ shangoni ḽa Hamathi. Vhayuda vha dzhiiwa shangoni ḽavho vha iswa vhuthubwani.+
28 Tshivhalo tsha vhathu vhe Nebukadanetsara a vha isa vhuthubwani ndi hetshi: nga ṅwaha wa vhusumbe o thuba+ Vhayuda vha 3 023.
29 Nga ṅwaha wa vhu 18 wa u vhusa ha Nebukadanetsara,+ vhathu vha 832 vho dzhiiwa Yerusalema.
30 Nga ṅwaha wa vhu 23 wa u vhusa ha Nebukadanetsara, Nebusaradani muhulwane wa vhalindi o isa Vhayuda vha 745 vhuthubwani.+
Vhoṱhe vhe vha iswa vhuthubwani vho vha vhe 4 600.
31 Nga ṅwaha wa vhu 37 musi Yehoyakini+ khosi ya Yuda e vhuthubwani, nga ṅwedzi wa vhu 12, nga ḓuvha ḽa vhu 25 ḽa wonoyo ṅwedzi, wonoyo ndi ṅwaha we Evili-merodaka khosi ya Babele a vha khosi ngawo, o vhofholola Yehoyakini khosi ya Yuda, a mu bvisa dzhele.+
32 A amba na Yehoyakini zwavhuḓi, a ita uri khuluṋoni yawe i fhire ya maṅwe mahosi e a vha e nae Babele.
33 Yehoyakini a bvula zwiambaro zwawe zwa dzhele, a thoma u ḽa na khosi tshifhinga tshoṱhe maḓuvha oṱhe a vhutshilo hawe.
34 Khosi ya Babele yo mu ṋea zwiḽiwa tshifhinga tshoṱhe, i tshi mu ṋea zwone ḓuvha ḽiṅwe na ḽiṅwe u swika nga ḓuvha ḽe a fa ngaḽo, maḓuvha oṱhe a vhutshilo hawe.
Ṱhaluso dzi re magumoni a siaṱari
^ Kana “pfamo.”
^ Khubithi nthihi i lingana na senthimithara dza 44,5. Sedzani Ṱhume. B14.
^ Vhuphara ha munwe muthihi ndi senthimithara dza 1,85. Sedzani Ṱhume. B14.
