Yeremia 8:1-22
8 Yehova u ri: “Nga tshenetsho tshifhinga, marambo a mahosi a muḓi wa Yuda, marambo a vhakololo vhawo, marambo a vhotshifhe, marambo a vhaporofita na marambo a vhadzulapo vha Yerusalema a ḓo bviswa mavhiḓani.
2 A ḓo adziwa ḓuvhani na musi hu na ṅwedzi na ṋaledzi dzoṱhe dza ṱaḓulu* dze vha vha vha tshi dzi funa na u dzi shumela na u dzi tevhela na u ṱoḓa u livhiswa ngadzo na u dzi gwadamela.+ Eneo marambo ha nga kuvhanganywi kana u vhulungwa. A ḓo nga manyoro mavuni.”+
3 “Na masalela a lwonolwu lushaka luvhi e a ponyoka a ḓo nanga lufu nṱhani ha vhutshilo fhethu hoṱhe hune nda ḓo a balanganyela hone,” u ralo Yehova wa mavhuthu.
4 “U vha vhudze uri, ‘Yehova u ri:
“Naa vha nga wa vha si dovhe vha vuwa?
Arali muthihi a rembuluwa, naa na vhaṅwe vha nga si rembuluwe?
5 Ndi ngani avha vhathu vha Yerusalema vha sa fhulufhedzei tshifhinga tshoṱhe?
Vha dzulela u fhura;Vha hana u rembuluwa.+
6 Ndo thetshelesa zwavhuḓi, fhedzi a vho ngo amba nga nḓila yo teaho.
A hu na we a rembuluwa kha vhuvhi hawe kana we a vhudzisa a ri, ‘Ndo vha ndi tshi ri ndi khou ita mini?’+
Muṅwe na muṅwe u vhuyelela kha nḓila i funwaho nga vhanzhi, u fana na bere i tshi gidimela nndwani.
7 Na ḽiovhelwa ḽine ḽa khou fhufha ḽi ḓivha khalaṅwaha dzaḽo;*Ḽiivha-muronzhe, ṱhambelamaḓi na lutiitii* zwi ḓivha tshifhinga tshazwo tsha u vhuya.*
Fhedzi vhathu vhanga a vha ḓivhi khaṱhulo ya Yehova.”’+
8 ‘Ni nga amba hani na ri: “Ro ṱalifha, ri na mulayo* wa Yehova”?
Ngauri tsha u ṅwala tsha vhamaṅwalo*+ tsha mazwifhi tsho shumiselwa zwa mazwifhi fhedzi.
9 Vhaṱali vho shoniswa.+
Vho tshuwa, vha ḓo farwa.
Vho laṱa ipfi ḽa Yehova,Zwino vha na vhuṱali vhufhio?
10 Nga zwenezwo, vhafumakadzi vhavho ndi ḓo vha ṋea vhaṅwe vhanna,Masimu avho nda a ṋea vhaṅwe;+Ngauri vhoṱhe vha ṱoḓa u ḓivhuyedza nga vhufhura, u bva kha muṱuku u swika kha muhulwane;+Vhoṱhe vha a fhura, u bva kha muporofita u swika kha tshifhe.+
11 Vha lingedza u fhodza u huvhala* ha ṅwananyana wa vhathu vhanga vha sa londi, vha ri,“Ḽo lala! Ḽo lala!”
Ngeno hu si na mulalo.+
12 Naa vha a shoniswa nga zwithu zwi nengisaho zwe vha zwi ita?
A vha shoni na luthihi!
A vha ḓivhi uri ṱhoni ndi mini!+
Ndi ngazwo vha tshi ḓo wa vhukati ha vho waho.
Musi ndi tshi vha ḓisela maṱungu vha ḓo khukhulwa,’+ u ralo Yehova.
13 ‘Musi ndi tshi vha kuvhanganya, ndi ḓo vha fhelisa,’ u ralo Yehova.
‘A hu nga sali nḓirivhe kha munḓirivhe, mahuyu ha nga sali kha muhuyu na maṱari awo a ḓo puta.
Vha ḓo xelelwa nga zwe nda vha ṋea.’”
14 “Ro dzulelani fhano?
Kha ri kuvhangane, ri dzhene miḓini yo tsireledzwaho nga mbondo+ ri fele henefho.
Ngauri Yehova Mudzimu washu u ḓo ri fhelisa,U ri ṋea maḓi a re na mulimo uri ri nwe,+Ngauri ro khakhela Yehova.
15 Ho vha ho lavhelelwa mulalo, fhedzi a hu na tshivhuya tsho ḓaho,Ho lindelwa tshifhinga tsha u fhodziwa, fhedzi ha ḓa zwi ofhisaho!+
16 Hu pfala u femeleka ha bere dzawe dzi re ngei Dani.
Shango ḽoṱhe ḽi a dzinginyea,Nga mukosi wa bere dzawe dza mboho.
Dza ḓa dza fhedza shango na zwoṱhe zwi re khaḽo,Muḓi na vhadzulapo vhawo.”
17 “Ngauri ndi khou ni rumela ṋowa,Ṋowa dzi re na vhuṱungu dzi sa ungeledzwi,Dzi ḓo ni luma,” u ralo Yehova.
18 U ṱungufhala hanga a hu fheli;Mbilu yanga i a lwala.
19 Shangoni ḽa kule hu pfala tshililo tsha u ṱoḓa thusoTshi bvaho kha ṅwananyana wa vhathu vhanga, a tshi ri:
“Naa Yehova ha tsheeho Tsioni?
Kana naa a hu tshee na khosi khawo?”
“Ndi ngani vho ntsinyusa nga zwifanyiso zwavho zwo vhaḓwaho,Nga midzimu yavho ya mazwifhi i sa vhuyedzi tshithu?”
20 “Khaṋo yo fhela, tshilimo tsho fhela,Fhedzi a ri athu u tshidzwa!”
21 Ndo kulea nungo ngauri ṅwananyana wa vhathu vhanga o huvhala;+Ndo ṱungufhala.
Ndo tshuwa.
22 Naa a hu na baḽisamu* ngei Giḽiada?+
Kana naa a hu na muthu ane a lafha* henefho?+
Ndi ngani ṅwananyana wa vhathu vhanga a sa fholi?+
Ṱhaluso dzi re magumoni a siaṱari
^ Thevhedz., “mavhuthu oṱhe a ṱaḓulu.”
^ Kana “tshifhinga tsho vhewaho.”
^ Kana khamusi, “ḽiovhelwa.”
^ Kana “pfuluwa.”
^ Kana “ndayo.”
^ Kana “vhaṅwaleli.”
^ Kana “vunḓea.”
^ Kana “mushonga.”
^ Kana “dokotela.”
