Yesaya 21:1-17
21 Khaṱhulo ya soga ḽa lwanzheni* ndi heyi:+
I khou ḓa u fana na ḓumbu ḽi tshi bva tshipembe,Ḽi tshi bva sogani, shangoni ḽi ofhisaho.+
2 Ndo sumbedzwa bono ḽi ofhisaho:
Wa tshimbevha u khou ita zwa tshimbevha,Wa u fhelisa u khou fhelisa.
Iwe Elamu, takuwa! Iwe Meda, tanga muḓi!+
Ndi ḓo fhelisa u tambula ho bveledzwaho ngawo.+
3 Ndi ngazwo ndi tshi khou pfa vhuṱungu vhuhulu.*+
Ndi khou pfa vhuṱungu,U fana na vhune ha pfiwa nga mufumakadzi a tshi beba.
Ndo tsikeledzea lune ndi si tsha pfa;Ndo thithisea lune ndi si tsha vhona.
4 Ndi khou ṋoka; ndi khou tetemela nga nyofho.
Ndi tshuwiswa nga vhusiku he nda vha ndo vhu lindela.
5 Adzelani ṱafula, ni vhee na zwidulo!
Ni ḽe ni nwe!+
Takuwani inwi vharangaphanḓa, ni ḓodze tshiṱangu!
6 Ngauri Yehova o mmbudza uri:
“Tshimbila, vhea ṱholi, i vhige zwine ya khou zwi vhona.”
7 O vhona gariki ya nndwa i tshi khou kokodzwa nga bere mbili,Gariki ya nndwa i kokodzwaho nga donngi,Gariki ya nndwa i kokodzwaho nga gamela.
A lavhelesa nga vhuronwane o fhaṱuwa.
8 A vhidzelela sa ndau i vhombaho a ri:
“Iwe Yehova, ndi ima kha tshiingamo ḓuvha ḽoṱhe,Ndi ima fhethu hune nda linda hone vhusiku vhuṅwe na vhuṅwe.+
9 Vhonani zwine zwa khou ḓa:
Vhanna vha re kha gariki ya nndwa i kokodzwaho nga bere mbili!”+
A amba navho a ri:
“O wa! O wa Babele!+
Mudzimu o kwasha zwifanyiso zwawe zwoṱhe zwo vhaḓiwaho zwa midzimu!”+
10 Inwi vhathu vhanga vho fhefherwaho sa goroi,Thoro dza fhethu hanga hune ha fhefherwa hone,*+Ndo ni vhudza zwe nda pfa nga Yehova wa mavhuthu, Mudzimu wa Isiraele.
11 Khaṱhulo ya Duma* ndi heyi:
Ndi khou vhidzelelwa nga muṅwe muthu ngei Seiri u ri:+
“Iwe mulindi, ḽi ḓo tsha lini?
Iwe mulindi, ḽi ḓo tsha lini?”
12 Mulindi a ri:
“Ḽi khou tsha, hone hu ḓo dovha ha vha vhusiku.
Arali ni tshi ṱoḓa u vhudzisa vhudzisani.
Ni dovhe ni vhuye!”
13 Khaṱhulo ya midavhi ya sogani ndi heyi:
Ni ḓo eḓela ḓakani ngei midavhini ya sogani,Inwi vhatshimbili vha Dedani.+
14 Ṱanganedzani a re na ḓora ni mu ṋee maḓi,Inwi vhadzulapo vha shango ḽa Thema,+Ni ḓisele zwiḽiwa* ane a khou shavha.
15 Ngauri vho shavha mabanga, mabanga o ṱomolwaho,Vho shavha vhura ho akhiwaho na nndwa khulwane.
16 Yehova o amba na nṋe a ri: “Hu sa athu u fhela ṅwaha muthihi une wa fana na ṅwaha wa mushumi o tholwaho, vhugala hoṱhe ha Kedara+ vhu ḓo fhela.
17 Vhahali vha vhapfuli vho salaho vha Kedara vha ḓo fhungudzea, ngauri ho amba Yehova Mudzimu wa Isiraele.”
Ṱhaluso dzi re magumoni a siaṱari
^ Zwi vhonala zwi tshi khou ambela kha shango ḽa kale ḽa Babilonia.
^ Thevhedz., “khundu dzanga dzi khou vhavha.”
^ Kana “luvhatani lwanga.”
^ Zwine zwa amba uri “U Fhumula.”
^ Thevhedz., “vhurotho.”
