Yesaya 23:1-18
-
Khaṱhulo ya Tiro (1-18)
23 Khaṱhulo ya muḓi wa Tiro ndi heyi:+
Lilani inwi zwikepe zwa Tharasisi!+
Ngauri vhuimazwikepe ho thuthwa; a hu tsha dzheniwa.
Zwo dzumbululwa shangoni ḽa Khithimi.+
2 Fhumulani, inwi vhadzulapo vha shango ḽi re tsini na lwanzhe.
Vhavhambadzi vha Sidoni+ vhane vha wela lwanzhe vho ni pfumisa.
3 Thoro* dza Sihoro*+ dzo ḓa nga maḓini manzhi,Muḓi wa Tiro u vhuyelwa nga khaṋo ya Nili,Zwi ita uri tshaka dzi vhuyelwe.+
4 Iwe Sidoni, farwa nga ṱhoni, iwe vhushavhelo ha lwanzhe,Ngauri lwanzhe lwo ri:
“A thi athu u pfa vhuṱungu ha u beba, a thi athu u beba ṅwana,Kana u alusa vhaṱhannga kana vhasidzana.”*+
5 Musi eneo mafhungo a tshi swika Egipita,+Vhathu vha ḓo ṱungufhala musi vha tshi pfa zwe zwa itea Tiro.+
6 Welani ni ye Tharasisi!
Lilani inwi vhadzulapo vha shango ḽi re tsini na lwanzhe!
7 Naa uyu ndi muḓi waṋu we wa vha u tshi ḓihudza u bva kale, u bva zwifhingani zwa kale?
Milenzhe yawo yo vha i tshi u hwala uri u ye u dzule mashangoni a kule.
8 Ndi nnyi we a phetha zwenezwi nga ha Tiro,Muṋei wa dzikhare,We vhavhambadzi vhawo vha vha vhe vhakololo,We vharengisi vhawo vha vha vha tshi ṱhonifhea kha ḽifhasi?+
9 Ndi Yehova wa mavhuthu we a ita phetho yeneyo,Ya uri a fhedze u ḓihudza hawo na lunako lwawo lwoṱhe,Uri a nyadze vhoṱhe vhe vha huliswa ḽifhasini ḽoṱhe.+
10 Wela shango ḽau sa Mulambo wa Nili, Iwe ṅwananyana wa Tharasisi.
A hu tshe na vhuimazwikepe.+
11 O imisela nṱha tshanḓa tshawe nṱha ha lwanzhe;O dzinginyisa mivhuso.
Yehova o laedza uri hu thuthwe vhushavhelo ha Fenikia.+
12 U ri: “A u tsha ḓo ḓihudza,+Iwe wo tsikeledzwaho, ṅwananyana wa Sidoni.
Takuwa, u wele Khithimi.+
Na henengei a u nga aweli.”
13 Ngeḽiḽa shango ḽa Vhakaladea.+
Ndi Vhakaladea vhe vha hu ita fhethu ha zwipuka zwa sogani,Hu si Vhaasuri.+
Vho fhaṱa mitsheṱo uri vha u tange;Vho kwasha mitsheṱo yawo yo khwaṱhaho,+Vha u sia u shubi.
14 Lilani inwi zwikepe zwa Tharasisi,Ngauri vhushavhelo haṋu ho thuthwa.+
15 Nga ḽeneḽo ḓuvha Tiro u ḓo hangwiwa lwa miṅwaha ya 70,+ u fana na vhutshilo* ha khosi nthihi. Musi miṅwaha ya 70 i tshi fhela, Tiro u ḓo nga muthu ane a rengisa muvhili ane a imbiwa kha luimbo lune lwa ri:
16 “Iwe ane wa rengisa muvhili wo hangwiwaho, dzhia haripa yau u mone na muḓi.
U lidze zwavhuḓi haripa yau;U imbe nyimbo nnzhi,Uri vha u humbule.”
17 Musi ho no fhela miṅwaha ya 70, Yehova u ḓo dovha a livhisa ṱhogomelo kha muḓi wa Tiro, wa humela kha bindu ḽawo, wa ita vhupombwe na mivhuso ya shango ḽoṱhe.
18 Fhedzi mbuyelo yawo na bindu ḽawo zwi ḓo vha zwikhethwa kha Yehova. A zwi nga vhulungwi kana u kuvhanganywa, ngauri bindu ḽawo ḽi ḓo vha ḽa vhane vha dzula phanḓa ha Yehova, uri vha ḽe vha fushee na uri vha ambare zwiambaro zwavhuḓi.+
Ṱhaluso dzi re magumoni a siaṱari
^ Thevhedz., “Mbeu.”
^ Ndi mulambo u elelaho u tshi bva kha Mulambo wa Nili.
^ Thevhedz., “vhasidzana vha sa athu u itaho zwa vhudzekani.”
^ Thevhedz., “maḓuvha.”
