Yesaya 36:1-22
36 Nga ṅwaha wa vhu 14 hu tshi khou vhusa Khosi Hiskia, Saniheribi khosi ya Asuri+ a ḓa u lwa na miḓi yoṱhe ya Yuda yo tsireledzwaho nga mbondo, a i thuba.+
2 Khosi ya Asuri ya ruma Rabasake*+ e na mmbi khulu i bvaho Laxisi+ uri a ye Yerusalema kha Khosi Hiskia. A ya a ima mugeroni wa damu ḽa nṱha,+ ḽe ḽa vha ḽi nḓilani khulu ya tsimu ya mukuvhi wa zwiambaro.+
3 Eliakima+ murwa wa Hilikia we a vha a tshi langa nnḓu,* Sebena+ muṅwaleli na Yoa murwa wa Asafu muvhulungi wa maṅwalo vha ya khae.
4 Rabasake a amba navho a ri: “Ndi humbela uri u vhudze Hiskia u ri: ‘Khosi-khulu, khosi ya Asuri i ri: “Wo fhulufhela mini?+
5 Iwe uri: ‘Ndi na maano na maanḓa a u lwa,’ fhedzi maipfi au ha ambi tshithu. Wo fhulufhela nnyi, lune wa vha na tshivhindi tsha u ntshandukela?+
6 U khou fhulufhela u tikedzwa nga Egipita, luṱanga lwo vunḓeaho lune arali muthu a ḓitika ngalwo lu a mu ṱhavha lwa phula tshanḓa tshawe. Ndi zwine Khosi Farao a vha zwone kha vhoṱhe vhane vha mu fhulufhela.+
7 Arali wa mmbudza uri, ‘Ri fhulufhela Yehova Mudzimu washu,’ naa a si Hiskia we a thutha fhethu hawe ha vhurabeli na aḽeṱare dzawe,+ a tshi vhudza vhathu vha Yuda na vha Yerusalema a ri, ‘Ni fanela u gwadama phanḓa ha yeneyi aḽeṱare ngei Yerusalema’?”’+
8 Zwino iḓa u pikisane na muṋe wanga khosi ya Asuri:+ Ndi ḓo u ṋea bere dza 2 000 arali wa kona u wana vhaṋameli vhadzo vho eḓanaho.
9 U nga kona hani u kunda muvhusi muthihi muṱuku kha vhashumeli vha muṋe wanga, ngeno u tshi fhulufhela Egipita uri u wane gariki na vhaṋameli vhadzo?
10 Naa a si Yehova o ntendelaho ndi tshi ḓa nda lwa na uno muḓi nda u fhelisa? Yehova ene muṋe o amba na nṋe a ri: ‘Iya u lwe na ḽeneḽi shango u ḽi fhelise.’”
11 Eliakima na Sebena+ na Yoa vha amba na Rabasake+ vha ri: “Ri humbela uri u ambe na vhashumeli vhau nga Tshiaramiki,*+ ngauri ri a tshi pfa; u songo amba na riṋe nga luambo lwa Vhayuda ngauri vhathu vha re luvhondoni vha khou ri pfa.”+
12 Fhedzi Rabasake a ri: “Naa muṋe wanga o nthuma uri ndi ḓe ndi ambe na iwe na muṋe wau fhedzi? Naa ho ngo nthuma na kha avha vhanna vha re luvhondoni, vhane vha ḓo ḽa malaṱwa avho, vha nwa mirundo yavho khathihi na inwi?”
13 Rabasake a ima, a vhidzelela nga luambo lwa Vhayuda+ a ri: “Ipfani zwine khosi-khulu ya Asuri+ ya amba.
14 Khosi i ri, ‘Ni songo tenda u fhurwa nga Hiskia, ngauri ha nga koni u ni tshidza.+
15 Ni songo tenda Hiskia a tshi ita uri ni fhulufhele Yehova+ nga u amba uri: “Yehova u ḓo ri tshidza, hoyu muḓi a u nga ḓo kumedzelwa zwanḓani zwa khosi ya Asuri.”
16 Ni songo thetshelesa Hiskia, ngauri khosi ya Asuri i ri: “Ḓiṱukufhadzeni ni ite mulalo na nṋe, muṅwe na muṅwe u ḓo ḽa mitshelo ya munḓirivhe wawe na mitshelo ya muhuyu wawe na u nwa maḓi a tshisima tshawe,
17 u swika ndi tshi ḓa nda ni dzhia, nda ni isa shangoni ḽine ḽa fana na ḽaṋu,+ shango ḽi re na thoro na waini ntswa, shango ḽi re na vhurotho na masimu a minḓirivhe.
18 Ni songo thetshelesa Hiskia ngauri u khou ni fhura a tshi ri, ‘Yehova u ḓo ri tshidza.’ Naa ho no vhuya ha vha na tshaka dze mudzimu wadzo a dzi tshidza shangoni ḽadzo zwanḓani zwa khosi ya Asuri?+
19 Midzimu ya Hamathi na Aripada+ i ngafhi? Midzimu ya Sefaravaimi+ i ngafhi? Naa yo tshidza Samaria zwanḓani zwanga?+
20 Ndi ufhio kha midzimu ya eneo mashango oṱhe we a tshidza shango ḽawe zwanḓani zwanga, lune Yehova a fanela u tshidza Yerusalema zwanḓani zwanga?”’”+
21 Fhedzi vha fhumula vha si fhindule tshithu, ngauri khosi yo vha yo ri: “Ni songo mu fhindula.”+
22 Fhedzi Eliakima murwa wa Hilikia, we a vha a tshi langa nnḓu,* Sebena+ muṅwaleli na Yoa murwa wa Asafu muvhulungi wa maṅwalo vha ya kha Hiskia vho kherukanya zwiambaro zwavho, vha vhudza Hiskia zwe Rabasake a zwi amba.
Ṱhaluso dzi re magumoni a siaṱari
^ Kana “muhulwane wa vhafari vha zwinwelo.”
^ Kana “pfamo.”
^ Kana “Tshisiria.”
^ Kana “pfamo.”
