Yesaya 37:1-38
37 Musi Khosi Hiskia a tshi tou pfa zwenezwo, a kherukanya zwiambaro zwawe a ambara madzanganda a ya nḓuni ya Yehova.+
2 A ruma Eliakima, we a vha a tshi langa nnḓu,* Sebena muṅwaleli na vhahulwane vha vhotshifhe vho ambara madzanganda, uri vha ye kha muporofita Yesaya+ murwa wa Amotsi.
3 Vha amba nae vha ri: “Hiskia o ri: ‘Heḽi ndi ḓuvha ḽa u tsikeledzwa, ḽa u kaidzwa* na ḽa u nyadzwa; ngauri vhana vho no vha tsini na u bebwa, fhedzi a hu na maanḓa a u beba.+
4 Khamusi Yehova Mudzimu wau u ḓo pfa zwe Rabasake a zwi amba, we a rumiwa nga khosi ya Asuri muṋe wawe uri a goḓe Mudzimu a tshilaho.+ Yehova Mudzimu wau u ḓo mu sengisela zwe a zwi pfa. Rabelela+ vhathu vho salaho vhane vha kha ḓi tshila.’”+
5 Vhashumeli vha Khosi Hiskia vha ya kha Yesaya,+
6 Yesaya a amba navho a ri: “Ni vhudze thovhela ni ri, ‘Yehova u ri: “U songo ofha+ zwe wa zwi pfa, zwe zwa ambiwa nga vhaḓinḓa vha khosi ya Asuri+ i tshi ntsema.
7 Ndi ḓo dzhenisa maipfi muhumbuloni wayo, i ḓo pfa muvhigo ya humela shangoni ḽayo;+ nda ita uri i vhulawe nga banga shangoni ḽayo.”’”+
8 Musi Rabasake a tshi pfa uri khosi ya Asuri yo ṱuwa ngei Laxisi, a vhuyelela khayo, a wana i tshi khou lwa na muḓi wa Libina.+
9 Khosi ya pfa hu tshi ambiwa nga ha Thirihaka khosi ya Etopia, hu tshi pfi: “O ḓa u lwa na iwe.” Musi i tshi pfa zwenezwo, ya dovha ya ruma vhaḓinḓa kha Hiskia,+ ya ri:
10 “Ni vhudze Hiskia khosi ya Yuda ni ri, ‘U songo tenda Mudzimu wau ane wa mu fhulufhela a tshi u fhura nga u amba uri: “Yerusalema u nga si kumedzelwe zwanḓani zwa khosi ya Asuri.”+
11 Wo zwi pfa zwe mahosi a Asuri a zwi ita a tshi fhelisa mashango oṱhe.+ Naa ndi iwe u woṱhe ane a ḓo ponyoka?
12 Naa midzimu ya tshaka dze vhomakhulukuku wanga vha dzi fhelisa yo vha tshidza?+ A ngafhi mashango a Gozani, Harani,+ Retsefe na vhathu vha Edeni vha re ngei Thelasara?
13 I ngafhi khosi ya Hamathi, khosi ya Aripada, khosi ya miḓi ya Sefaravaimi,+ ya Hena na ya Iva?’”
14 Hiskia a dzhia marifhi a bvaho kha vhaḓinḓa, a a vhala. A ya nḓuni ya Yehova, a a petulula phanḓa ha Yehova.+
15 Hiskia a rabela Yehova+ a ri:
16 “Iwe Yehova wa mavhuthu,+ Mudzimu wa Isiraele, wo dzulaho nṱha* ha vhakerube, ndi iwe Mudzimu wa ngoho u woṱhe kha mivhuso yoṱhe i re kha ḽifhasi. Wo ita ḽiṱaḓulu na ḽifhasi.
17 Iwe Yehova, ndi humbela uri u nthetshelese!+ Iwe Yehova, lavhelesa u vhone!+ Ipfa zwoṱhe zwe Saniheribi a zwi amba a tshi goḓa Mudzimu a tshilaho.+
18 Iwe Yehova, ndi ngoho uri mahosi a Asuri o fhelisa mashango oṱhe,+ u katela na shango ḽao.
19 A posa midzimu yao muliloni,+ ngauri yo vha i si midzimu, fhedzi yo vha i mishumo ya zwanḓa zwa vhathu,+ i ya thanda na ya matombo. Ndi ngazwo o i fhelisa.
20 Iwe Yehova Mudzimu washu, ri tshidze zwanḓani zwawe, uri mivhuso yoṱhe i re kha ḽifhasi i ḓivhe uri ndi Iwe Yehova Mudzimu u woṱhe.”+
21 Yesaya murwa wa Amotsi a rumela mulaedza kha Hiskia une wa ri: “Yehova Mudzimu wa Isiraele u ri, ‘Ngauri wo nkhumbela nga thabelo u tshi amba nga ha Saniheribi khosi ya Asuri,+
22 zwe Yehova a zwi amba nga hae ndi hezwi:
“Ṅwananyana wa Tsioni u a u nyadza, u a u goḓa.
Ṅwananyana wa Yerusalema u khou u dzungudzela ṱhoho.
23 Ndi nnyi we wa mu goḓa+ na u mu sema?
Wo vha u tshi khou ṱavhela nnyi mukosi+Wo vha wo ruḓela nnyi maṱo?
Wo zwi itela Mukhethwa wa Isiraele!+
24 Wo goḓa Yehova+ u tshi shumisa vhashumeli vhau wa ri:
‘Nga gariki dzanga nnzhi dza nndwaNdi ḓo gonya nṱha ha dzithavha,+Zwipiḓani zwa nṱha-nṱha zwa Libanoni.
Ndi ḓo rema miṱaululo yaho milapfu-lapfu, miri yaho yavhuḓi ya midzhunipa.
Ndi ḓo dzhena vhukati-kati, maḓakani aho.
25 Ndi ḓo bwa zwisima nda nwa maḓi;Ndi ḓo xisa milambwana* ya Egipita nga milenzhe yanga.’
26 Naa a wo ngo zwi pfa? Zwo dzula zwo dzudzanywa* u bva kale.
Ndo zwi dzudzanya u bva tshifhingani tsho fhiraho.+
Zwino ndi ḓo zwi ita.+
Iwe u ḓo thutha miḓi yo tsireledzwaho nga mbondo ya vha thulwi dza mathukhwi.+
27 Vhadzulapo vhayo a vha nga koni u ita tshithu;Vha ḓo ofha na u shona.
Vha ḓo fana na zwimela zwa masimuni na hatsi vhudala,Hatsi ha ṱhanga dzine dza khou vhudzulwa nga muya wa vhubvaḓuvha.
28 Fhedzi ndi a ḓivha hune wa dzula hone, musi u tshi bva na musi u tshi dzhena,+Na musi wo ntsinyutshela,+
29 Ngauri u ntsinyutshela+ hau na mukosi wau ndo zwi pfa.+
Ndi ḓo dzhenisa huka yanga ningoni yau na maḓomu+ anga memeni dza mulomo wau,Ndi ḓo u humisa nga nḓila ye wa ḓa ngayo.”
30 “‘Iwe* tshiga tshau tshi ḓo vha hetshi: Ṋaṅwaha u ḓo ḽa zwe zwa tou mela nga zwone zwiṋe; nga ṅwaha wa vhuvhili u ḓo ḽa thoro dzo melaho kha zwenezwo; fhedzi nga ṅwaha wa vhuraru u ḓo ṱavha mbeu wa i kaṋa, u ḓo lima masimuni a minḓirivhe wa ḽa mitshelo yayo.+
31 Vha muṱa wa Yuda vho ponyokaho, vhe vha sala,+ vha ḓo dovha vha ṱoka midzi u fana na zwimela, vha aṋwa mitshelo.
32 Ngauri Yerusalema hu ḓo bva masalela, Thavhani ya Tsioni+ hu ḓo bva vho ponyokaho. Zwi ḓo itwa nga u fhisea ha Yehova wa mavhuthu.+
33 “‘Yehova o amba nga ha khosi ya Asuri a ri:+
“A i nga dzheni kha hoyu muḓi+Kana u u pfula nga misevheKana u sendela tsini nawo yo fara tshiṱanguKana u fhaṱa mutsheṱo wa u u tanga.”’+
34 ‘I ḓo huma nga nḓila ye ya ḓa ngayo;A i nga dzheni kha hoyu muḓi,’ u ralo Yehova.
35 ‘Ndi ḓo tsireledza hoyu muḓi,+ nda u ponyokisa ndi tshi itela dzina ḽanga+Na mushumeli wanga Davida.’”+
36 Muruṅwa wa Yehova a bva a vhulaya vhanna vha 185 000 madenndeni a Vhaasuri. Musi vhathu vha tshi vuwa nga matsheloni-tsheloni, vha wana ho ḓala zwitumbu.+
37 Saniheribi khosi ya Asuri a ṱuwa a vhuyelela Ninive,+ a dzula henefho.+
38 Musi o gwadama nḓuni* ya Nisiroko mudzimu wawe, vharwa vhawe Adrameleke na Sharetsere vha mu ṱhavha nga banga,+ vha shavhela shangoni ḽa Ararati.+ Murwa wawe Esarahadoni+ a vha khosi vhudzuloni hawe.
Ṱhaluso dzi re magumoni a siaṱari
^ Kana “pfamo.”
^ Kana “semiwa.”
^ Kana khamusi, “vhukati.”
^ Kana “migero ya Nili.”
^ Thevhedz., “itwa.”
^ Ndi Hiskia.
^ Kana “thembeleni.”
