Yobo 1:1-22
1 Ho vha hu na muṅwe munna wa ngei shangoni ḽa Utsi we a vha a tshi pfi Yobo.*+ O vha e munna o lugaho na a fhulufhedzeaho;*+ o vha a tshi ofha Mudzimu a tshi iledza zwivhi.+
2 O vha e na vharwa vha sumbe na vhananyana vhararu.
3 O vha o fuwa nngu dza 7 000, gamela dza 3 000, kholomo dza 1 000* na donngi* dza 500, e na vhashumeli vhanzhi-vhanzhi, o vha e muhulwane kha vhathu vhoṱhe vha Vhubvaḓuvha.
4 Vharwa vhawe vhoṱhe vho vha vha tshi ita tshimima nḓuni dzavho vha tshi tou sielisana.* Vho vha vha tshi ramba na khaladzi dzavho tharu uri dzi ḓe dzi ḽe na u nwa navho.
5 Musi maḓuvha a zwimima o no fhela, Yobo o vha a tshi vha vhidza uri a vha kunakise. O vha a tshi vuwa nga matsheloni-tsheloni a ṋekedza zwiṱhavhelo zwa u fhiswa+ a tshi itela muṅwe na muṅwe wavho. Ngauri Yobo o vha a tshi ri: “Khamusi vharwa vhanga vho tshinya vha sema Mudzimu mbiluni dzavho.” Zwenezwo ndi zwe Yobo a vha a tshi zwi ita misi yoṱhe.+
6 Ha ḓa ḓuvha ḽa uri vharwa vha Mudzimu*+ wa ngoho vha ḓe vha ime phanḓa ha Yehova,+ Saṱhane+ na ene a ḓa a ima navho henefho.+
7 Yehova a amba na Saṱhane a ri: “U bva ngafhi?” Saṱhane a fhindula Yehova a ri: “Ndo vha ndi tshi khou mona-mona na shango ndi tshi khou tendeleka naḽo.”+
8 Yehova a amba na Saṱhane a ri: “Naa mushumeli wanga Yobo wo mu vhona? A hu na ane a nga ene kha ḽifhasi. Ndi munna o lugaho wa u fhulufhedzea;*+ ane a ofha Mudzimu na u iledza zwivhi.”
9 Saṱhane a fhindula Yehova a ri: “Naa Yobo a tshi ofha Mudzimu u sokou ita?+
10 Naa a wo ngo mu tsireledza+ na vha nnḓu yawe na thundu yawe yoṱhe? Wo fhaṱutshedza mishumo ya zwanḓa zwawe,+ zwifuwo zwawe zwo ḓadza shango.
11 Fhedzi isa tshanḓa tshau u fhelise zwithu zwoṱhe zwine a vha nazwo, u vhone arali a sa ḓo u sema.”
12 Yehova a amba na Saṱhane a ri: “Zwoṱhe zwine a vha nazwo zwo kumedzwa zwanḓani zwau.* Hone ene muṋe u songo mu kwama!” Nga zwenezwo, Saṱhane a ṱuwa phanḓa ha* Yehova.+
13 Nga ḓuvha ḽe vharwa vha Yobo na vhananyana vhawe vha vha vha tshi khou ḽa na u nwa waini nḓuni ya murwa muhulwane,+
14 ha ḓa muḓinḓa a mu vhudza a ri: “Kholomo dzo vha dzi tshi khou lima na donngi dzi tshi khou fula henefho tsini
15 ha ḓa Vhaseba vha dzi thuba, vha vhulaya vhashumeli vhau nga banga. Ndi nṋe ndi ndoṱhe we nda ponyoka uri ndi ḓe ndi u vhudze.”
16 Musi a sa athu u fhedza u amba, muṅwe a ḓa a ri: “Mulilo u bvaho ha Mudzimu* wo wa u tshi bva ṱaḓulu wa fhisa nngu dzau na vhalisa vhau! Ndi nṋe ndi ndoṱhe we nda ponyoka uri ndi ḓe ndi u vhudze.”
17 Musi a tshi kha ḓi amba, muṅwe a ḓa a ri: “Vhakaladea+ vho vhumba zwigwada zwiraru vha ḓa vha thuba gamela, vha vhulaya vhalisa vhau nga banga. Ndi nṋe ndi ndoṱhe we nda ponyoka uri ndi ḓe ndi u vhudze.”
18 Musi a tshi kha ḓi amba, muṅwe a ḓa a ri: “Vharwa vhau na vhananyana vhau vho vha vha tshi khou ḽa na u nwa waini nḓuni ya murwa wau wa tanzhe.
19 Ha ḓa ḓumbu ḽi tshi vhudzula ḽi tshi bva sogani ḽa thudza thungo nṋa dza nnḓu ya wela vhenevho vhana vhoṱhe vha fa. Ndi nṋe ndi ndoṱhe we nda ponyoka uri ndi ḓe ndi u vhudze.”
20 Yobo a takuwa a kherukanya tshiambaro tshawe a gera mavhudzi awe; a wa nga magona
21 a ri:
“Ndo bebwa nga mme anga ndi fhedzi,Ndi ḓo vhuyelela ndi fhedzi.+
Yehova o ṋea,+ Yehova o dzhia.
Dzina ḽa Yehova nga ḽi bvele phanḓa ḽi tshi rendwa.”
22 Hu sa londwi zwithu zwoṱhe zwe a ṱangana nazwo, Yobo ho ngo ita tshivhi kana u pomoka Mudzimu vhukhakhi.*
Ṱhaluso dzi re magumoni a siaṱari
^ Khamusi zwi amba uri “Tshithu Tshine Tsha Vhengiwa.”
^ Kana “munna o lugaho a si na mulandu.”
^ Thevhedz., “kholomo dza dzhogo dza 500.”
^ Thevhedz., “donngi dza tsadzi.”
^ Kana “nḓuni ya muṅwe na muṅwe nga ḓuvha ḽawe.”
^ Ḽiidioma ḽa Tshihevheru ḽine ḽa ambela kha vharwa vha Mudzimu vha vharuṅwa.
^ Kana “munna o lugaho a si na mulandu.”
^ Thevhedz., “phanḓa ha tshifhaṱuwo tsha.”
^ Kana “zwi fhasi ha ndango yau.”
^ Kana khamusi, “Lupenyo.”
^ Kana “u amba zwithu zwi si zwavhuḓi nga ha Mudzimu.”
