Yobo 2:1-13
2 Ha ḓa ḓuvha ḽa uri vharwa vha Mudzimu* wa ngoho+ vha ḓe vha ime phanḓa ha Yehova,+ Saṱhane na ene a ḓa a ima navho henefho phanḓa ha Yehova.+
2 Yehova a amba na Saṱhane a ri: “U bva ngafhi?” Saṱhane a fhindula Yehova a ri: “Ndo vha ndi tshi khou mona-mona na shango ndi tshi khou tendeleka naḽo.”+
3 Yehova a amba na Saṱhane a ri: “Naa mushumeli wanga Yobo wo mu vhona? A hu na ane a nga ene kha ḽifhasi. Ndi munna o lugaho wa u fhulufhedzea;*+ ane a ofha Mudzimu na u iledza zwivhi. U kha ḓi vha o khwaṱhisa kha u fhulufhedzea hawe,+ naho wo lingedza u nṱuṱuwedza uri ndi mu fhelise+ hu si na tshiitisi.”
4 Saṱhane a fhindula Yehova a ri: “Lukanda lu lamulelwa nga lukanda. Muthu a nga bvisa zwoṱhe zwine a vha nazwo uri a tsireledze vhutshilo hawe.
5 Fhedzi isa tshanḓa tshau u vhaise muvhili wawe, u vhone arali a sa ḓo u sema.”+
6 Yehova a amba na Saṱhane a ri: “O kumedzwa zwanḓani zwau!* Fhedzi u songo mu vhulaya!”
7 Saṱhane a ṱuwa phanḓa ha* Yehova a ya a rwa Yobo nga zwilonda+ zwi ṱhoṱhonaho u bva kha milenzhe u swika nṱha ha ṱhoho yawe.
8 Yobo a dzhia tshipiḓa tsha khali uri a ḓikwete ngatsho o dzula miḽorani.+
9 Mafheleloni mufumakadzi wawe a amba nae a ri: “U kha ḓi vha wo khwaṱhisa kha u fhulufhedzea hau? Sema Mudzimu u kone u fa!”
10 Yobo a mu fhindula a ri: “U khou amba sa muṅwe wa vhafumakadzi vha matsilu. Naa ri fanela u ṱanganedza fhedzi zwivhuya zwi bvaho kha Mudzimu wa ngoho, ra hana u ṱanganedza+ zwivhi?” Hu sa londwi zwenezwo zwoṱhe, Yobo ho ngo amba zwithu zwivhi nga mulomo wawe.+
11 Khonani tharu dza Yobo dza pfa nga ha khombo dzoṱhe dze dza mu wela, muṅwe na muṅwe a ḓa a tshi bva muḓini wawe. Ho vha hu Elifasi+ wa Muthemani, Bilidada+ wa Mushuha+ na Tsofari+ wa Munaama. Vha langana uri vha ye u lilisa Yobo na u mu khuthadza.
12 Musi vha tshi mu vhona vhe kule, vha si mu ḓivhe. Vha vusa tshililo tshihulu, vha kherukanya zwiambaro zwavho, vha phusulela buse muyani na kha ṱhoho dzavho.+
13 Vha dzula fhasi nae maḓuvha a sumbe na vhusiku hao. Vha si ambe nae, nge vha vhona a tshi khou pfa vhuṱungu vhuhulu.+
Ṱhaluso dzi re magumoni a siaṱari
^ Ḽiidioma ḽa Tshihevheru ḽine ḽa ambela kha vharwa vha Mudzimu vha vharuṅwa.
^ Kana “munna o lugaho a si na mulandu.”
^ Kana “U fhasi ha ndango yau.”
^ Thevhedz., “phanḓa ha tshifhaṱuwo tsha.”
