Yobo 41:1-34
-
Mudzimu u ṱalusa Liviathani (1-34)
41 “Naa u nga fasha Liviathani*+ nga tshihukaKana u nga vhofha lulimi lwaḽo nga thambo?
2 Naa u nga dzhenisa thambo* ningoni yaḽoKana u nga ṱhavha ṱhaha dzaḽo nga huka?*
3 Naa ḽi nga u humbela lunzhi-lunzhi,Kana ḽi nga amba na iwe nga vhulenda?
4 Naa ḽi nga vhofha mulanga na iwe,Uri u ḽi ite phuli yau, vhutshilo hau hoṱhe?
5 Naa u nga tamba naḽo u fana na tshiṋoniKana wa ḽi vhofha u itela u takadza vhananyana vhau vhaṱuku?
6 Naa vharengisi vha nga rengiselana ngaḽo?
Naa vha nga kovhekana na vhavhambadzi?
7 Naa u nga ḓadza mukumba waḽo nga misevhe+Kana u phula ṱhoho yaḽo nga mapfumo a u fasha khovhe?
8 Arali wa ḽi fara nga tshanḓa tshau;I ḓo vha nndwa khulu lune u si tsha ḓo dovha.
9 U songo fhulufhela uri u nga ḽi kunda.
U ḽi vhona fhedzi zwi a kula nungo.
10 A hu na ane a nga lingedza u ḽi ṱunga.
Ndi nnyi ane a nga lwa na nṋe?+
11 Ndi nnyi we a thoma u nṋea tshiṅwe tshithu lune nda tea u mu badela?+
Zwoṱhe zwi re fhasi ha ḽiṱaḓulu ndi zwanga.+
12 A thi nga litshi u amba nga ha miraḓo yaḽo,Nga ha maanḓa aḽo na muvhili waḽo wo vhumbeaho zwavhuḓi.
13 Ndi nnyi ane a nga sutula mukumba waḽo?
Ndi nnyi ane a nga dzhena kha ṱhaha dzaḽo dzo vuleaho?
14 Ndi nnyi ane a nga vula mulomo* waḽo?
Mulomo waḽo wo ḓala maṋo a ofhisaho.
15 Muṱana waḽo u na mitalo ya makwandaO nambatelanaho.
16 Makwanda aḽo o ṱumanaLune muya wa si kone u dzhena vhukati hao.
17 O nambatelana a tou kwakwana;O farana lune a si kone u fhandekanywa.
18 Musi ḽi tshi fema hu bva tshedza,Maṱo aḽo o tswuka vhunga mapfuvhi.
19 Tshedza tsha lupenyo tshi bva mulomoni waḽo;Ha bva ṱhase dza mulilo.
20 Ningoni yaḽo hu bva vhutsi,U fana na ṋanḓo yo vhasedzwaho nga miṱaṱe.
21 Ḽi tshi fema hu bva maxale* a dugaho,Mulomoni waḽo hu bva khavhu.
22 Mutsinga waḽo u na maanḓa mahulu,Vhoṱhe vhane vha ṱangana naḽo vha a tshuwa.
23 Ṋama dza muvhili waḽo dzo vhofhekana dza khwaṱha;Dzo khwaṱha, a dzi sudzuluwi.
24 Mbilu yaḽo yo khwaṱha sa tombo,Yo khwaṱha sa guyo.
25 Musi ḽi tshi vuwa, na vha maanḓa vha a ofha;Musi ḽi tshi ritha maḓi vha a ḓaḓa.
26 A hu na banga ḽine ḽa nga ḽi phula;Kana pfumo, nthi kana musevhe.+
27 Khaḽo tsimbi i nga luhatsi,Koporo i nga vongori.
28 A ḽi pandelwi nga musevhe;Khaḽo matombo a gatho a nga hatsi.
29 Ḽi dzhia thonga sa hatsi,Ḽi a sea musi hu tshi poswa pfumo.
30 Thumbu yaḽo i nga zwipiḓa zwa khali zwi re na ṱhodzi;Musi ḽo lala matopeni ḽi nga tshiḽei tsha u fhula.+
31 Ḽi selusa mativha sa bodo i tshi seluwa;Ḽi dzikusa lwanzhe sa bodo ya mishonga.
32 Hune ḽa fhira hone hu sala hu tshi penya.
Muthu a humbula u nga mativha a na mavhudzi matshena.
33 A hu na tshine tsha fana naḽo kha ḽifhasi,Ndi tshivhumbiwa tshi sa ofhi.
34 Ḽi zwondolola tshiṅwe na tshiṅwe tshine tsha ḓihudza.
Ndi khosi ya zwivhanda zwoṱhe zwihulu.”
Ṱhaluso dzi re magumoni a siaṱari
^ Khamusi ndi ngweṋa.
^ Thevhedz., “muṱaṱe.”
^ Thevhedz., “mupfa.”
^ Thevhedz., “tshifhaṱuwo.”
^ Kana “masimbe.”
