Evangeli Ya Yohane 11:1-57
11 Muṅwe munna wa ngei Bethania we a vha a tshi pfi Lazaro o vha a tshi khou lwala, o vha a tshi dzula na khaladzi dzawe Maria na Marita.+
2 Maria ndi ene we a ḓodza milenzhe ya Murena mapfura a nukhelelaho na u i phumula nga mavhudzi awe;+ Lazaro we a vha a tshi khou lwala o vha e khaladzi awe.
3 Khaladzi dza Lazaro dza rumela muthu uri a ye kha Yesu, a ri: “Murena, uḽa muthu ane wa mu funa u khou lwala.”
4 Fhedzi musi Yesu a tshi zwi pfa, a ri: “Hovhu vhulwadze a vhu nga ḓo mu vhulaya, fhedzi vhu ḓo ita uri hu rendwe Mudzimu+ na uri Murwa wa Mudzimu a rendwe ngaho.”
5 Yesu o vha a tshi funa Marita, Maria na Lazaro.
6 Naho zwo ralo, musi a tshi pfa uri Lazaro u khou lwala, o dzula maṅwe maḓuvha mavhili fhethu he a vha e hone.
7 Nga murahu ha zwenezwo, a amba na vhafunziwa vhawe a ri: “Kha ri vhuyelele Yudea.”
8 Vhafunziwa vhawe vha ri: “Rabi,+ a si kale Vhayuda vha tshi khou ṱoḓa u u kanḓa nga matombo,+ naa u khou dovha wa vhuyelela henengei?”
9 Yesu a ri: “Kani ḓuvha a ḽi na awara dza 12?+ Ane a tshimbila masiari ha khukhulwi nga tshithu, ngauri u vhona tshedza tsha ḽino shango.
10 Fhedzi ane a tshimbila vhusiku, u a khukhulwa, ngauri u khou tshimbila swiswini.”
11 Musi o no amba zwenezwi, a ri: “Lazaro khonani yashu o eḓela,+ fhedzi ndi khou ya henengei uri ndi mu vuse.”
12 Vhafunziwa vhawe vha ri: “Murena, arali o eḓela u ḓo fhola.”
13 Yesu o vha a tshi khou amba uri Lazaro o fa. Fhedzi vhone vha humbula uri o vha a tshi khou amba nga ha u awela musi muthu o eḓela.
14 Yesu a kona uri: “Lazaro o fa,+
15 huno ndi a takala ngauri ndo vha ndi siho henefho, ngauri zwine nda ḓo zwi ita zwi ḓo khwaṱhisa lutendo lwaṋu. Fhedzi kha ri ye khae.”
16 Nga zwenezwo, Thomasi we a vha a tshi pfi Didimo,* a amba na vhaṅwe vhafunziwa a ri: “Kha ri ye, uri ri fe nae.”+
17 Musi Yesu a tshi swika, a wana ho no fhela maḓuvha maṋa Lazaro e vhiḓani.
18 Bethania ho vha hu tsini na Yerusalema, hu khilomithara dzi ṱoḓaho u vha tharu.
19 Vhayuda vhanzhi vho vha vho ḓa u khuthadza Marita na Maria ngauri khaladzi avho o vha o fa.
20 Marita a tshi pfa uri Yesu u khou ḓa, a ya a mu ṱanganedza; Maria+ a sala hayani.
21 Marita a amba na Yesu a ri: “Murena, arali wo vha u fhano, ndi musi khaladzi anga a songo fa.
22 Naho zwo ralo, ndi a zwi ḓivha uri zwine wa humbela Mudzimu, Mudzimu u ḓo u ṋea.”
23 Yesu a ri: “Khaladzi au u ḓo vuwa.”
24 Marita a ri: “Ndi a zwi ḓivha zwa uri u ḓo vuwa musi vhafu vha tshi vuswa+ nga ḓuvha ḽa vhufhelo.”
25 Yesu a ri: “U vuwa na vhutshilo ndi nṋe.+ Ane a ntenda u ḓo dovha a tshila naho a fa;
26 ane a tshila a tshi ntenda ha nga fi.+ Naa zwenezwi u a zwi tenda?”
27 Ene a ri: “Murena, ndi a tenda uri ndi iwe Kristo Murwa wa Mudzimu, we ha pfi u ḓo ḓa shangoni.”
28 Musi o no amba zwenezwo, a ya kha Maria, a mu vhidzela thungo, a ri: “Mufunzi+ o swika, u khou u vhidza.”
29 Maria a tshi pfa zwenezwo, a takuwa nga u ṱavhanya a ya khae.
30 Yesu o vha a sa athu u swika muḓanani, o vha a tshi kha ḓi vha fhethu he a ṱangana hone na Marita.
31 Musi Vhayuda vhane vha khou khuthadza Maria nḓuni vha tshi mu vhona a tshi takuwa na u bva nga u ṱavhanya, vha mu tevhela, vha tshi humbula uri u khou ya vhiḓani+ uri a lilele hone.
32 Maria a tshi swika he Yesu a vha e hone, a tshi tou vhona Yesu a gwadama milenzheni yawe a ri: “Murena, arali wo vha u fhano, ndi musi khaladzi anga a songo fa.”
33 Yesu a tshi vhona Maria a tshi khou lila na Vhayuda vhe vha mu fhelekedza vha tshi khou lila, zwa mu vhaisa a ṱungufhala.
34 A ri: “No mu vhea ngafhi?” Vhone vha ri: “Murena, iḓa u vhone.”
35 Yesu a lila.+
36 Vhayuda vha ri: “Vhonani uri o vha a tshi mu funa hani!”
37 Vhaṅwe vha ri: “Ndi ngani a songo ita uri uyu munna a si fe, ngeno o kona u bonyolosa maṱo a munna we a vha a sa vhoni?”+
38 Yesu a dovha a ṱungufhala, a ya vhiḓani. Ḽeneḽo vhiḓa ḽo vha ḽi bako ḽo valwaho nga tombo.
39 Yesu a ri: “Bvisani tombo.” Marita, khaladzi a mufu a ri: “Murena, zwa zwino u ḓo vha a tshi vho nukha, ngauri ho no fhela maḓuvha maṋa.”
40 Yesu a ri: “Naa a tho ngo u vhudza uri arali wa tenda u ḓo vhona vhugala ha Mudzimu?”+
41 Vha bvisa ḽeneḽo tombo. Yesu a lavhelesa ṱaḓulu+ a ri: “Khotsi, ndi a u livhuwa nge wa mpfa.
42 Ndi a zwi ḓivha uri u dzula u tshi mpfa; fhedzi ndi amba zwenezwi uri havha vhathu vha tende uri wo nthuma.”+
43 Musi o no amba zwenezwo, a vhidzelela a ri: “Lazaro, ibva!”+
44 Lazaro a bva o pombiwa milenzhe, zwanḓa na tshifhaṱuwo nga malabi. Yesu a ri: “Mu vhofhololeni a ṱuwe.”
45 Musi Vhayuda vhanzhi vho ḓaho kha Maria vha tshi vhona zwe Yesu a zwi ita vha mu tenda,+
46 fhedzi vhaṅwe vhavho vha ya kha Vhafarisei vha vha vhudza zwe Yesu a zwi ita.
47 Vhahulwane vha vhotshifhe na Vhafarisei vha kuvhanganya miraḓo ya Sanihedrini,* vha ri: “Ri ḓo ita mini, ngauri hoyu munna u ita vhuṱolo vhunzhi?+
48 Arali ra mu litsha o ralo, vhathu vhoṱhe vha ḓo mu tenda, Vharoma vha ḓa vha dzhia fhethu* hashu na lushaka lwashu.”
49 Muṅwe wavho, we a vha a tshi pfi Kayafa,+ we a vha e tshifhe muhulu nga wonoyo ṅwaha, a ri: “A ni ḓivhi tshithu,
50 a ni zwi ṱalukanyi uri zwi ḓo ni vhuyedza arali ha fa muthu muthihi a tshi fela vhathu vhoṱhe nṱhani ha uri hu fe lushaka lwoṱhe.”
51 Zwenezwi ho ngo zwi amba zwi tshi bva kha ene muṋe, ngauri o vha e tshifhe muhulu nga wonoyo ṅwaha, o porofita uri Yesu o vha a tshi fanela u fela lushaka,
52 hu si lushaka fhedzi, fhedzi u itela u kuvhanganyela fhethu huthihi vhana vha Mudzimu vho balanganaho.
53 U bva nga ḽeneḽo ḓuvha vha langana uri vha mu vhulaye.
54 Yesu a si tsha tshimbila Vhayuda vha tshi mu vhona, fhedzi a ṱuwa a ya dzinguni ḽi re tsini na soga, muḓini une wa pfi Efuraimi,+ a dzula henefho na vhafunziwa vhawe.
55 Paseka+ ya Vhayuda yo vha i tsini. Vhathu vhanzhi vha ḽeneḽo shango vha gonya Yerusalema musi Paseka i sa athu u swika uri vha ḓikunakise u ya nga mulayo.
56 Vhathu vho vha vha tshi khou ṱoḓa Yesu, vha tshi vhudzisana vhe thembeleni vha tshi ri: “Inwi ni zwi vhona hani? Naa u ḓo ḓa vhuṱamboni?”
57 Fhedzi vhahulwane vha vhotshifhe na Vhafarisei vho vha vho amba uri ane a ḓivha hune Yesu a vha hone, a vha vhudze uri vha mu fare.
Ṱhaluso dzi re magumoni a siaṱari
^ Kana “Ḽifhaṱa.”
^ Sanihedrini ndi khothe khulwane ya Vhayuda.
^ thembele.
