Evangeli Ya Yohane 13:1-38
13 Ngauri Yesu o zwi ḓivha vhuṱambo ha Paseka vhu sa athu u swika uri tshifhinga tshawe tsho swika+ tsha uri a ṱuwe kha ḽino shango a humele kha Khotsi awe,+ a ḓi dzula a tshi funa vhatevheli vhawe u swika a tshi fa.+
2 Musi vha tshi khou ḽa tshilalelo, Diabolo o vha o no ṱuṱuwedza Yudasi Iskariote,+ murwa wa Simoni uri a fheṱe Yesu.+
3 Ngauri Yesu o vha a tshi ḓivha uri Khotsi o mu ṋea zwithu zwoṱhe na uri o ḓa a tshi bva kha Mudzimu nahone u khou vhuyelela kha Mudzimu,+
4 a takuwa musi hu tshi khou ḽiwa tshilalelo a bvula tshiambaro tsha nga nṱha. A dzhia thaula a ḓivhofha ngayo kha khundu.+
5 Nga murahu ha zwenezwo, a shela maḓi sambeloni, a thoma u ṱanzwa milenzhe ya vhafunziwa vhawe a i phumula nga thaula ye a vha o ḓivhofha khundu ngayo.
6 Simoni Petro a amba na Yesu musi a tshi swika khae a ri: “Murena, naa ndi khou ṱanzwiwa milenzhe nga iwe?”
7 Yesu a ri: “Zwine nda khou zwi ita u nga si zwi pfesese zwino, fhedzi u ḓo zwi pfesesa nga murahu.”
8 Petro a ri: “U songo nṱanzwa milenzhe.” Yesu a ri: “Arali nda sa u ṱanzwa+ a u nga vhi na mukovhe na nṋe.”
9 Simoni Petro a ri: “Murena, u songo ṱanzwa milenzhe yanga fhedzi, nṱanzwe na zwanḓa na ṱhoho.”
10 Yesu a ri: “We a ṱamba o kuna tshoṱhe, a zwi tsha ṱoḓea uri a dovhe a ṱanzwiwe huṅwe nga nnḓa ha u ṱanzwiwa milenzhe fhedzi. Inwi no kuna, fhedzi a no ngo kuna noṱhe.”
11 Ngauri o vha a tshi ḓivha muthu we a vha a tshi khou mu fheṱa.+ Ndi ngazwo o ri: “A no ngo kuna noṱhe.”
12 Musi o no fhedza u vha ṱanzwa milenzhe, o no ambara tshiambaro tsha nga nṱha, a dzula ṱafulani, a ri: “Naa ni a pfesesa zwe nda ni ita?
13 Musi ni tshi ri nṋe ndi ‘Mufunzi’ na ‘Murena’ ni vha ni tshi khou amba zwone.+
14 Arali nṋe ane nda vha Murena na Mufunzi ndo ni ṱanzwa milenzhe,+ na inwi ni ṱanzwane milenzhe.+
15 Ndo ni vhetshela tsumbo, uri zwe nda ni ita zwone, na inwi ni ite zwenezwo.+
16 Ngoho ndi a ni vhudza ndi ri, mulanda ha fhiri muṋe wawe, na o rumiwaho ha fhiri we a mu ruma.
17 Arali ni tshi ḓivha zwenezwi zwithu, ni ḓo takala arali na zwi ita.+
18 A thi ambi inwi noṱhe; ndi a ḓivha vhe nda vha nanga. Fhedzi zwenezwi zwo itea uri hu itee zwo ṅwaliwaho kha luṅwalo lune lwa ri:+ ‘We a vha a tshi ḽa na nṋe o ntshandukela.’+
19 Ndi khou ni vhudza zwino zwi sa athu u itea, uri musi zwi tshi itea ni tende uri ndi nṋe.+
20 Ngoho ndi a ni vhudza ndi ri, a ṱanganedzaho ane nda mu ruma, u ṱanganedza na nṋe.+ A ṱanganedzaho nṋe, u ṱanganedza na O nthumaho.”+
21 Musi Yesu o no amba zwenezwo, a ṱungufhala, a amba a ri: “Ngoho ndi a ni vhudza ndi ri, muṅwe waṋu u ḓo mpheṱa.”+
22 Vhafunziwa vha lavhelesana, vha sa ḓivhi uri u khou amba nnyi.+
23 Tsini na Yesu ho vha ho dzula muṅwe mufunziwa wawe we a vha a tshi mu funa.+
24 Ngauralo, Simoni Petro a amba nae nga ṱhoho a ri: “Ri vhudze uri Yesu u khou amba nnyi.”
25 Onoyo mufunziwa a ḓitika nga khana ya Yesu a ri: “Murena, ndi nnyi onoyo?”+
26 Yesu a ri: “Ndi ane nda ḓo thotha tshipiḓa tsha vhurotho nda mu ṋea.”+ Musi o no thotha nga tshenetsho tshipiḓa, a tshi ṋea Yudasi, murwa wa Simoni Iskariote.
27 Musi Yudasi o no ḽa tshenetsho tshipiḓa, Saṱhane a dzhena khae.+ Yesu a ri: “Zwine wa khou zwi ita, u zwi ite nga u ṱavhanya.”
28 Naho zwo ralo, kha vhoṱhe vho dzulaho ṱafulani a hu na we a vha a tshi ḓivha uri ndi ngani o mu vhudza zwenezwo.
29 Samusi Yudasi o vha e ene ane a fara bogisi ḽa tshelede,+ vhaṅwe vho vha vha tshi khou humbula uri Yesu o vha a tshi khou mu vhudza uri a renge zwithu zwine vha ḓo zwi ṱoḓa vhuṱamboni kana uri u fanela u ṋea vhashai tshelede.
30 Musi o no ḽa tshenetsho tshipiḓa, a bva nga u ṱavhanya. Ho vha hu vhusiku.+
31 Musi Yudasi o no ṱuwa, Yesu a ri: “Zwino Murwa muthu u ḓo huliswa,+ na Mudzimu u ḓo huliswa nga nṱhani hawe.
32 Mudzimu u ḓo hulisa Murwa muthu,+ u ḓo zwi ita nga u ṱavhanya.
33 Vhananga, ndi kha ḓi vha na inwi lwa tshifhinganyana. Ni ḓo nṱoḓa; zwino ndi khou ni vhudza zwe nda vhudza Vhayuda nda ri, ‘Hune nda khou ya ni nga si kone u ḓa.’+
34 Ndi khou ni ṋea mulayo muswa, wa uri ni funane;+ samusi na nṋe ndo ni funa.+
35 Arali ni tshi funana, ndi hone vhathu vhoṱhe vha tshi ḓo ḓivha zwa uri ni vhafunziwa vhanga.”+
36 Simoni Petro a ri: “Murena, u khou ya ngafhi?” Yesu a ri: “Hune nda khou ya u nga si ntevhele zwino, fhedzi u ḓo tevhela nga murahu.”+
37 Petro a ri: “Murena, ndi ngani ndi nga si kone u u tevhela zwino? Ndo ḓiimisela u u fela.”+
38 Yesu a ri: “Naa wo ḓiimisela u mpfela? Ngoho ndi a u vhudza ndi ri, u ḓo nndandula luraru mukukulume u sa athu u lila.”+
