Evangeli Ya Yohane 14:1-31
14 “Ni songo vhilaela.+ Tendani Mudzimu,+ ni tende na nṋe.
2 Nḓuni ya Khotsi anga hu na vhudzulo vhunzhi. Arali zwi vhe zwi songo ralo, ndi musi ndo ni vhudza, zwino ndi khou ya u ni lugiselela vhudzulo.+
3 Zwiṅwe hafhu, arali nda ya u ni lugiselela vhudzulo, ndi ḓo dovha nda vhuya nda ni dzhia, uri ni ḓe hune nṋe nda vha hone.+
4 Ni a ḓivha nḓila ya hune nda khou ya hone.”
5 Thomasi+ a ri: “Murena, ri nga ḓivha hani nḓila ri sa ḓivhi hune wa khou ya hone?”
6 Yesu a ri: “Ndi nṋe nḓila+ na ngoho+ na vhutshilo.+ A hu na ane a ḓa kha Khotsi a songo fhira kha nṋe.+
7 Arali inwi ni vhe no nḓivha, no vha ni tshi ḓo ḓivha na Khotsi anga; u bva zwino ni a mu ḓivha, no mu vhona.”+
8 Filipo a ri: “Murena, ri sumbedze Khotsi, ndi hone ri si tsha ḓo vhilaela.”
9 Yesu a ri: “Filipo, u bva tshee nda vha na iwe tshifhinga tshilapfu nga u rali, a u athu u nḓivha? A vhonaho nṋe o vhona Khotsi.+ Ndi ngani u tshi ri, ‘Ri sumbedze Khotsi’?
10 Naa a u tendi uri nṋe na Khotsi ri na vhuthihi?+ Zwine nda ni vhudza a zwi bvi kha nṋe;+ fhedzi ndi mishumo ya Khotsi ane a vha na vhuthihi na nṋe.
11 Tendani uri nṋe na Khotsi ri na vhuthihi; kana ni tende nga nṱhani ha mishumo ine nda i ita.+
12 Ngoho ndi a ni vhudza ndi ri, ane a ntenda, u ḓo ita mishumo ine nda i ita; a ita na mishumo i fhiraho yeneyi,+ ngauri nṋe ndi khou ya kha Khotsi.+
13 Zwiṅwe hafhu, zwoṱhe zwine na zwi humbela nga dzina ḽanga, ndi ḓo zwi ita, uri Khotsi a huliswe nga nṱhani ha Murwa.+
14 Zwine na humbela nga dzina ḽanga, ndi ḓo zwi ita.
15 “Arali ni tshi mpfuna, ni ḓo tevhedza milayo yanga.+
16 Ndi ḓo humbela Khotsi uri a ni ṋee muṅwe muthusi* uri a vhe na inwi nga hu sa fheli,+
17 ndi muya mukhethwa une wa dzumbulula ngoho,+ une shango ḽa sa ḓo u wana, ngauri a ḽi u vhoni, a ḽi u ḓivhi.+ Inwi ni a u ḓivha, ngauri u dzula u na inwi, u kha inwi.
18 A thi nga ḓo ni sia no ṱungufhala.* Ndi ḓo vhuya kha inwi.+
19 Hu si kale shango a ḽi tsha ḓo mmbona, fhedzi inwi ni ḓo mmbona,+ ngauri ndi a tshila na inwi ni ḓo tshila.
20 Nga ḽeneḽo ḓuvha ni ḓo zwi ḓivha uri nṋe na Khotsi anga ri na vhuthihi na inwi ni na vhuthihi na nṋe, na nṋe ndi na vhuthihi na inwi.+
21 Ane a ṱanganedza milayo yanga na u i tevhedza ndi ene ane a mpfuna. Ane a mpfuna u ḓo funwa nga Khotsi anga, na nṋe ndi ḓo mu funa, nda ḓisumbedza zwavhuḓi khae.”
22 Yudasi+ (hu si Iskariote) a ri: “Murena, ndi ngani u tshi ṱoḓa u ḓisumbedza zwavhuḓi kha riṋe hu si kha shango?”
23 Yesu a mu fhindula a ri: “Ane a mpfuna, u ḓo ita zwine nda amba,+ na Khotsi anga u ḓo mu funa, ri ḓo ḓa khae, ra vha nae.+
24 Ane a si mpfune ha tevhedzi zwine nda zwi amba. Zwine na khou zwi pfa a zwi bvi kha nṋe, zwi bva kha Khotsi o nthumaho.+
25 “Ndo ni vhudza zwenezwi zwithu musi ndi tshi kha ḓi vha na inwi.
26 Fhedzi muthusi ane a vha muya mukhethwa, ane Khotsi a ḓo mu ruma dzinani ḽanga, onoyo u ḓo ni funza zwithu zwoṱhe na u ni humbudza zwithu zwoṱhe zwe nda ni vhudza.+
27 Ndi ni siela mulalo; ndi ni ṋea mulalo wanga.+ Mulalo une nda ni ṋea wone wo fhambana na une shango ḽa ni ṋea wone. Ni songo vhilaela kana u ofha.
28 No zwi pfa ndi tshi ri, ‘Ndi khou ṱuwa, ndi ḓo dovha nda vhuya kha inwi.’ Arali ni tshi mpfuna, no vha ni tshi ḓo takala musi ndi tshi ri ndi khou ya kha Khotsi, ngauri Khotsi ndi muhulwane kha nṋe.+
29 Zwino ndo ni vhudza zwi sa athu u itea, u itela uri musi zwi tshi itea, ni tende.+
30 A thi tsha ḓo amba zwinzhi na inwi, ngauri muvhusi wa shango+ u khou ḓa, ha na maanḓa a u nndanga.+
31 Ndi khou ita zwe Khotsi a mmbudza+ uri shango ḽi zwi ḓivhe uri Khotsi ndi a mu funa. Takuwani ri ṱuwe fhano.
