Evangeli Ya Yohane 9:1-41
9 Musi a tshi khou fhira a vhona munna we a bebwa a sa vhoni.
2 Vhafunziwa vhawe vha mu vhudzisa vha ri: “Rabi,+ uyu munna o bebwa a sa vhoni, hu nga vha ho tshinya nnyi? Ho tshinya ene kana vhabebi vhawe?”
3 Yesu a ri: “A si hoyu munna o tshinyaho kana vhabebi vhawe, fhedzi zwenezwi zwo itea uri hu vhonale mishumo ya Mudzimu.+
4 Ri fanela u ita mishumo ya O nthumaho musi hu tshi kha ḓi vha masiari;+ vhusiku vhu khou ḓa hune muthu a nga si kone u shuma.
5 Musi ndi tshi kha ḓi vha shangoni, ndi nṋe tshedza tsha shango.”+
6 O no amba zwenezwi, a pfela mare fhasi a suka matope, a a ḓodza kha maṱo a onoyo munna+
7 a amba nae a ri: “Iya u ṱambe ishani* ḽa Silomu” (zwine zwa amba uri “Maḓi a Gubunyeaho”). A ya a ṱamba, a vhuya a tshi vho vhona.+
8 Vhahura na vhe vha mu vhona a tshi khou humbela vha ri: “Naa uyu munna a si ene we a vha a tshi dzulela u humbela?”
9 Vhaṅwe vho vha vha tshi ri: “Ndi ene.” Vhaṅwe vha tshi ri: “A si ene, u tou fana nae.” Onoyo munna a ri: “Ndi nṋe.”
10 Vha mu vhudzisa vha ri: “Ndi ngani u tshi vho vhona?”
11 Ene a ri: “Muṅwe munna ane a pfi Yesu o suka matope a nḓodza maṱoni, a ri, ‘Iya u ṱambe Silomu.’+ Nda ya nda ṱamba, nda kona u vhona.”
12 Vhone vha ri: “Onoyo munna u ngafhi?” Ene a ri: “A thi ḓivhi.”
13 Vha isa onoyo munna we kale a vha a sa vhoni kha Vhafarisei.
14 Ḓuvha ḽe Yesu a suka matope na u ita uri onoyo munna a vhone+ ḽo vha ḽi Savhatha.+
15 Na Vhafarisei vha mu vhudzisa nḓila ye a fhodzwa ngayo. Ene a ri: “O nḓodza matope maṱoni, nda ya nda ṱamba nda kona u vhona.”
16 Vhaṅwe Vhafarisei vha ri: “Hoyu munna ha bvi kha Mudzimu, ngauri ha tevhedzi Savhatha.”+ Vhaṅwe vha ri: “Muitazwivhi a nga ita hani vhuṱolo ho raloho?”+ Ha vha na phambano vhukati havho.+
17 Vha dovha vha amba na onoyo munna we kale a vha a sa vhoni vha ri: “U ri mini nga hae, samusi o ita uri u vhone?” Ene a ri: “Ndi muporofita.”
18 Vhayuda a vho ngo tenda uri onoyo munna o vha a sa vhoni. Vha vhidza vhabebi vhawe,
19 vha vha vhudzisa vha ri: “Naa uyu ndi ṅwana waṋu we a bebwa a sa vhoni? Ndi ngani a tshi vho vhona?”
20 Vhabebi vhawe vha ri: “Ndi zwone zwa uri ndi ṅwana washu na uri o bebwa a sa vhoni.
21 Fhedzi a ri ḓivhi uri ndi ngani a tshi vho vhona na we a ita uri a vhone a ri mu ḓivhi. Ndi munna. Mu vhudziseni. U fanela u ḓifhindulela.”
22 Vhabebi vhawe vho amba zwenezwi ngauri vho vha vha tshi khou ofha Vhayuda,+ ngauri Vhayuda vho vha vho no langana uri ane a tenda uri Yesu ndi Kristo, u tea u pandelwa sinagogoni.+
23 Ndi ngazwo vhabebi vhawe vho ri: “Ndi munna. Mu vhudziseni.”
24 Vha dovha vha vhidza onoyo munna we kale a vha a sa vhoni vha ri: “Renda Mudzimu; ri a zwi ḓivha uri onoyo munna ndi muitazwivhi.”
25 Ene a ri: “Zwa uri onoyo munna ndi muitazwivhi a thi zwi ḓivhi. Zwine nda zwi ḓivha ndi zwa uri ndo vha ndi sa vhoni, fhedzi zwino ndi vho vhona.”
26 Vhone vha ri: “O u ita mini? O bonyolosa hani maṱo au?”
27 Ene a ri: “Ndo no ni vhudza, fhedzi a no ngo nthetshelesa. Ndi ngani ni tshi khou ṱoḓa u dovha na zwi pfa? Kani ni khou ṱoḓa u vha vhafunziwa vhawe?”
28 Vha tshi pfa zwenezwo vha mu sema vha ri: “Iwe u mufunziwa wawe, fhedzi riṋe ri vhafunziwa vha Mushe.
29 Ri a zwi ḓivha uri Mudzimu o amba na Mushe; fhedzi a ri ḓivhi hune hoyu munna a bva hone.”
30 Ene a ri: “Zwi a mangadza ni sa ḓivhi uri u bva ngafhi, ngeno o ita uri ndi vhone.
31 Ri a zwi ḓivha uri Mudzimu ha thetshelesi vhaitazwivhi,+ fhedzi u thetshelesa ane a mu ofha na ane a ita zwine a zwi funa.+
32 U bva kale a hu athu u vhuya ha pfala zwa uri hu na muthu we a bonyolosa maṱo a muthu o bebwaho a sa vhoni.
33 Arali onoyo munna o vha a sa bvi kha Mudzimu, o vha a nga si ite tshithu na tshithihi.”+
34 Vhone vha ri: “Wo bebwa u na tshivhi, zwino u nga funza riṋe?” Vha mu pandela!+
35 Yesu a pfa uri vho mu pandela, a tshi mu wana, a amba nae a ri: “Naa u a tenda Murwa muthu?”
36 Ene a ri: “Muṋe wanga, mmbudze uri ndi nnyi uri ndi kone u mu tenda.”
37 Yesu a ri: “Wo no mu vhona, ndi ane a khou amba na iwe.”
38 Ene a ri: “Murena, ndi a mu tenda.” A mu losha.*
39 Yesu a ri: “Ndo ḓa fhano shangoni uri vhathu vha haṱulwe, uri vha sa vhoni vha vhone+ na uri vhane vha vhona vha si tsha vhona.”+
40 Vhaṅwe Vhafarisei vha re henefho vha pfa zwe a vha a tshi khou zwi amba, vha ri: “Kani na riṋe a ri vhoni?”
41 Yesu a ri: “Arali ni vhe ni sa vhoni, no vha ni tshi ḓo vha ni si na tshivhi. Fhedzi ni ri, ‘Ri a vhona.’ Ndi ngazwo ni tshi ḓo dzula ni na tshivhi.”+
