Yona 1:1-17
1 Yehova a amba na Yona*+ murwa wa Amithai, a ri:
2 “Takuwa u ye muḓini muhulu wa Ninive,+ u ḓivhadze nga ha khaṱhulo ine ya ḓo ḓela wonoyo muḓi, ngauri ndo pfa nga ha vhuvhi havho.”
3 Fhedzi Yona a shavha Yehova uri a ye Tharasisi; a ya Yope a wana tshikepe tshine tsha khou ya Tharasisi. A badela a ṋamela tshikepe a ṱuwa navho Tharasisi, a shavhela kule na Yehova.
4 Yehova a ita uri hu vhe na muya muhulu lwanzheni, ha vha na ḓumbu ḽihulu lwe tshikepe tsha ṱoḓou kwashea.
5 Vhashumi vha tshikepeni vho vha vho tshuwa lwe muṅwe na muṅwe wavho a thoma u vhidzelela mudzimu wawe uri a mu thuse. Vha posa thundu dze dza vha dzi tshikepeni lwanzheni, u itela u fhungudza muhwalo+ u re khatsho. Fhedzi Yona o vha o tsela fhasi kha tshipiḓa tsha nga ngomu-ngomu tsha tshikepe, he a swika a lala hone a farwa nga khofhe.
6 Mutshimbidzi wa tshikepe a ḓa a amba nae a ri: “Ndi ngani wo eḓela? Vuwa u vhidzelele mudzimu wau! Khamusi Mudzimu wa ngoho u ḓo ri pfela vhuṱungu, ri si lovhe.”+
7 Vha amba nga tshavho vha ri: “Iḓani ri ite madeṅwa+ uri ri kone u vhona uri ndi nnyi we a ri vhangela yeneyi khombo.” Vha ita madeṅwa, a sumba Yona.+
8 Vha mu vhudzisa vha ri: “Naa ndi iwe we wa ri vhangela yeneyi khombo ye ya ri wela? U shuma mini, u bva ngafhi? U dzula shangoni ḽifhio, u bva kha lushaka lufhio?”
9 A fhindula a ri: “Ndi Muhevheru, ndi gwadamela Yehova Mudzimu wa ṱaḓulu, Ene we a sika lwanzhe na shango.”
10 Musi vhenevho vhanna vha tshi pfa zwenezwo vha tou ṋaṋa u tshuwa, vha mu vhudzisa vha ri: “Wo ita mini?” (Vhenevho vhanna vho vha vha tshi zwi ḓivha uri u khou shavha Yehova, ngauri o vha vhudza.)
11 Lwanzhe lwo vha lu tshi khou ṋaṋa u halifha, vha mu vhudzisa vha ri: “Ri ite mini uri lwanzhe lu dzike?”
12 A fhindula a ri: “Mposeni lwanzheni, ndi hone lwanzhe lu tshi ḓo dzika; ngauri ndi a zwi ḓivha uri ndi nṋe ndo itaho uri hu vhe na ḽeneḽi ḓumbu.”
13 Naho zwo ralo, vhenevho vhanna vha lingedza u langa tshikepe uri tshi ye khunzi-khunzini, fhedzi zwo vha zwi sa konadzei, ngauri lwanzhe lwo vha lu tshi khou ṋaṋa u halifha.
14 Vha vhidzelela Yehova vha ri: “Yowee, Yehova, ri songo lovha nga nṱhani ha onoyu munna! U songo ri vhona mulandu wa u vhulaya hoyu munna a si na mulandu, samusi hu iwe Yehova we wa ita zwine wa zwi funa.”
15 Vha posa Yona lwanzheni; lwanzhe lwa dzika.
16 Vhenevho vhanna vha ofha Yehova zwihulu,+ vha ṋekedza Yehova tshiṱhavhelo na u mu anela.
17 Yehova a rumela khovhe khulu ya mila Yona, a dzula thumbuni ya khovhe maḓuvha mararu na vhusiku hao.+
Ṱhaluso dzi re magumoni a siaṱari
^ Zwine zwa amba uri “Ḽiivha.”
