Yona 4:1-11
4 Fhedzi zwenezwo zwa si takadze Yona, zwa ita uri a sinyuwe zwihulu.
2 A rabela Yehova a ri: “Yowee Yehova, naa ndo vha ndi sa khou vhilaedziswa nga zwenezwi musi ndi shangoni ḽa hashu? Ndi ngazwo ndo lingedza u shavhela Tharasisi;+ ngauri ndo vha ndi tshi zwi ḓivha uri u Mudzimu a pfelaho vhuṱungu* na ane a khathutshela, a sa ṱavhanyi u sinyuwa na a re na lufuno luhulu lu sa shanduki,+ ane a shandula muhumbulo wawe a si tsha ḓisa khombo.
3 Iwe Yehova, mmbulaye, ngauri u fa zwi khwine u fhira u tshila.”+
4 Yehova a vhudzisa a ri: “Naa zwo tea uri u sinyuwe nga u rali?”
5 Yona a bva muḓini wonoyo, a ya a dzula vhubvaḓuvha hawo. A ita thumba henefho, a dzula murunzini wayo uri a vhone zwine zwa ḓo itea kha wonoyo muḓi.+
6 Yehova Mudzimu a medza luranga* uri lu hule lu itele Yona murunzi na uri a dzikise mbiti dzawe. Yona a takalela lwonolwu luranga.
7 Fhedzi Mudzimu wa ngoho a ruma tshivhungu nga maḓautsha a ḓuvha ḽi tevhelaho, tsha ḽa lwonolwo luranga, lwa oma.
8 Musi ḓuvha ḽi tshi bva, Mudzimu a rumela muya wa u fhisa u bvaho vhubvaḓuvha, ḓuvha ḽa fhisa Yona a ṱoḓou ṋoka. A bvela phanḓa a tshi humbela uri a fe, a tshi ri, “Ngauri u fa zwi khwine u fhira u tshila.”+
9 Mudzimu a vhudzisa Yona a ri: “Naa zwo tea uri u sinyuwe nga zwe zwa itea kha luranga?”+
A fhindula a ri: “Zwo tea uri ndi sinyuwe, lune nda vhona zwi khwine uri ndi fe.”
10 Yehova a ri: “Iwe wo pfela vhuṱungu luranga lwe wa si lu shumele kana u ita uri lu hule; lwo hula nga vhusiku vhuthihi na u fa nga vhusiku vhuthihi.
11 Naa a tho ngo fanela u pfela vhuṱungu muḓi muhulu wa Ninive,+ une khawo ha vha na vhathu vha fhiraho 120 000 vhane vha si ḓivhe zwo lugaho na zwi songo lugaho,* khathihi na zwifuwo zwavho zwinzhi?”+
Ṱhaluso dzi re magumoni a siaṱari
^ Kana “a re na vhuthu.”
^ Kana khamusi, “mupfure.”
^ Kana “tsha u ḽa na tsha monde.”
