Yoshua 10:1-43
10 Musi Adoni-tsedeke khosi ya Yerusalema a tshi tou pfa uri Yoshua o thuba muḓi wa Ai a u fhelisa na zwa uri o ita Ai na khosi yawo+ zwe a ita muḓi wa Yeriko na khosi yawo,+ na nḓila ye vhadzulapo vha Gibeoni vha ita ngayo mulalo na Vhaisiraele,+ vha dzula navho,
2 a ofha zwihulu,+ ngauri Gibeoni wo vha u muḓi muhulu, une wa vha muṅwe wa miḓi i vhuswaho nga khosi. Wo vha u muhulu u fhira Ai,+ vhanna vhawo vhoṱhe vho vha vhe vhahali.
3 Nga zwenezwo, Adoni-tsedeke khosi ya Yerusalema a rumela hoyu mulaedza kha Hohamu khosi ya Heburoni,+ kha Pireamu khosi ya Yaramuthu, kha Yafia khosi ya Laxisi na kha Dibiri khosi ya Egiloni+ a ri:
4 “Iḓani ni nthuse uri ri lwe na muḓi wa Gibeoni, ngauri wo ita mulalo na Yoshua na Vhaisiraele.”+
5 Eneo mahosi maṱanu a Vhaamori+ a kuvhangana, ane a vha khosi ya Yerusalema, khosi ya Heburoni, khosi ya Yaramuthu, khosi ya Laxisi na khosi ya Egiloni khathihi na mmbi dzavho, a ya a atha madennde u itela uri a lwe na Gibeoni.
6 Vhanna vha Gibeoni vha rumela mulaedza kha Yoshua ngei madenndeni a Giligala+ vha ri: “U songo laṱa vhalanda vhau.+ Ṱavhanya u ḓe u ri tshidze na u ri thusa! Mahosi oṱhe a Vhaamori a bvaho dzinguni ḽa dzithavhani o kuvhangana u itela u lwa na riṋe.”
7 Yoshua a takuwa Giligala na maswole awe oṱhe na vhahali.+
8 Yehova a amba na Yoshua a ri: “U songo vha ofha,+ ngauri ndo vha kumedzela zwanḓani zwau.+ A hu na na muthihi ane a ḓo imedzana na iwe.”+
9 Yoshua a tshimbila vhusiku hoṱhe u bva Giligala, a vha vutshela vha songo zwi lavhelela.
10 Yehova a ita uri vha dzhenwe nga nyofho phanḓa ha Vhaisiraele,+ Vhaisiraele vha vhulaya vhathu vhanzhi vha henefho Gibeoni, vha vha pandamedza nga nḓila i gonyaho Bethe-horoni vha vha vhulaya u swika Aseka na Makeda.
11 Musi vha tshi khou shavha Vhaisiraele vha tshi khou tsela Bethe-horoni, Yehova a nisa matombo mahulu a tshifhango a bvaho makoleni a vha rwa u swika Aseka, vha fa. Zwi re zwone ndi uri vho vhulawaho nga tshifhango vho vha vha tshi fhira vhe vha vhulawa nga Vhaisiraele nga banga.
12 Nga ḽeneḽo ḓuvha ḽe Yehova a kumedzela Vhaamori zwanḓani zwa Vhaisiraele, Yoshua a amba na Yehova phanḓa ha Vhaisiraele a ri:
“Ḓuvha kha ḽi ime+ nṱha ha Vhagibeoni,+Ṅwedzi u ime Govhani ḽa Ayaloni!”
13 Nga zwenezwo, ḓuvha ḽa ima na ṅwedzi u si sudzuluwe, u swika lushaka lu tshi lifhedza maswina alwo. Naa zwenezwo a zwo ngo ṅwaliwa buguni ya Yashara?+ Ḓuvha ḽa ima vhukati ha lutombo, ḽi si ṱavhanye u kovhela, ḽa fhedza lu ṱoḓaho u vha ḓuvha ḽoṱhe.
14 A ho ngo tsha dovha ha vha na ḓuvha ḽi fanaho na ḽeneḽo, nga phanḓa kana nga murahu ha ḽeneḽo ḓuvha, musi Yehova a tshi thetshelesa zwe muthu a amba,+ ngauri Yehova o vha a tshi khou lwela Vhaisiraele.+
15 Nga murahu ha zwenezwo, Yoshua khathihi na Vhaisiraele vhoṱhe vha humela madenndeni ngei Giligala.+
16 Nga tshenetsho tshifhinga, eneo mahosi maṱanu o vha o shavha, o dzumbama bakoni ḽa Makeda.+
17 Yoshua a vhudzwa u pfi: “Mahosi maṱanu o wanwa o dzumbama bakoni ḽa Makeda.”+
18 Musi Yoshua a tshi pfa zwenezwo a ri: “Phiguluselani matombo mahulu a vale muṋango wa bako, ni vhee vhanna uri vha a linde.
19 Fhedzi inwi vhaṅwe ni songo ima. Pandamedzani maswina ni tou a vutshela nga murahu.+ Ni songo a tendela a tshi dzhena miḓini yao, ngauri Yehova Mudzimu waṋu o a kumedzela zwanḓani zwaṋu.”
20 Musi Yoshua na Vhaisiraele vho no fhedza u vhulaya vhathu vhanzhi, ha tou ponyoka fhedzi vhe vha shavhela miḓini yavho yo tsireledzwaho nga mbondo,
21 vhathu vhoṱhe vha humela ha Yoshua vho tsireledzea ngei madenndeni a Makeda. A hu na we a vha a tshi amba luvhi nga ha Vhaisiraele.
22 Yoshua a ri: “Vulani muṋango wa bako ni bvise eneo mahosi maṱanu bakoni ni a ḓise kha nṋe.”
23 Vha bvisa eneo mahosi maṱanu bakoni vha a ḓisa khae: khosi ya Yerusalema, khosi ya Heburoni, khosi ya Yaramuthu, khosi ya Laxisi na khosi ya Egiloni.+
24 Musi vha tshi ḓisa mahosi eneo kha Yoshua, Yoshua a vhidza vhanna vhoṱhe vha Isiraele, a amba na vhalangammbi vhe vha ṱuwa nae a ri: “Sendelani ngeno. Kandani haya mahosi kha mitsinga.” Vha sendela vha a kanda mitsinga.+
25 Yoshua a amba navho a ri: “Ni songo ofha kana u tshuwa.+ Ivhani na tshivhindi na maanḓa, ngauri Yehova u ḓo ita zwenezwi kha maswina oṱhe ane na ḓo lwa nao.”+
26 Nga murahu ha zwenezwo, Yoshua a rwa eneo mahosi a a vhulaya, a a fhahea kha madanda* maṱanu, a fhahewa henefho kha madanda u swika ḽi tshi kovhela.
27 Nga madekwana Yoshua a laedza uri a fhahululwe henefho kha madanda,+ a poswe bakoni he a vha o dzumbama hone. Ha phiguluselwa matombo mahulu henefho muṋangoni wa bako he a vha o dzumbama hone, eneo matombo a tshee hone na ṋamusi.
28 Nga ḽeneḽo ḓuvha Yoshua a thuba vhathu vha Makeda,+ a vha vhulaya nga banga. A vhulaya khosi yawo na ane a dzula khawo, a si tendele na muthu na muthihi a tshi ponyoka.+ Zwe a ita khosi ya Makeda+ ndi zwe a ita khosi ya Yeriko.
29 Yoshua na Vhaisiraele vhoṱhe vha takuwa Makeda vha ya Libina, vha lwa na Libina.+
30 Yehova a dovha a kumedzela wonoyo muḓi na khosi yawo+ zwanḓani zwa Vhaisiraele, vha vhulaya vhathu vhoṱhe vha henefho nga banga, vha si tendele na muthu na muthihi a tshi ponyoka. Zwe vha ita khosi yawo ndi zwe vha ita khosi ya Yeriko.+
31 Nga murahu ha zwenezwo, Yoshua khathihi na Vhaisiraele vhoṱhe vha takuwa Libina vha ya Laxisi+ vha atha madennde henefho, vha lwa nawo.
32 Yehova a kumedzela muḓi wa Laxisi zwanḓani zwa Vhaisiraele, vha u thuba nga ḓuvha ḽa vhuvhili. Vha vhulaya vhathu vhoṱhe vha henefho nga banga,+ sa zwe vha ita muḓi wa Libina.
33 Horamu khosi ya Gesere+ a gonya u itela u thusa Laxisi, fhedzi Yoshua a mu vhulaya na vhathu vhawe hu si ponyoke na muthu na muthihi.
34 Yoshua khathihi na Vhaisiraele vhoṱhe vha takuwa Laxisi vha ya Egiloni+ vha atha madennde henefho, vha lwa nawo.
35 Vha u thuba nga ḽeneḽo ḓuvha, vha vhulaya vhathu vha henefho nga banga. Vha vhulaya muṅwe na muṅwe wa henefho nga banga, sa zwe vha ita muḓi wa Laxisi.+
36 Yoshua khathihi na Vhaisiraele vhoṱhe vha takuwa Egiloni vha ya Heburoni+ vha atha madennde henefho, vha lwa nawo.
37 Vha u thuba vha vhulaya vhathu vha henefho, khosi yawo, vha miḓanani yawo na muṅwe na muṅwe wa henefho nga banga, vha si tendele na muthu na muthihi a tshi ponyoka. A vhulaya muṅwe na muṅwe wa henefho sa zwe a ita muḓi wa Egiloni.
38 Mafheleloni Yoshua khathihi na Vhaisiraele vhoṱhe vha ya muḓini wa Dibiri+ vha lwa nawo.
39 A u thuba, khathihi na khosi yawo na miḓanani yawo yoṱhe, vha vha vhulaya nga banga, vha vhulaya muṅwe na muṅwe wa wonoyo muḓi,+ vha si tendele na muthu na muthihi a tshi ponyoka.+ Yoshua a ita Dibiri na khosi yawo zwe a ita Heburoni na zwe a ita Libina na khosi yawo.
40 Yoshua o kunda mashango oṱhe a dzinguni ḽa dzithavhani, a Negebe, a Shefela+ na a miedzini na mahosi ao oṱhe, a si tendele na muthu na muthihi a tshi ponyoka; o vhulaya tshiṅwe na tshiṅwe tshi tshilaho,+ sa zwe Yehova Mudzimu wa Isiraele a vha laedza zwone.+
41 Yoshua o a kunda u bva Kadese-baranea+ u swika Gaza+ na mashango oṱhe a Gosheni+ u swika Gibeoni.+
42 Yoshua o thuba eneo mahosi oṱhe na mashango ao oṱhe nga khathihi, ngauri ho vha hu Yehova Mudzimu wa Isiraele we a vha a tshi khou lwela Vhaisiraele.+
43 Nga murahu ha zwenezwo, Yoshua khathihi na Vhaisiraele vhoṱhe vha humela madenndeni ngei Giligala.+
Ṱhaluso dzi re magumoni a siaṱari
^ Kana “miri.”
