Yoshua 11:1-23
11 Musi Yabini khosi ya Hatsoro a tshi tou pfa zwe zwa itea, a rumela mulaedza kha Yobaba khosi ya Madoni,+ kha khosi ya Shimironi, kha khosi ya Axasafa,+
2 kha mahosi e a vha e dzinguni ḽa thavhani dza devhula, kha ane a vha midavhini ya tshipembe* ha Kinerothe, kha ane a vha Shefela, kha ane a vha miedzini ya Doro+ vhukovhela,
3 kha a Vhakanana+ a re vhubvaḓuvha na vhukovhela, kha a Vhaamori,+ kha a Vhahethe, kha a Vhapheresi, kha a Vhayebusi vha re dzinguni ḽa dzithavhani na kha a Vhahevi+ vha re fhasi ha thavha ya Herimoni+ shangoni ḽa Mitsipa.
4 Eneo mahosi a bva na mmbi dzao dzoṱhe, gogo ḽihulu ḽo ḓalaho sa muṱavha wa khunzi-khunzini ya lwanzhe, khathihi na bere nnzhi-nnzhi na gariki dza nndwa.
5 Eneo mahosi oṱhe a tendelana uri a kuvhangane, a ḓa a atha madennde fhethu huthihi tsini na tshisima tsha Meromo u itela u lwa na Vhaisiraele.
6 Yehova a amba na Yoshua a ri: “U songo vha ofha,+ ngauri matshelo nga tshenetshi tshifhinga vhoṱhe ndi ḓo vha kumedzela zwanḓani zwa Vhaisiraele. U vha vhulaye. U huvhadze bere dzavho+ na u fhisa gariki dzavho.”
7 Yoshua khathihi na vhanna vhoṱhe vha nndwa vha vha vutshela vha songo zwi lavhelela henefho tsini na tshisima tsha Meromo.
8 Yehova a vha kumedzela zwanḓani zwa Vhaisiraele+ vha vha kunda, vha vha pandamedza vha vha swikisa muḓini Muhulu wa Sidoni+ na Misirefote-mayimi+ na vhubvaḓuvha ha Govhani ḽa Mitsepa, vha vha vhulaya hu si ponyoke na muthu na muthihi.+
9 Yoshua a vha ita zwe Yehova a mu vhudza; a huvhadza bere dzavho a fhisa gariki dzavho.+
10 Zwiṅwe hafhu, Yoshua a huma a thuba muḓi wa Hatsoro, a vhulaya khosi yawo nga banga,+ ngauri Hatsoro wo vha u wone muḓi muhulwane kha yeneyo mivhuso yoṱhe.
11 Vha vhulaya muṅwe na muṅwe wa henefho nga banga, vha vha fhedza.+ Hu si sale na tshithu na tshithihi tshi tshilaho.+ Nga murahu a fhisa Hatsoro.
12 Yoshua a thuba miḓi yoṱhe ya eneo mahosi, a vhulaya mahosi ayo nga banga.+ A vha fhelisa,+ sa zwe Mushe mushumeli wa Yehova a mu laedza.
13 Naho zwo ralo, Vhaisiraele vha si fhise muḓi na muthihi we wa vha u nṱha ha zwikwara zwavho, nga nnḓa ha Hatsoro; wo vha u wone muḓi u woṱhe we Yoshua a u fhisa.
14 Vhaisiraele vho dzhia thundu dzoṱhe dza yeneyo miḓi na zwifuwo.+ Fhedzi vha vhulaya muthu muṅwe na muṅwe nga banga u swika vha tshi vha fhelisa.+ Fhedzi a vho ngo tendela muthu na muthihi a tshi ponyoka.+
15 Sa zwe Yehova a laedza Mushe mushumeli wawe, ngauralo Mushe a laedza Yoshua,+ Yoshua a ita zwe a laedzwa. A si siedze na tshithu na tshithihi kha zwoṱhe zwe Yehova a laedza Mushe.+
16 Yoshua a kunda ḽeneḽo shango ḽoṱhe ḽa dzinguni ḽa dzithavhani, oṱhe a Negebe,+ shango ḽoṱhe ḽa Gosheni, ḽa Shefela,+ ḽa Araba,+ mashango a dzinguni ḽa thavhani dzoṱhe dza Isiraele na Shefela,*
17 u bva Thavhani ya Halaki, ine ya gonya ya swika Seiri, ya swika Baali-gada+ Govhani ḽa Libanoni fhasi ha Thavha ya Herimoni,+ a thuba mahosi ayo oṱhe, a a kunda, a a vhulaya.
18 Yoshua o fhedza tshifhinga tshilapfu a tshi khou lwa na eneo mahosi oṱhe.
19 A hu na muḓi we wa ita mulalo na Vhaisiraele nga nnḓa ha Vhahevi vha dzulaho Gibeoni.+ Miṅwe miḓi yoṱhe vho i kunda nga u tou lwa nayo.+
20 Ngauri ndi Yehova we a tendela mbilu dzavho dzi tshi rindila+ uri vha lwe na Vhaisiraele, u itela uri a vha fhelise a si vha khathutshele.+ Vho vha vha tshi fanela u fheliswa, sa zwe Yehova a laedza Mushe.+
21 Nga tshenetsho tshifhinga, Yoshua o fhelisa Vhaenaki+ dzinguni ḽa dzithavhani, u bva Heburoni, Dibiri, Anabi na dzinguni ḽa thavhani dzoṱhe dza Yuda na dzinguni ḽa thavhani dzoṱhe dza Isiraele. Yoshua a vha fhelisa khathihi na miḓi yavho.+
22 Hu si sale na Muenaki na muthihi shangoni ḽa Vhaisiraele; vho sala+ fhedzi shangoni ḽa Gaza,+ Gathi+ na Asidodo.+
23 Yoshua a langa shango ḽoṱhe, sa zwe Yehova a fhulufhedzisa Mushe,+ Yoshua a ḽi kovhela Vhaisiraele sa ifa ḽavho, ḽine ḽa fanela u kovhekanywa u ya nga dzitshaka.+ Shango ḽa lala, ha si tsha vha na nndwa.+
