Yoshua 14:1-15
14 Hezwi ndi zwe Vhaisiraele vha zwi wana sa ifa+ ngei shangoni ḽa Kanana, zwe vha kovhelwa nga tshifhe Eliasara, Yoshua murwa wa Nunu na vharangaphanḓa vha miṱa ya vhokhotsi vha tshaka dza Vhaisiraele.
2 Vho wana ifa ḽavho nga u ita madeṅwa,+ sa zwe Yehova a laya a tshi shumisa Mushe uri hu itwe nga u ralo kha tshaka dza ṱahe na hafu ya lushaka.+
3 Ngauri shango ḽa seli* ha Mulambo wa Yorodane+ Mushe o vha o ḽi ṋea dziṅwe tshaka mbili na hafu, Vhalevi ho ngo vha ṋea ifa.+
4 Vhaḓuhulu vha Yosefa vho vha vhe tshaka mbili,+ lwa Manase na lwa Efuraimi;+ a vho ngo ṋea Vhalevi mukovhe wa shango, nga nnḓa ha u vha ṋea miḓi ya u dzula khayo,+ khathihi na pfulo ya zwifuwo zwavho na thundu dzavho.+
5 Vhaisiraele vho kovhekana shango, sa zwe Yehova a laya Mushe.
6 Vhanna vha Yuda vha ḓa kha Yoshua ngei Giligala,+ Kalebe+ murwa wa Yefune wa Mukenisi a amba nae a ri: “U a zwi ḓivha zwavhuḓi zwe Yehova a zwi vhudza Mushe,+ mushumeli wa Mudzimu wa ngoho,+ nga ha iwe na nṋe ri ngei Kadese-baranea.+
7 Ndo vha ndi na miṅwaha ya 40 musi Mushe mushumeli wa Yehova a tshi nthuma ri ngei Kadese-baranea u ṱola shango,+ ndo vhuya na muvhigo u fhulufhedzeaho.+
8 Naho vhahashu vhe vha ṱuwa na nṋe vho ita uri vhathu vha ofhe, nṋe ndo tevhela Yehova Mudzimu wanga nga mbilu yoṱhe.+
9 Nga ḽeneḽo ḓuvha Mushe o ana a ri: ‘Shango ḽe wa tshimbila khaḽo ḽi ḓo vha ifa ḽau na ḽa vhana vhau nga hu sa fheli, ngauri wo tevhela Yehova Mudzimu wanga nga mbilu yoṱhe.’+
10 Sa zwe a fhulufhedzisa,+ Yehova o ntshidza,+ zwino ndo no fhedza miṅwe miṅwaha ya 45 u bva tshee Yehova a fhulufhedzisa Mushe musi Vhaisiraele vha tshi khou tshimbila sogani;+ ṋamusi ndi na miṅwaha ya 85.
11 Ndi kha ḓi vha na maanḓa na ṋamusi u fana na ḓuvha ḽe Mushe a nthuma ngaḽo. Ndi kha ḓi vha na nungo dza u lwa na u ita miṅwe mishumo u fana na u thomani.
12 Nga zwenezwo, nṋee dzingu ḽa dzithavhani ḽe Yehova a ḽi fhulufhedzisa nga ḽeneḽo ḓuvha. Naho wo zwi pfa nga ḽeneḽo ḓuvha uri ho vha hu na Vhaenaki+ henefho na miḓi mihulu yo tsireledzwaho nga mbondo,+ Yehova u ḓo vha na nṋe,+ ndi ḓo vha pandela* sa zwe Yehova a fhulufhedzisa.”+
13 Yoshua a mu fhaṱutshedza, a ṋea Kalebe murwa wa Yefune shango ḽa Heburoni sa ifa.+
14 Ndi ngazwo Heburoni ḽi ifa ḽa Kalebe murwa wa Yefune wa Mukenisi u swika na ṋamusi, ngauri o tevhela Yehova Mudzimu wa Isiraele nga mbilu yoṱhe.+
15 Heburoni wo vha u tshi pfi Kiriate-ariba+ (Ariba o vha e munna wa vhuimo ha nṱha kha Vhaenaki). Ḽeneḽo shango ḽa lala, ha si tsha vha na nndwa.+