Yoshua 17:1-18
17 Lushaka lwa Manase+ lwa ṋewa shango nga madeṅwa,+ ngauri o vha e tanzhe+ ḽa Yosefa. Samusi Maxiri+ tanzhe ḽa Manase, khotsi a Giḽiada o vha e muhali, o ṋewa Giḽiada na Bashani.+
2 Na vhana vha Manase vha ṋewa shango nga madeṅwa, u ya nga miṱa yavho, vharwa vha Abiesere,+ vharwa vha Heleke, vharwa vha Asiriele, vharwa vha Shikeme, vharwa vha Hefere na vha Shemida. Vhenevho vho vha vhe vhaḓuhulu vha Manase murwa wa Yosefa, ndi vhone vha vhanna u ya nga miṱa yavho.+
3 Fhedzi Tselopahada+ murwa wa Hefere, murwa wa Giḽiada, murwa wa Maxiri, murwa wa Manase, o vha a si na vharwa, o vha e na vhananyana fhedzi, vho vha vhe: Mahala, Noaxe, Hogola, Milika na Thiritsa.
4 Ngauralo, vha ya vha ima phanḓa ha tshifhe Eliasara,+ Yoshua murwa wa Nunu na vharangaphanḓa, vha ri: “Ndi Yehova we a laya Mushe uri a ri ṋee ifa vhukati ha vhahashu.”+ Vha tshi tevhedza zwe Yehova a laya, vha vha ṋea ifa vhukati ha mashaka a vhokhotsi avho.+
5 Manase a dovha a wana mikovhe ya fumi nga nnḓa ha shango ḽa Giḽiada na ḽa Bashani, e a vha e seli* ha Mulambo wa Yorodane,+
6 ngauri vhananyana vha Manase vho wana ifa khathihi na vharwa vhawe, shango ḽa Giḽiada ḽa vha ḽa vhaṅwe vhaḓuhulu vha Manase.
7 Mukano wa Manase wo vha u tshi bva Ashere wa swika Mikimatate,+ ho livhanaho na Shikeme,+ wonoyo mukano wo bvela phanḓa u tshi ya thungo ya tshipembe* shangoni ḽa vhathu vha Eni-Thapua.
8 Shango ḽa Thapua+ ḽo vha ḽi ḽa Manase, fhedzi muḓi wa Thapua u re mukanoni wa Manase wo vha u wa vhana vha Efuraimi.
9 Wonoyo mukano wa tsela fhasi Muedzini wa Kana, thungo ya tshipembe ha muedzi. Ho vha hu na miḓi ya Efuraimi vhukati ha miḓi ya Manase,+ mukano wa Manase wo vha u thungo ya devhula ya muedzi, wo vha wo guma nga lwanzhe.+
10 Shango ḽa tshipembe ḽo vha ḽi ḽa Efuraimi, ḽa devhula ḽo vha ḽi ḽa Manase, mukano wawe wo vha u tshi guma nga lwanzhe,+ ḽa devhula ḽo* vha ḽi tshi guma nga ḽa Ashere, vhubvaḓuvha ḽi tshi guma nga ḽa Isashari.
11 Kha mashango a ḽa Isashari na ḽa Ashere, Manase o ṋewa Bethe-seani na miḓana ya nga tsini,* Yibiliamu+ na miḓana ya nga tsini, vhadzulapo vha Doro+ na miḓana ya nga tsini, vhadzulapo vha Endoro+ na miḓana ya nga tsini, vhadzulapo vha Thaanake+ na miḓana ya nga tsini na vhadzulapo vha Megido na miḓana ya nga tsini, yeneyo yo vha i miḓana miraru i re zwikwarani.
12 Fhedzi vhana vha Manase a vho ngo kona u thuba yeneyo miḓi; Vhakanana vho vha vho ḓiimisela u bvela phanḓa vha tshi dzula kha ḽeneḽo shango.+
13 Musi Vhaisiraele vha tshi vha na maanḓa, vha kombetshedza Vhakanana uri vha vhe dziphuli,+ fhedzi a vho ngo vha pandela* vhoṱhe.+
14 Vhana vha Yosefa vha amba na Yoshua vha ri: “Ndi ngani wo ri kovhela tshipiḓa+ tshithihi tsha shango, ngeno ri vhanzhi, ngauri Yehova o ri fhaṱutshedza u swika zwino?”+
15 Yoshua a vha fhindula a ri: “Arali ni vhanzhi nga u ralo, iyani ḓakani ni reme maḓaka henefho shangoni ḽa Vhapheresi+ na Vharefaimi,+ samusi dzinguni ḽa dzithavhani kha ḽa Efuraimi+ hu huṱuku kha inwi.”
16 Vhana vha Yosefa vha ri: “Ḽa dzinguni ḽa dzithavhani a ḽo ngo ri eḓana, Vhakanana vhoṱhe vha dzulaho shangoni ḽa govhani vha na gariki+ dza nndwa dzi re na mabanga kha malinga, na vhane vha vha ngei Bethe-seani+ na miḓana ya nga tsini* na vhane vha vha Govhani ḽa Yeseriele.”+
17 Ngauralo, Yoshua a amba na vhana vha Yosefa, Efuraimi na Manase a ri: “Ni vhanzhi, ni na maanḓa mahulu. A no ngo fanela u wana mukovhe+ muthihi fhedzi,
18 fhedzi na ḽa dzinguni ḽa dzithavhani ḽi ḓo vha ḽaṋu.+ Naho ḽi ḓaka, ni ḓo ḽi remekanya, shango ḽaṋu ḽi ḓo guma henefho. Ni ḓo pandela Vhakanana naho vhe na maanḓa u ni fhira, vhe na gariki dza nndwa dzi re na mabanga kha malinga.”+
Ṱhaluso dzi re magumoni a siaṱari
^ Ndi thungo ya vhubvaḓuvha.
^ Thevhedz., “kha tsha u ḽa.”
^ Ndi vhathu vha Manase kana shango ḽa Manase.
^ Kana “yo u tangaho.”
^ Kana “dzhiela.”
^ Kana “yo u tangaho.”
