Yoshua 2:1-24
2 Musi vhe Sitima,+ Yoshua murwa wa Nunu a ruma vhanna vhavhili tshiphirini uri vha vhe dziṱholi. A vha vhudza a ri: “Iyani ni ṱole shango, zwihuluhulu ḽa Yeriko.” Ngauralo, dzenedzo ṱholi dza ṱuwa dza swika nḓuni ya mufumakadzi a rengisaho muvhili ane a pfi Rahaba,+ dza dzula henefho.
2 Khosi ya Yeriko ya vhudzwa u pfi: “Vhanna vha Isiraele vho ḓa fhano vhusiku u itela u ṱola shango.”
3 Khosi ya Yeriko ya rumela mulaedza kha Rahaba ya ri: “Bvisa avho vhanna vhe vha ḓa ha iwe vhane vha khou dzula nḓuni yau, ngauri vho ḓa u ṱola shango ḽoṱhe.”
4 Fhedzi onoyo mufumakadzi o vha o dzumba vhenevho vhanna vhavhili. Ngauralo, a ri: “Avho vhanna vho ḓa kha nṋe, fhedzi a thi ḓivhi uri vha bva ngafhi.
5 Vho ṱuwa ḽo no swifhala musi khoro ya muḓi i tshi vho ṱoḓou valwa. A thi ḓivhi he vha ya hone, fhedzi arali na ṱavhanya na vha tevhela, ni ḓo vha fara.”
6 (Naho zwo ralo, o vha o vha gonyisa ṱhangani, a vha dzumba vhukati ha maṱanga e a vha o ṱhophiwa henefho ṱhangani.)
7 Vhanna vho rumiwaho nga khosi vha vha tevhela nga nḓila ine ya ya mirathoni ya Mulambo wa Yorodane.+ Khoro dza valiwa musi vhenevho vhanna vha tshi tou bva.
8 Musi ṱholi dzi sa athu u eḓela, Rahaba a ya khadzo henefho ṱhangani.
9 A ri: “Ndi a zwi ḓivha uri Yehova u ḓo ni ṋea ḽeneḽi shango,+ na uri roṱhe ri khou ni ofha.+ Vhadzulapo vhoṱhe vha ḽino shango vho kulea nungo nga nṱhani haṋu,+
10 ngauri ro pfa nga ha nḓila ye Yehova a xisa ngayo maḓi a Lwanzhe Lutswuku phanḓa haṋu musi ni tshi bva Egipita,+ na zwe na zwi ita kha mahosi mavhili a Vhaamori, Sihoni+ na Ogo,+ vhe na vha fhelisa ngei seli* ha Yorodane.
11 Musi ri tshi zwi pfa, ra tshuwa, a hu na na muthu na muthihi a re na nungo nga nṱhani haṋu, Yehova Mudzimu waṋu ndi Mudzimu wa ḽiṱaḓulu na ḽifhasi.+
12 Ndi humbela uri ni nnyanele nga Yehova uri samusi ndo ni sumbedza lufuno lu sa shanduki, na inwi ni ḓo sumbedza vha muṱa wa khotsi anga lufuno lu sa shanduki, ni nṋee tshine tsha ḓo nkhwaṱhisedza uri ni ḓo ita zwe na amba.
13 Ni tea u tshidza khotsi anga, mme anga, vhana vha hashu na vhoṱhe vhane vha dzula navho, ni tea u ri tshidza uri ri si fe.”+
14 Dzenedzo ṱholi dza mu fhindula dza ri: “Ri ḓo kumedzela vhutshilo hashu ri tshi itela inwi! Arali na sa ri ambulula, ri ḓo ni sumbedza lufuno lu sa shanduki, ri ḓo fhulufhedzea kha inwi musi Yehova a tshi ri ṋea shango.”
15 Nga murahu ha zwenezwo, a vha tsitsa nga thambo vha bva nga fasiṱere, ngauri nnḓu yawe yo vha i nga thungo ha luvhondo lwa muḓi. Zwi re zwone ndi uri nnḓu yawe yo vha i henefho luvhondoni.+
16 A amba navho a ri: “Iyani dzinguni ḽa dzithavhani ni dzumbame henefho maḓuvha mararu, u itela uri vhane vha khou ni tevhela vha si ni wane. Musi vhane vha khou ni tevhela vha tshi vhuya, ni nga bvela phanḓa na lwendo lwaṋu.”
17 Vhenevho vhanna vha amba nae vha ri: “A ri nga ḓo vha na mulandu kha wonoyu muano we wa ri anisa wone+
18 tenda musi ri tshi ḓa kha ḽeneḽi shango ra wana wo vhofhelela yeneyi thambo tswuku kha fasiṱere ḽe wa ri tsitsa ngaḽo. U kuvhanganye khotsi au, mme au, vhana vha hau na vhoṱhe vha muṱa wa khotsi au nḓuni yau.+
19 Arali muṅwe a bvela nnḓa, malofha awe a ḓo vhilwa kha ṱhoho yawe, riṋe a ri nga ḓo vha na mulandu. Fhedzi arali ha huvhadzwa* a re nḓuni yau, malofha awe a ḓo vhilwa kha ṱhoho dzashu.
20 Arali wa ri ambulula,+ u ḓo vha wo ri vhofholola kha muano we wa ri anisa.”
21 Ene a fhindula a ri: “Nga zwi vhe nga yeneyo nḓila ye na amba ngayo.”
Nga zwenezwo, a vha litsha vha ṱuwa. Musi vho no ṱuwa a vhofhelela thambo tswuku kha fasiṱere.
22 Ngauralo, vha ṱuwa vha ya dzinguni ḽa dzithavhani vha dzula henefho maḓuvha mararu, u swika vhane vha khou vha tevhela vha tshi vhuya. Vhane vha khou vha tevhela vho vha vha tshi khou vha ṱoḓa nḓilani iṅwe na iṅwe, fhedzi vha si vha wane.
23 Ndi hone vhenevho vhanna vhavhili vha tshi tsa dzinguni ḽa dzithavhani, vha wela mulambo vha swika ha Yoshua murwa wa Nunu. Vha mu anetshela zwithu zwoṱhe zwe zwa itea khavho.
24 Vha amba na Yoshua vha ri: “Yehova o ri ṋea ḽeneḽo shango ḽoṱhe.+ Zwi re zwone ndi uri vhadzulapo vhoṱhe vha ḽeneḽo shango vho kulea nungo nga nṱhani hashu.”+
Ṱhaluso dzi re magumoni a siaṱari
^ Ndi thungo ya vhubvaḓuvha.
^ Kana “arali ha vhewa tshanḓa kha.”
