Yoshua 20:1-9
-
Miḓi ya vhushavhelo (1-9)
20 Yehova a amba na Yoshua a ri:
2 “Vhudza Vhaisiraele u ri: ‘Ḓinangeleni miḓi ya vhushavhelo+ samusi ndo amba na Mushe uri a ni vhudze,
3 uri muthu ane a vhulaya muṅwe a songo ḓiimisela kana a songo ita nga khole* a shavhele henefho. Yeneyo miḓi i ḓo shuma sa vhushavhelo kha inwi musi ni tshi shavha mulifhedzi wa malofha.+
4 A shavhele kha muṅwe wa yeneyo miḓi,+ a ime muṋangoni wa khoro ya muḓi,+ a vhudze vhahulwane vha wonoyo muḓi mafhungo awe. Vha tea u mu ṱanganedza henefho muḓini vha mu ṋee vhudzulo a dzule navho.
5 Arali mulifhedzi a mu pandamedza, vha songo kumedzela muvhulayi zwanḓani zwa mulifhedzi; ngauri o vhulaya muṅwe muthu a songo ita nga khole, o vha a sa mu vhengi.+
6 A dzule kha wonoyo muḓi u swika a tshi sengiswa phanḓa ha tshitshavha,+ a dzule henefho u swika tshifhe muhulu wa nga tshenetsho tshifhinga a tshi fa.+ Nga zwenezwo, muthu we a vhulaya a nga humela muḓini we a shavha a tshi bva khawo, a nga dzhena muḓini wa hawe na nḓuni yawe.’”+
7 Ngauralo, vha nanga* Kedese+ hu re ngei Galilea dzinguni ḽa thavhani dza Nafutali, Shikeme+ ngei dzinguni ḽa thavhani dza Efuraimi na Kiriate-ariba,+ hune ha vha Heburoni ngei dzinguni ḽa thavhani dza Yuda.
8 Ngei dzinguni ḽa Yorodane, vhubvaḓuvha ha Yeriko vha nanga Betsera+ ngei sogani ḽi re mudavhini kha lushaka lwa Rubeni, Ramothe+ ngei Giḽiada kha lushaka lwa Gada na Golani+ ngei Bashani kha lushaka lwa Manase.+
9 Yeneyo ya vha miḓi yo vhetshelwaho Vhaisiraele vhoṱhe na vhatsinda vha re vhukati havho, u itela uri ane a vhulaya muṅwe a songo ḓiimisela a shavhele henefho+ uri a si vhulawe nga mulifhedzi wa malofha a sa athu u sengiswa phanḓa ha tshitshavha.+
