Yoshua 8:1-35
8 Yehova a amba na Yoshua a ri: “U songo ofha kana u tshuwa.+ Dzhia maswole oṱhe u gonye u itela u lwa na muḓi wa Ai. Ndo kumedzela zwanḓani zwau khosi ya Ai, vhathu vhayo, muḓi wayo na shango ḽayo.+
2 Muḓi wa Ai na khosi yawo u u ite zwe wa ita Yeriko na khosi yawo,+ fhedzi u nga dzhia thundu yawo ye wa i thuba na zwifuwo zwawo. U rume maswole uri a lalele nga murahu ha wonoyo muḓi.”
3 Yoshua na vhanna vhoṱhe vha nndwa vha ya u lwa na Ai. Yoshua o vha o nanga vhahali vha 30 000, a vha ruma vhusiku.
4 A amba navho a ri: “Ni vha lalele nga murahu ha muḓi. Ni songo dzumbama kule na muḓi, noṱhe ni dzule no fhaṱuwa.
5 Nṋe na vhathu vhoṱhe vhane nda vha navho ri ḓo ya ro livha wonoyo muḓi, musi vha tshi ḓa u lwa na riṋe u fana na u thomani,+ ri ḓo shavha.
6 Musi vha tshi ri pandamedza, ri ḓo vha kungela kule ha muḓi, vhone vha ḓo ri: ‘Vha khou ri shavha u fana na u thomani.’+ Riṋe ri ḓo shavha.
7 Inwi ni bve hune na ḓo vha no vha lalela hone, ni thube muḓi; Yehova Mudzimu waṋu u ḓo u kumedzela zwanḓani zwaṋu.
8 Musi ni tshi tou thuba wonoyo muḓi, ni u fhise.+ Ni ite zwe Yehova a amba. Ni ite zwe nda ni laya.”
9 Yoshua a vha ruma vha ya vha vha lalela; vha dzumbama vhukati ha Bethele na Ai, vhukovhela ha Ai, ngeno Yoshua o vha o dzula na maṅwe maswole vhusiku hoṱhe.
10 Musi Yoshua o no vuwa nga matsheloni-tsheloni a kuvhanganya maswole, ene na vhahulwane vha Isiraele vha ranga phanḓa maswole vha ya Ai.
11 Vhanna vhoṱhe vha nndwa+ vhane a vha navho, vha gonya vho livha muḓini. Vho vha vho atha madennde devhula ha Ai, hu na govha vhukati havho na Ai.
12 Nga tshenetsho tshifhinga, o vha o dzhia vhanna vha ṱoḓaho u vha 5 000 a vha vhea uri a vha lalele+ vhukati ha Bethele+ na Ai, vhukovhela ha muḓi.
13 Vhathu vha atha madennde thungo ya devhula ya muḓi,+ vhaṅwe vha vha lalela vhukovhela ha muḓi,+ Yoshua a ya vhukati ha govha nga honoho vhusiku.
14 Musi khosi ya Ai i tshi tou vhona zwenezwi, yone na vhanna vha wonoyo muḓi vha ṱavhanya vha bva nga matsheloni-tsheloni a ḓuvha ḽi tevhelaho u itela uri vha lwe na Vhaisiraele huṅwe fhethu ho livhanaho na mudavhi u re sogani. Fhedzi khosi yo vha i sa zwi ḓivhi uri ho vha hu na vhathu vho i lalelaho nga murahu ha muḓi.
15 Yoshua na Vhaisiraele vhoṱhe vha ḓiita u nga vha khou shavhela thungo ya sogani.+
16 Vhathu vhoṱhe vha re muḓini vha vhidzwa uri vha ḓe vha vha pandamedze; Yoshua a vha kungela kule ha muḓi musi vha tshi khou mu pandamedza.
17 A ho ngo sala na munna na muthihi muḓini wa Ai na Bethele we a si pandamedze Vhaisiraele. Vha sia muḓi wo vulea, vha pandamedza Vhaisiraele.
18 Yehova a amba na Yoshua a ri: “Sumba thungo ya muḓi wa Ai nga pfumo ḽi re tshanḓani tshau,+ ngauri ndi ḓo u kumedzela zwanḓani zwau.”+ Yoshua a sumba thungo ya muḓi nga pfumo ḽe ḽa vha ḽi tshanḓani tshawe.
19 Musi a tshi tou imisa tshanḓa tshawe, vho lalelaho vha bva nga u ṱavhanya he vha vha vho dzumbama hone vha gidimela muḓini vha u thuba. Vha u fhisa nga mulilo.+
20 Musi vhanna vha Ai vha tshi rembuluwa, vha vhona mutsi muḓini u tshi khou dubela makoleni, vho vha vha si tshee na vhushavhelo. Vhathu vha shavhelaho thungo ya sogani vha rembulutshela vhane vha khou vha pandamedza.
21 Musi Yoshua na Vhaisiraele vhoṱhe vha tshi vhona uri vhathu vho vha lalelaho vho tanga muḓi na uri mutsi u khou duba, vha rembuluwa vha vutshela vhanna vha Ai.
22 Na vhaṅwe vha bva muḓini u itela u ṱangana navho, ngauralo Vhaisiraele vho vha vho tanga vhanna vha Ai thungo dzoṱhe, vha vha vhulaya hu si sale na muthihi we a ponyoka.+
23 Fhedzi vha fara khosi ya Ai+ i tshi kha ḓi tshila, vha i ḓisa phanḓa ha Yoshua.
24 Musi Vhaisiraele vho no fhedza u vhulaya vhadzulapo vha Ai, ngei mudavhini u re sogani he vha vha vho vha pandamedzela hone, vha vhulaya vhoṱhe nga banga hu si sale na muthu na muthihi, nga murahu ha zwenezwo Vhaisiraele vhoṱhe vha vhuyelela muḓini wa Ai, vha vhulaya vho salaho nga banga.
25 Vhoṱhe vhe vha fa nga ḽeneḽo ḓuvha, u bva kha munna u ya kha mufumakadzi, vho vha vhe 12 000, vhane vha vha vhathu vhoṱhe vha Ai.
26 Yoshua a si tsitse tshanḓa tshawe tshe tsha vha tsho fara pfumo+ u swika vhadzulapo vhoṱhe vha Ai vha tshi fheliswa.+
27 Naho zwo ralo, Vhaisiraele vho dzhia zwifuwo na thundu dza wonoyo muḓi dze dza thubiwa, u tendelana na zwe Yehova a zwi vhudza Yoshua.+
28 Yoshua a fhisa muḓi wa Ai, a u sia u shubi ḽa lini na lini+ na ṋamusi u kha ḓi vha wo ralo.
29 A fhahea khosi ya Ai kha danda* u swika ḽi tshi kovhela, nga madekwana Yoshua a ri tshitumbu tshayo tshi tsitswe kha danda.+ Vha tshi posa khoroni ya muḓi vha ṱhopha matombo nṱha hatsho, na ṋamusi a tshee hone.
30 Yoshua a fhaṱela Yehova Mudzimu wa Isiraele aḽeṱare Thavhani ya Ebali,+
31 sa zwe Mushe mushumeli wa Yehova a laya Vhaisiraele vhunga zwo ṅwaliwa buguni ya Mulayo+ wa Mushe ha pfi: “I vhe aḽeṱare ya matombo a songo vhaḓwaho nga tsimbi.”+ Khayo vha ṋekedza Yehova zwifhiwa zwa u fhiswa khathihi na zwiṱhavhelo zwa u pfumedzana.+
32 Henefho kha matombo, a ṅwala Mulayo+ we Mushe a u ṅwala phanḓa ha Vhaisiraele.+
33 Vhaisiraele vhoṱhe, vhahulwane vhavho, vhaḓinḓa na vhahaṱuli vhavho vho vha vho ima thungo dzoṱhe dza Mbulungelo phanḓa ha vhotshifhe vha Vhalevi vho hwalaho mbulungelo ya mulanga wa Yehova. Vhatsinda na vhadzulapo vho vha vhe hone henefho.+ Hafu yavho yo vha yo ima phanḓa ha Thavha ya Garitsimi, iṅwe hafu yo ima phanḓa ha Thavha ya Ebali+ (sa zwe Mushe mushumeli wa Yehova a vha laya tshifhingani tsho fhiraho),+ u itela u fhaṱutshedza vhathu vha Isiraele.
34 Nga murahu ha zwenezwo, a vhalela nṱha Mulayo+ woṱhe, phaṱhutshedzo+ na masamba,+ u tendelana na zwoṱhe zwo ṅwaliwaho buguni ya Mulayo.
35 A ho ngo vha na ipfi na ḽithihi ḽe Mushe a vhudza Yoshua ḽe a si ḽi vhalele nṱha phanḓa ha tshivhidzo tshoṱhe tsha Isiraele,+ u katela na vhafumakadzi, vhana na vhatsinda+ vha re vhukati havho.+
Ṱhaluso dzi re magumoni a siaṱari
^ Kana “muri.”
