NAA huna muthu we a vhuya a ni tswela tshiṅwe tshithu?— No ḓipfa hani?— Onoyo muthu we a tshi tswa ndi mbava, nahone a huna muthu ane a funa mbava. Ni humbula uri zwi ḓa hani uri muthu a vhe mbava? Naa u bebwa e mbava?—

Ri kha ḓi tou bva u guda uri vhathu vha bebiwa vhe na tshivhi. Nga zwenezwo roṱhe a ro ngo fhelela. Fhedzi a huna muthu ane a bebiwa e mbava. Muthu ane a vha mbava a nga kha ḓi vha a tshi bva muḓini wavhuḓi. Vhabebi vhawe, vharathu vhawe na khaladzi dzawe vha nga vha vha tshi fulufhedzea. Fhedzi arali muthu a tshi tama tshelede na zwine ya nga zwi renga, zwi nga mu ita uri a vhe mbava.

Ni humbula uri mbava ya u thoma ndi nnyi?— Kha ri ṱolisise haya mafhungo. Mufunzi Muhulu o vha a tshi ḓivha onoyo muthu musi a tshee ṱaḓulu. Yeneyo mbava yo vha i muruṅwa. Fhedzi samusi Mudzimu o vha o ita vharuṅwa vhoṱhe vho fhelela, zwo ḓa hani uri onoyo muruṅwa a vhe mbava?— Samusi ro zwi guda kha Ndima ya 8 ya yeneyi bugu, o ṱoḓa zwithu zwine zwa sa vhe zwawe. Ni a humbula uri zwenezwo zwithu zwo vha zwi mini?—

Musi Mudzimu a tshi sika munna na musadzi vha u thoma, onoyo muruṅwa o ṱoḓa uri vha mu gwadamele. O vha a si na ndugelo ya uri vha mu gwadamele. Vho vha vha tshi fanela u gwadamela Mudzimu. Fhedzi o ita uri vha mu gwadamele! Nga u ita uri Adamu na Eva vha mu gwadamele, onoyo muruṅwa o vha mbava. O vha Sathane Diabolo.

Ndi mini tshine tsha ita uri muthu a vhe mbava?— U tama zwithu zwine zwa sa vhe zwau. Lwonolwu lutamo lu nga vha luhulwane lune lwa nga ita uri vhathu vhavhuḓi vha ite zwithu zwivhi. Nga zwiṅwe zwifhinga, vhathu vhane vha vha dzimbava a vhuyi vha rembuluwa  nahone vha dovha vha ita zwithu zwavhuḓi. Muṅwe wavho o vha e muapostola wa Yesu. O vha a tshi pfi Yudasi Iskariote.

Yudasi o vha a tshi zwi ḓivha uri u tswa zwo khakhea nga ṅwambo wa uri o vha o funzwa Mulayo wa Mudzimu a tshee mutukana muṱuku. O vha a tshi zwi ḓivha uri Mudzimu o vhuya a amba e ṱaḓulu nahone a vhudza vhathu vhawe a ri: “U songo tswa.” (Ekisodo 20:15) Musi Yudasi a tshi aluwa, o ṱangana na Mufunzi Muhulu a vha muṅwe wa vhafunziwa vhawe. Nga murahu, Yesu a khetha Yudasi uri a vhe muṅwe wa vhaapostola vhawe vha 12.

Yesu o vha a tshi tshimbila na vhaapostola vhawe. Vho vha vha tshi ḽa vhoṱhe zwiḽiwa. Nahone tshelede yoṱhe ye vha vha vha tshi i wana vho vha vha tshi i longela bogisini. Yesu o ṋea Yudasi ḽeneḽo bogisi uri a ḽi ṱhogomele. Fhedzi yeneyo tshelede yo vha i si ya Yudasi. Fhedzi naa ni a ḓivha uri Yudasi o ita mini nga u ya ha tshifhinga?—

Yudasi o thoma u dzhia tshelede bogisini zwi songo tea. O vha a tshi i dzhia vhaṅwe vha sa zwi vhoni, nahone a ita na u lingedza dziṅwe nḓila uri a wane nnzhi. A thoma u humbula nga ha tshelede tshifhinga tshoṱhe. Kha ri vhone uri lutamo lwawe lwo khakheaho lwo mu ita uri a ite mini maḓuvha a si gathi Mufunzi Muhulu a sa athu vhulahwa.

Maria, khaladzi a Lazaro khonani ya Yesu, o dzhia maṅwe mapfura avhuḓi vhukuma nahone a a ḓodza milenzhe ya Yesu. Fhedzi Yudasi a gungula. Ni a ḓivha uri ndi ngani?— O amba uri eneo mapfura o vha o fanela u rengiswa nahone tshelede yao i ṋewe vhashai. Fhedzi o vha a tshi khou ṱoḓa uri hu dzheniswe tshelede nnzhi kha ḽeneḽo bogisi uri a kone u i tswa.—Yohane 12:1-6.

Yesu a vhudza Yudasi uri a songo dina Maria, we a vha e na vhuthu vhukuma. Yudasi ho ngo takalela zwe Yesu a mu vhudza, nga zwenezwo a ya kha vhotshifhe vhahulu, vhe vha vha vhe maswina a Yesu. Vho vha vha tshi ṱoḓa u fara Yesu, fhedzi vho vha vha tshi ṱoḓa u zwi ita vhusiku uri vha sa vhonwe nga vhathu.

 Yudasi a vhudza vhotshifhe a ri: ‘Ndi ḓo ni vhudza uri ni ḓo wana hani Yesu, arali na nṋea tshelede. Ni ḓo nṋea vhugai?’

Vhotshifhe vha fhindula vha ri: ‘Ri ḓo u ni ṋea mahumi mararu a maseṱha.’—Mateo 26:14-16.

Yudasi a dzhia yeneyo tshelede. Zwo vha zwi tshi tou nga u rengisela Mufunzi Muhulu vhenevho vhanna! Zwenezwo ndi zwithu zwivhi vhukuma a thi ri?— Zwenezwo ndi zwithu zwine zwa itea musi muthu a tshi vha mbava nahone a tswa tshelede. Muthu o raloho u funa tshelede u fhira vhaṅwe vhathu kana Mudzimu.

Khamusi ni nga ri: ‘Ndi nga si vhuye nda funesa tshiṅwe tshithu u fhira u funa Yehova Mudzimu.’ Ndi zwavhuḓi uri ni ḓipfa nga yeneyo nḓila. Musi Yesu a tshi khetha Yudasi uri a vhe muapostola, khamusi Yudasi o ḓipfa nga yeneyo nḓila. Vhaṅwe vhe vha vha dzimbava na vhone vha nga vha vho ḓipfa nga yeneyo nḓila-vho. Kha ri ambe nga vhaṅwe vhavho.

Muṅwe o vha e mushumeli wa Mudzimu ane a pfi Akani, we a tshila tshifhinga tshilapfu Mufunzi Muhulu a sa athu bebwa. Akani o vhona nguvho yo nakaho, tshidina tsha musuku, na tshelede ya siliva. Zwo vha zwi si zwawe. Bivhili i amba uri zwo vha zwi zwa Yehova nga ṅwambo wa uri zwo vha zwo dzhiiwa  kha maswina a vhathu vha Mudzimu. Fhedzi Akani o zwi ṱoḓa lwe a mbo ḓi zwi tswa.—Yoshua 6:19; 7:11, 20-22.

Ṱhogomelani iṅwe tsumbo. Kale-kale, Yehova o khetha Davida uri a vhe khosi ya vhathu vha Isiraele. Ḽiṅwe ḓuvha Davida a thoma u lavhelesa musadzi wa lunako ane a pfi Batseba. A ṱwa o sedza Batseba nahone a humbula nga u mu dzhia a mu isa hayani hawe uri a vhe musadzi wawe. Naho zwo ralo, o vha e musadzi wa Uria. Davida o vha o fanela u vha o ita mini?—

Davida o vha a songo fanela u dzulela u humbula nga ha Batseba. Fhedzi ho ngo ita zwenezwo. Ndi izwi-ha Davida a tshi mu dzhia a ṱuwa nae hayani. Nahone a ita uri Uria a vhulahwe. Ndi ngani Davida o ita zwenezwi zwithu zwivhi?— Ndi ngauri o dzulela u ṱoḓa musadzi wa muṅwe muthu.—2 Samuele 11:2-27.

 Nga ṅwambo wa uri Davida o ḓisola, Yehova ho ngo mu vhulaha. Fhedzi Davida o vha khakhathini khulwane. Murwa wawe ane a pfi Abesalomo, o vha a tshi khou ṱoḓa u dzhiela Davida tshidulo uri a vhe khosi. Nga zwenezwo musi vhathu vha tshi ḓa u vhona Davida, Abesalomo o vha a tshi vha kuvhatedza nahone a vha khisa. Bivhili i ri: ‘Abesalomo a tswa mbilu dza vhanna vhoṱhe vha Isiraele.’ A ita uri vhenevho vhathu vha ṱoḓe uri a vhe khosi nṱhani ha Davida.—2 Samuele 15:1-12.

Naa no no vhuya na ṱoḓa nga maanḓa tshiṅwe tshithu, u fana na Akani, Davida, na Abesalomo?— Arali tshenetsho tshithu tshi tsha muṅwe muthu, ni ḓo vha ni tshi khou tswa arali na tshi dzhia ni si na thendelo. Ni a ḓivha zwe Sathane, mbava ya u thoma, a zwi ṱoḓa?— O ṱoḓa uri vhathu vha mu gwadamele nṱhani ha u gwadamela Mudzimu. Sathane o vha a tshi khou tswa musi a tshi ita uri Adamu na Eva vha mu thetshelese.

Musi muthu e na tshiṅwe tshithu, u na ndugelo ya uri tshenetshi tshithu tshi nga shumiswa nga nnyi. Sa tsumbo, ni nga kha ḓi tamba na vhaṅwe vhana hayani hahavho. Naa zwi ḓo vha zwavhuḓi u dzhia tshiṅwe tshithu henefho muḓini na vhuya natsho hayani hahaṋu?— Ni nga tshi dzhia arali fhedzi no tendelwa nga khotsi na mme vha henefho muḓini. Arali na vhuya na tshiṅwe tshithu hayani ni songo vha humbela, zwenezwo ndi u tswa.

Ndi ngani ni tshi nga lingea uri ni tswe?— Nga ṅwambo wa uri ni khou ṱoḓa tshithu tshine tsha sa vhe tshaṋu. Naho na sa vhonwa nga muthu musi ni tshi khou tshi dzhia, ndi nnyi ane a ni vhona?— Ndi Yehova Mudzimu. Nahone ri tea u humbula uri Mudzimu ha funi muthu ane a tswa. Nga zwenezwo, u funa Mudzimu na vhahura zwi ḓo ni thusa uri ni sa vhuye na vha mbava.