NAA huna zwifhinga zwine na ḓipfa no ṱungufhala nahone ni na vhumvumvu?— Naa no no vhuya na ḓivhudzisa arali huna muthu ane a ni funa?— Vhaṅwe vhana vha a ḓivhudzisa dzenedzo mbudziso. Fhedzi Mudzimu u a fulufhedzisa: “Nṋe a thi nga U hangwi.” (Yesaya 49:15) Naa a zwi takadzi u pfa enea mafhungo?— Ee, Yehova Mudzimu u a ri funa ngangoho!

Muṅwe muṅwali wa Bivhili o ri: “Ngauri khotsi-anga na mme-anga vho nṱutshela, Yehova a nṱanganedza.” (Psalme ya 27:10) U ḓivha zwenezwo zwi nga ri khuthadza a thi ri?— Ee, Yehova u ri vhudza zwi tevhelaho: “U songo ofha; ngauri a re na iwe ndi Nṋe. . . . Ndi ḓo U khwaṱhisa.”—Yesaya 41:10, maḽeḓeretsendama ndi ashu.

Naho zwo ralo, nga zwiṅwe zwifhinga Yehova u tendela Sathane uri a ri ḓisele khakhathi. Yehova u tendela Sathane a tshi linga vhashumeli Vhawe. Diabolo o vhuya a ita uri Yesu a shengele vhukuma lwe Yesu a vhuya a lilela Yehova a ri: “Mudzimu wanga, Mudzimu wanga, wo nṱutshelela’ni!” (Mateo 27:46) Naho Yesu o vha a tshi khou shengela, o vha a tshi zwi ḓivha uri Yehova u a mu funa. (Yohane 10:17) Fhedzi Yesu o vha a tshi zwi ḓivha uri Mudzimu u tendela Sathane uri a linge vhashumeli Vhawe nahone u tendela Sathane uri a vha shengedze. Kha iṅwe ndima ri ḓo ṱalutshedza uri ndi ngani Mudzimu a tshi tendela Sathane uri a ite zwenezwi.

Musi ri tshee vhaṱuku, zwi a konḓa uri ri sa ofhe nga zwiṅwe zwifhinga. Sa tsumbo, naa no no vhuya na xela?— Naa no vha no tshuwa?— Vhana vhanzhi vha nga tshuwa. Mufunzi Muhulu o vhuya a anetshela nganea malugana na u xela. Fhedzi ho vha hu si ṅwana we a xela. Yo vha i nngu.

 Nga dziṅwe nḓila ni fana na nngu. Nga nḓila-ḓe? Ngauri nngu a si khulwane vhukuma nahone a dzi na maanḓa. Nahone dzi ṱoḓa muṅwe muthu uri a dzi ṱhogomele na u dzi tsireledza. Munna ane a lisa nngu u vhidzwa u pfi ndi mulisa.

Kha nganea yawe, Yesu o anetshela nga ha mulisa we a vha e na nngu dza ḓana. Fhedzi iṅwe nngu ya xela. I nga vha yo vha i tshi khou ṱoḓa u vhona zwi re nga seli ha tshikwara. Fhedzi nga u ṱavhanya, yeneyo nngu yo vha yo no vha kule na dziṅwe. Ni humbula uri yo ḓipfa hani musi i tshi sedza hoṱhe-hoṱhe nahone ya wana uri i yoṱhe?—

Mulisa o vha a tshi ḓo ita mini musi a tshi ṱhogomela uri iṅwe nngu yo xela? Naa o vha a tshi ḓo amba uri tenda hu yone yo khakhaho nahone a sa ḓidine nga hazwo? Kana naa o vha a tshi ḓo sia nngu dza 99 fhethu ho tsireledzaho nahone a ya u ṱoḓa yeneyo nthihi fhedzi? Naa ho vha hu tshi ṱoḓea vhuḓidini ho raloho nga ṅwambo wa nngu nthihi?— Arali no vha ni yeneyo nngu yo xelaho, naa no vha ni tshi ḓo zwi takalela uri mulisa a ni ṱoḓe?—

Mulisa o vha a tshi funa nga maanḓa nngu dzawe dzoṱhe, u katela na ye ya vha yo xela. Ndi ngazwo o ya a ṱoḓa yo xelaho. Edzani u humbula nḓila ye yeneyo nngu ye ya vha yo xela ya  takala ngayo musi i tshi vhona mulisa a tshi khou ḓa! Nahone Yesu o amba uri mulisa o vha o takala ngauri o wana nngu yawe. O i takalela u fhira nngu dza 99 dze dza vha dzi songo xela. Ndi nnyi ane a fana na onoyo mulisa kha nganea ya Yesu? Ndi nnyi ane a ri ṱhogomela u fana na mulisa ane a ṱhogomela nngu dzawe?— Yesu o amba uri ndi Khotsi awe wa ṱaḓulu. Nahone Khotsi awe ndi Yehova.

Yehova Mudzimu ndi Mulisa Muhulwane wa vhathu vhawe. U funa vhoṱhe vhane vha mu shumela, u katela na vhana vhane vha nga vhoiwe. Ha funi naho e ufhio washu a tshi vhaisala kana a tshi fheliswa. Zwi a takadza u ḓivha uri Mudzimu u a ri ṱhogomela nga maanḓa!—Mateo 18:12-14.

Naa zwa vhukuma ni a tenda kha Yehova Mudzimu?— Naa ni mu dzhia e muthu wa vhukuma?— Ndi ngoho uri ri nga si kone u vhona Yehova. Ndi ngauri ndi Muya. U na muvhili une maṱo ashu a nga si kone u u vhona. Fhedzi ndi muthu wa vhukuma, nahone a nga ri vhona. U a ḓivha musi ri tshi ṱoḓa thuso. Nahone ri nga amba nae  nga thabelo, u fana na musi ri tshi amba na muṅwe muthu kha ḽifhasi. Yehova u ṱoḓa uri ri ite zwenezwi.

Arali ni tshi ḓipfa no ṱungufhala kana ni na vhumvumvu, ni tea u ita mini?— Ambani na Yehova. Sendelani tsini nae, nahone u ḓo ni khuthadza na u ni thusa. Humbulani uri Yehova u a ni funa, naho ni tshi ḓipfa ni na vhumvumvu. Kha ri dzhie Bivhili dzashu. Kha Psalme ya 23 ri vhudzwa zwi tevhelaho, u thoma kha ndimana 1: “Yehova ndi mulisa wanga, a thi nga shayi tshithu. U ndadza mafuloni avhuḓi, u ṋyisa maḓini a vhuawelo.”

Ṱhogomelani zwine muṅwali a zwi engedza, kha ndimana 4: “Naho ndi tshi tshimbila govhani ḽa dunzi ḽa lufu, a thi ofhi vhuvhi, ngauri U na nṋe; thonga yau na mbaḓa yau ndi zwone zwi mphumudzaho.” Yeneyo ndi nḓila ine vhathu vha ḓipfa ngayo arali Mudzimu wavho e Yehova. Vha khuthadzwa musi vhe khakhathini. Naa ni ḓipfa nga yeneyo nḓila?

Samusi mulisa wa lufuno a tshi ṱhogomela sambi ḽawe, na Yehova u ṱhogomela zwavhuḓi vhathu vhawe. U vha sumbedza nḓila yavhuḓi ine vha tea u tshimbila ngayo, nahone vha mu tevhela vho takala. Naho vho sedzana na khakhathi, a vho ngo tea u ofha. Mulisa u shumisa thonga yawe kana mbaḓa yawe u tsireledza nngu kha zwipuka zwine zwa nga dzi huvhadza. Bivhili i ri vhudza nga ha nḓila ye Davida mulisa we a vha a tshee muswa, a  tsireledza ngayo nngu dzawe kha ndau na tshivhingwi. (1 Samuele 17:34-36) Nahone vhathu vha Mudzimu vha a zwi ḓivha uri Yehova u ḓo vha tsireledza-vho. Vha nga ḓipfa vho tsireledzea nga ṅwambo wa uri Mudzimu u navho.

Yehova u a funa nngu dzawe, nahone u a dzi ṱhogomela nga lufuno. Bivhili i ri: ‘U ḓo lisa nngu dzawe sa mulisa. Ngwana u ḓo dzi takula.’—Yesaya 40:11.

Naa zwi a ni takadza u ḓivha uri Yehova o tou ralo?— Naa ni a ṱoḓa u vha muṅwe wa nngu dzawe?— Nngu dzi thetshelesa ipfi ḽa mulisa wadzo. Dzi sendela tsini hawe. Naa ni a thetshelesa Yehova?— Naa ni a dzula tsini nae?— Arali na ita zwenezwo ni nga si vhuye na ofha. Yehova u ḓo vha na inwi.