U ZUWA zwi amba mini? Ni a zwi ḓivha?— Ṱhogomelani tsumbo i tevhelaho. Naa no no vhuya na lingedza u ita tshithu tshine na sa tshi kone zwavhuḓi? Khamusi u raha bola. Kana khamusi u tamba khadi. Naa huna we a ni sea a ri: “Haa! A ni koni, ndi a ni fhira”?— Onoyo muthu o vha a tshi khou zuwa.

Ni ḓipfa hani musi vhaṅwe vhathu vha tshi ita zwenezwo? Ni a zwi funa? Ni vhona u nga vhaṅwe vha ḓipfa hani musi ni tshi zuwa?— Naa ndi zwavhuḓi u vhudza muṅwe muthu uri, “Ndi a ni fhira”?— Naa Yehova u a funa vhathu vhane vha ita zwenezwo?—

Mufunzi Muhulu o vha a tshi ḓivha vhathu vhane vha humbula uri vha khwine kha vhaṅwe. Vho vha vha tshi zuwa kana u ḓikukumusa nahone vha tshi dzhiela vhaṅwe vhathu fhasi. Ḽiṅwe ḓuvha Yesu a vha anetshela iṅwe nganea u itela u vha sumbedza uri u zuwa zwo khakhea. Kha ri i thetshelese.

Nganea ya hone ndi ya Mufarisei na muthelisi. Hafhu Vhafarisei vho vha vhe vhafunzi vha vhurereli, vhe kanzhi vha vha vha tshi ḓiita u nga vho luga kana ndi vhakhethwa u fhira vhaṅwe vhathu. Mufarisei we Yesu a vha a tshi khou amba ngae kha nganea yawe o vha o ya u rabela thembeleni ya Mudzimu ngei Yerusalema.

Yesu o amba uri na muthelisi o vha o ya u rabela thembeleni. Vhathu vhanzhi vho vha vha sa funi vhathelisi. Vho vha vha tshi humbula uri vhathelisi vha ḽa tshelede yavho. Nahone ndi ngoho uri vhunzhi ha vhathelisi vho vha vha sa fulufhedzei.

Musi e thembeleni, Mufarisei a thoma u rabela Mudzimu a ri: ‘Mudzimu,  ndi a u livhuha ngauri a thi muitazwivhi u fana na vhaṅwe vhathu. A thi fhuri vhathu nahone a thi iti zwithu zwivhi. A thi fani na houḽa muthelisi o imaho hafhaḽani. Ndi muthu o lugaho. Ndi ḓidzima zwiḽiwa luvhili nga vhege u itela uri ndi vhe na tshifhinga tshinzhi tsha u humbula nga iwe. Nahone ndi bvisa tshafumi tsha zwithu zwoṱhe zwine nda vha nazwo thembeleni.’ Onoyo Mufarisei o vha a tshi humbula uri o vha e khwine u fhira vhaṅwe a thi ri?— Nahone zwenezwo a zwi vhudza na Mudzimu.

Fhedzi muthelisi o vha a songo ralo. Musi a tshi rabela ho ngo sedza ṱaḓulu. O vha o imela kule o kotamisa ṱhoho yawe. Muthelisi o ḓisola vhukuma nga nṱhani ha zwivhi zwawe, nahone a ḓirwa khana nga ṅwambo wa u pfa vhuṱungu. Ho ngo lingedza u vhudza Mudzimu uri o luga lungafhani. Nṱhani hazwo, o rabela a ri: ‘Mudzimu, nkhangwele ṋne muitazwivhi.’

Ni humbula uri ndi ufhio kha vhenevha vhanna we a takadza Mudzimu? Naa ndi Mufarisei, we a humbula uri o luga? Kana ndi muthelisi, we a ḓisola nga ṅwambo wa zwivhi zwawe?—

Yesu o amba uri muthelisi ndi ene we a takadza Mudzimu. Ndi ngani? Yesu o ri: ‘Ngauri ane a lingedza u ḓihudza u fhira vhaṅwe vhathu u ḓo ṱukufhadzwa. Fhedzi ane a ḓiṱukufhadza u ḓo huliswa.’—Luka 18:9-14.

Yesu o vha a tshi khou funza mini kha nganea yawe?— O vha a tshi khou funza uri zwo khakhea u humbula uri ri khwine u fhira vhaṅwe  vhathu. Ri nga kha ḓi sa amba uri ri khwine u fhira vhaṅwe vhathu, fhedzi ri nga kha ḓi sumbedza uri ri humbula uri ri khwine u fhira vhaṅwe vhathu nga nḓila ine ra ita ngayo zwithu. Naa no no vhuya na zwi ita zwenezwo?— Ṱhogomelani tsumbo ya muapostola Petro.

Musi Yesu a tshi vhudza vhaapostola vhawe uri vha ḓo mu ṱutshela musi a tshi farwa, Petro o zuwa a ri: ‘Naho vhoṱhe vha u ṱutshela, nṋe ndi nga si vhuye nda u ṱutshela!’ Fhedzi Petro o vha o khakha. O vha a tshi ḓifulufhela vhukuma. O ṱutshela Yesu. Naho zwo ralo, o vhuya samusi ri tshi ḓo zwi vhala kha Ndima ya 30 ya heyi bugu.—Mateo 26:31-33.

Kha ri ite tsumbo nga zwithu zwine zwa nga itea musalauno. Kha ri ri ni tshikoloni, inwi na ane na dzhena nae kilasini ni khou vhudziswa mbudziso. Hu pfi mini arali ni tshi kona u fhindula nga u ṱavhanya, fhedzi ene a sa koni? Ee, ni a takala musi ni tshi ḓivha phindulo. Fhedzi naa zwi ḓo vha zwavhuḓi u ḓivhambedza na onoyo muthu ane a sa kone u fhindula nga u ṱavhanya?— Naa ndi zwavhuḓi u ḓiita uri ni vhonale ni wa khwine nga u ita uri ene a vhonale a tshi nga ndi tsilu?

Zwenezwo ndi zwe Mufarisei a zwi ita. O zuwa a ri ene o vha e khwine u fhira muthelisi. Fhedzi Mufunzi Muhulu o amba uri Mufarisei o vha khakha. Ndi ngoho uri muthu a nga kona u ita tshiṅwe tshithu nga nḓila ya khwine u fhira muṅwe. Fhedzi zwenezwo a zwi ambi uri ndi wa khwine.

Nga zwenezwo, arali ro ṱalifha u fhira muṅwe muthu, naa ndi zwavhuḓi uri ri zuwe ngazwo?— Humbulani nga hazwo. Naa maluvhi ashu ro tou ḓiitela?— Hai, Mudzimu ndi ene o ṋeaho muṅwe na muṅwe washu maluvhi. Nahone vhunzhi ha zwithu zwine ra zwi ḓivha ro zwi guda kha muṅwe muthu. Zwenezwo zwithu ri nga vha ro zwi vhala kha bugu. Kana khamusi ro zwi pfa kha muṅwe muthu. Naho ro kona u pfesesa zwiṅwe zwithu nga riṋe vhaṋe, ro zwi kona hani?— Ee, nga u shumisa maluvhi e Mudzimu a ri ṋea one.

 Musi muthu a tshi ḓidina vhukuma, ndi zwavhuḓi uri ni mu vhudze maipfi ane a ḓo mu ṱuṱuwedza. Mu vhudzeni uri ni a takalela zwe a zwi ita. Khamusi ni nga mu thusa uri a khwinise. Zwenezwo ndi zwine na ḓo ṱoḓa uri vhathu vha ni itele zwone a thi ri?—

Vhaṅwe vhathu vha na maanḓa u fhira vhaṅwe. Hu pfi mini arali ni na maanḓa u fhira murathu waṋu kana khaladzi aṋu? Naa ni fanela u zuwa?— Hai. Zwine zwa ri thusa uri ri vhe na maanḓa ndi zwiḽiwa zwine ra zwi ḽa. Nahone Mudzimu u ita uri hu vhe na ḓuvha nahone hu ṋe mvula na zwoṱhe zwine zwa ṱoḓea u itela uri zwiḽiwa zwi mele a thi ri?— Nga zwenezwo, ri fanela u livhuha Mudzimu arali ri na maanḓa.—Mishumo 14:16, 17.

A huna na muthihi washu ane a ṱoḓa u pfa muthu a tshi khou zuwa a thi ri?— Kha ri humbule maipfi a Yesu: ‘Zwine na funa vhathu vha tshi ni ita, na inwi ni vha ite zwenezwo.’ Arali ra ita zwenezwo, ri nga si vhuye ra fana na Mufarisei we a zuwa kha nganea ye ya anetshelwa nga Mufunzi Muhulu.—Luka 6:31.

Muṅwe muthu o vhuya a shumisa ipfi ḽine ḽa ri wavhuḓi a tshi vhidza Yesu. Naa  Mufunzi Muhulu o ri, ‘Ee, ndi wavhuḓi’?— Hai, ho ngo ralo. Nṱhani hazwo, o ri: “A huna wavhuḓi arali e si Mudzimu fhedzi.” (Marko 10:18) Naho Mufunzi Muhulu o vha o fhelela, ho ngo zuwa. Nṱhani hazwo, o livhisa thendo dzoṱhe kha Yehova, Khotsi awe.

Naa huna ane ra nga zuwa nga hae?— Ee, u hone. Ri nga zuwa nga ha Musiki washu, Yehova Mudzimu. Musi ri vhona u kovhela ha ḓuvha ho nakaho kana zwiṅwe zwithu zwi mangadzaho zwe a zwi sika, ri nga vhudza muṅwe muthu ra ri, ‘Hezwi zwo itwa nga Yehova, Mudzimu washu a mangadzaho!’ Tshifhinga tshoṱhe kha ri ḓiimisele u amba nga ha zwithu zwavhuḓi zwe Yehova a zwi ita na zwine a kha ḓi ḓo zwi ita tshifhingani tshi ḓaho.