RI NGA ita mini u itela u takadza Mudzimu? Naa huna zwine ra nga mu ṋea zwone?— Yehova u ri: “Dziphukha dzoṱhe dza shango ndi dzanga.” U dovha a ri: “Maseṱha na musuku ndi zwanga.” (Psalme ya 24:1; 50:10; Hagai 2:8) Fhedzi huna tshiṅwe tshithu tshine ra nga tshi ṋea Mudzimu. Tshenetsho tshithu ndi mini?—

Yehova u ri tendela uri ri khethe uri ri ḓo mu shumela kana a ri nga mu shumeli. Ha ri kombetshedzi uri ri ite zwine a ṱoḓa ri tshi zwi ita. Kha ri lingedze u vhona uri ndi ngani Mudzimu o ri ita uri ri khethe arali ri tshi ḓo mu shumela kana ri sa ḓo mu shumela.

Khamusi ni a ḓivha uri robotho ndi mini. Ndi mutshini wo itwaho uri u ite tshiṅwe na tshiṅwe tshine muṋe wawo a ṱoḓa u tshi tshi ita. Nga zwenezwo robotho a i koni u ḓikhethela. Yehova o vha a tshi nga vha o ri ita roṱhe uri ri nge dzirobotho. O vha a tshi nga vha o ri ita uri ri ite fhedzi zwine a ṱoḓa ri tshi zwi ita. Fhedzi Mudzimu ho ngo ita zwenezwo. Ni a zwi ḓivha uri ndi ngani?— Zwiṅwe zwitambiswa zwi nga dzirobotho. Musi zwi tshi puṱedzwa, zwi ita zwine muiti wazwo a ṱoḓa zwi tshi zwi ita. No no vhuya na vhona tshitambiswa tshine tsha nga tshenetsho?— Kanzhi vhathu vha a  neta u tambisa tshitambiswa tshine tsha ita zwe tsha dzudzanyelwa u zwi ita. Mudzimu ha ṱoḓi ri tshi mu thetshelesa zwa tou nga ri robotho dzo dzudzanyelwaho u mu shumela. Yehova u ṱoḓa ri tshi mu shumela ngauri ri a mu funa na ngauri ri ṱoḓa u mu thetshelesa.

Ni humbula uri Khotsi ashu wa ṱaḓulu u ḓipfa hani musi ri tshi mu thetshelesa ngauri ri a zwi fu-na?— Edzani u mmbudza, nḓila ine na ḓifara ngayo i kwama hani vhabebi vhaṋu?— Bivhili i amba uri ṅwana wa vhuṱali “u takadza khotsi-awe” fhedzi ṅwana wa tsilu “ndi ma-ḽa-mbilu a mme-awe.” (Mirero 10:1) Naa no no zwi ṱhogomela uri musi ni tshi ita zwine mme aṋu na khotsi aṋu vha ni humbela uri ni zwi ite, zwi a vha takadza?— Fhedzi vha ḓipfa hani musi ni sa vha thetshelesi?—

Kha ri humbule nga Yehova, Khotsi ashu wa ṱaḓulu. U ri vhudza nḓila ine ra nga mu takadza ngayo. Dzhiani Bivhili yaṋu nahone ni vule kha Mirero 27:11. Henefho Mudzimu u khou amba na riṋe, u ri: “Ṅwana’nga, ṱalifha, U takadze mbilu yanga; ndi kone u hanedza vha u nnyadza.” (Maḽeḓeretsendama ndi ashu.) Naa ni a zwi ḓivha uri u nyadza muṅwe zwi amba mini?— Muthu a nga ni nyadza nga u ni sea na nga u amba uri a ni koni u ita zwe na amba uri ni a zwi kona. Sathane u nyadza hani Yehova?— Kha ri vhone.

Humbulani uri kha Ndima ya 8 ya yeneyi bugu ro guda uri Sathane  u ṱoḓa u vha wa U Thoma nahone u ṱoḓa uri muṅwe na muṅwe a mu thetshelese. Sathane u amba uri vhathu vha shumela Yehova fhedzi ngauri Yehova u ḓo vha ṋea vhutshilo vhu sa fheli arali vha mu shumela. Nga murahu ha musi Sathane o no ita uri Adamu na Eva vha si thetshelese Yehova, Sathane o pikisana na Mudzimu. O vhudza Mudzimu a ri: ‘Vhathu vha u shumela nga ṅwambo wa zwine vha zwi wana kha iwe. Nṋee tshibuli, ndi ḓo ita uri muṅwe na muṅwe a ṱutshele kule na iwe.’

Ndi ngoho uri eneo maipfi ho ngo ṅwalwa nga yeneyo nḓila Bivhilini. Fhedzi musi ri tshi vhala nga ha muṅwe munna ane a pfi Yobo, zwi khagala uri Sathane o vhudza Mudzimu maipfi a ngaho eneo. Zwo vha zwi zwa ndeme vhukati ha Sathane na Yehova u ḓivha uri Yobo o vha a tshi ḓo fulufhedzea kha Mudzimu kana o vha sa ḓo fulufhedzea. Kha ri vule Bivhili dzashu kha Yobo ndima ya 1 na 2 u itela u vhona zwo iteaho.

Kha Yobo ndima ya 1 ṱhogomelani uri Sathane u henengei ṱaḓulu musi vharuṅwa vha tshi ḓa u vhona Yehova. Nga  zwenezwo Yehova u vhudzisa Sathane a ri: “Naa iwe U bva ngafhi?” Sathane a tshi fhindula a amba uri o vha a tshi khou mona-mona na ḽifhasi. Nga zwenezwo Yehova a vhudzisa a ri: ‘Naa wo zwi vhona uri Yobo u a ntshumela nahone ha iti zwithu zwivhi?’—Yobo 1:6-8.

Sathane a mbo ḓi hanedza nga u ṱavhanya. ‘Yobo u gwadamela iwe fhedzi ngauri ha na vhuleme. Arali wa litsha u mu tsireledza nahone wa si tsha mu fhaṱutshedza, u ḓo u sema.’ Nga zwenezwo Yehova a fhindula a ri: ‘Zwo luga, Sathane, u nga ita tshiṅwe na tshiṅwe tshine wa funa khae, fhedzi u songo mu vhaisa.’—Yobo 1:9-12.

Sathane o ita mini?— O ita uri vhathu vha tswe kholomo na donngi dza Yobo na u vhulaha vhalisa vhadzo. Nga murahu ha zwenezwo, lupenyo lwa rwa, lwa vhulaha nngu na vhalisa vhadzo. Nga murahu, ha ḓa vhathu vha tswa dzigamela nahone vha vhulaha vhalisa vhadzo. Mafheleloni, Sathane a ita uri ḓumbu ḽi wise nnḓu ye ya vha i na vhana vha Yobo vha fumi, nahone vha fa vhoṱhe. Hu sa londwi zwenezwi zwoṱhe, Yobo a bvela phanḓa a tshi shumela Yehova.—Yobo 1:13-22.

Musi Yehova a tshi dovha a vhona Sathane, Yehova o amba uri Yobo u kha ḓi fulufhedzea. Sathane a hanedza, a ri: ‘Arali wa ntendela uri ndi vhaise muvhili wawe, u  ḓo u sema.’ Nga zwenezwo Yehova a tendela uri Sathane a vhaise muvhili wa Yobo, fhedzi a mu sevha uri a si vhulahe Yobo.

Sathane a ita uri muvhili woṱhe wa Yobo u vhe na zwilonda. Zwo vha zwi tshi nukha nga nḓila ye ha sa vhe na muthu we a vha a tshi nga sendela tsini hawe. Na musadzi wa Yobo a mu vhudza a ri: “Ṱalá Yehova, U kone u fa!” Vhane vha ḓiita khonani dza Yobo vho mu dalela nahone vha ṋaṋisa vhuṱungu hawe nga u amba uri o welwa nga dzenedzi khombo dzoṱhe nge a ita zwithu zwivhi. Naho zwo ralo, hu sa londwi khakhathi na vhuṱungu hoṱhe he Sathane a vhu ḓisela Yobo, Yobo o bvela phanḓa a tshi shumela Yehova nga u fulufhedzea.—Yobo 2:1-13; 7:5; 19:13-20.

Ni humbula uri u fulufhedzea ha Yobo ho ita uri Yehova a ḓipfe hani?— Ho mu takadza ngauri Yehova o vhudza Sathane a ri: ‘Sedzani Yobo! U ntshumela nga ṅwambo wa uri u a zwi funa.’ Naa ni ḓo nga Yobo, muthu ane Yehova a nga mu shumisa sa tsumbo u itela u sumbedza uri Sathane ndi muzwifhi?— Vhukuma ndi ndugelo u sumbedza Sathane uri a nga si kone u ita uri muṅwe na muṅwe a sa shumele Yehova. Vhukuma Yesu o zwi dzhia zwi ndugelo.

Mufunzi Muhulu ho ngo vhuya a tendela Sathane a tshi mu ita uri A ite zwithu zwo khakheaho. Edzani u humbula nḓila ye tsumbo yawe ya takadza ngayo Khotsi awe! Yehova o vha a tshi nga sumba Yesu nahone a fhindula Sathane a ri: ‘Sedza Murwa wanga! O fulufhedzea tshoṱhe kha nṋe ngauri u a mpfuna!’ Hafhu, humbulani nga ha nḓila ye Yesu a takadza ngayo mbilu ya Khotsi awe. Nga ṅwambo wa ḽeneḽo dakalo, Yesu o konḓelela lufu kha danda ḽa tshengedzo.—Vha-Heberu 12:2.

Naa ni ṱoḓa u fana na Mufunzi washu Muhulu nahone na takadza Yehova?— Nga zwenezwo bvelani phanḓa ni tshi guda nga ha zwine Yehova a zwi ṱoḓa, nahone ni mu takadze nga u zwi ita!