ḼIṄWE ḓuvha Yesu o dalelwa nga muṅwe munna. Onoyo munna o vha a tshi zwi ḓivha uri Yesu o ṱalifha vhukuma, ndi izwi-ha a tshi mu vhudzisa a ri: ‘Mufunzi, vhudza mukomana wanga uri a nkovhele zwithu zwine a vha nazwo.’ Onoyo munna o vhona u nga o vha o fanela u ṋewa zwiṅwe zwa zwenezwo zwithu.

Arali no vha ni Yesu, no vha ni tshi ḓo vha no ri mini?— Yesu o zwi vhona uri onoyo munna u na vhuleme. Fhedzi vhuleme ha hone ho vha vhu si ha uri o vha a si na zwe mukomana wawe a vha e nazwo. Vhuleme ha onoyo munna ho vha hu uri o vha a sa ḓivhi zwine zwa vha zwa ndeme ngangoho vhutshiloni.

Kha ri humbulusise nga haya mafhungo. Ndi mini tshine tsha fanela u vha tsha ndeme vhukuma kha riṋe? Naa ndi u vha na zwitambiswa zwavhuḓi, zwiambaro zwiswa, kana zwithu zwine zwa nga zwenezwo?— Hai, huna tshithu tshine tsha vha tsha ndeme vhukuma u fhira zwenezwo. Nahone yeneyi ndi ngudo ye Yesu a vha a tshi ṱoḓa u i funza. O amba nga ha mafhungo a munna we a hangwa Mudzimu. Ni nga takalela u a pfa?—

Hoyu munna o vha o pfuma vhukuma. O vha e na tsimu na maḓulu. Zwiliṅwa zwawe zwo vha zwo mela zwavhuḓi. Maḓulu awe o vha o no ḓala hu si tsheena fhethu hune a nga vhea hone zwiliṅwa zwawe. Zwino o vha a tshi ḓo ita mini? O ḓivhudza a ri: ‘Ndi ḓo thutha maḓulu anga nda  fhaṱa mahulwane. Nga murahu ha zwenezwo nda kuvhanganyela mavhele anga na thundu yanga kha enea maḓulu maswa.’

Onoyo munna wa mupfumi o humbula uri u ita zwenezwo ndi vhuṱali. O vha a tshi humbula uri o ṱalifha vhukuma nge a kuvhanganya zwithu zwinzhi. O ḓivhudza a ri: ‘Ndi na zwithu zwinzhi zwavhuḓi zwe nda zwi vhea. Zwi ḓo nthusa miṅwaha minzhi. Zwino ndi nga ḓigeḓa. Ndi ḓo ḽa, nda nwa, nahone nda ḓiphina.’ Fhedzi nḓila ye onoyo munna wa mupfumi a humbula ngayo yo vha yo khakhea. Ni a ḓivha uri o vha o khakha ngafhi?— O vha a tshi khou humbula nga ha ene muṋe fhedzi na u ḓitakadza hawe. O hangwa Mudzimu.

Ndi izwi-ha Mudzimu a tshi amba na onoyo munna wa mupfumi. A ri: ‘Tsilu ḓiwe. U ḓo fa madekwana ano. Zwe wa zwi shuma zwi ḓo vha zwa nnyi?’ Naa onoyo munna o pfumaho o vha a tshi nga shumisa zwithu zwawe musi o no fa?— Hai, zwo vha zwi tshi ḓo dzhiiwa nga muṅwe muthu. Yesu a ri: “Ndi zwine zwa ḓo itwa uyo a kuvhanganyaho lupfumo á sa pfumi Mudzimuni.”—Luka 12:13-21.

 A thi ri a ri ṱoḓi u fana na onoyo mupfumi?— Ndivho yawe khulwane vhutshiloni ho vha hu u wana zwithu zwi vhonalaho. Zwenezwo zwo vha zwo khakhea. Misi yoṱhe o vha a tshi ṱoḓa zwinzhi. Fhedzi o vha a songo ‘pfuma Mudzimuni.’

Vhathu vhanzhi vha fana na onoyo munna wa mupfumi. Misi yoṱhe vha ṱoḓa zwithu zwinzhi. Fhedzi hezwi zwi nga bveledza vhuleme vhuhulwane. Sa tsumbo, ni na zwitambiswa a thi ri?— Ndi zwifhio zwiṅwe zwitambiswa zwine na vha nazwo? Edzani u mmbudza.— Ni ḓo ita mini musi muṅwe wa khonani dzaṋu e na bola kana mupopi kana tshiṅwe tshitambiswa tshine na sa vhe natsho? Naa zwi ḓo vha zwavhuḓi uri ni lilele vhabebi vhaṋu uri vha ni rengele?—

Hu nga kha ḓi vha na zwifhinga zwine tshitambiswa tsha vhonala tshi tsha ndeme vhukuma. Fhedzi hu itea mini ngatsho nga murahu ha tshifhinga?— Tshi a ṱahala. Tshi nga kha ḓi pwashea, na sa tsha tshi ṱoḓa na luthihi. Ni na tshithu tsha ndeme tshine tsha fhira zwitambiswa. Tshenetsho tshithu ni a tshi ḓivha?—

Ndi vhutshilo haṋu. Vhutshilo haṋu ndi ha ndeme vhukuma ngauri arali ni si naho, ni nga si kone u ita tshithu. Fhedzi uri ni bvele phanḓa ni tshi  tshila ni fanela u ita zwine zwa takadza Mudzimu a thi ri?— Nga zwenezwo, ri songo fana na uḽa munna wa mupfumi wa tsilu, we ra amba ngae, we a hangwa Mudzimu.

A si vhana fhedzi vhane vha nga ita zwithu zwa vhutsilu u fana na uḽa munna wa mupfumi. Na vhathu vhanzhi vhahulwane vha a ita zwenezwo. Vhaṅwe vhavho vha ṱoḓa zwinzhi misi yoṱhe u engedza kha zwine vha vha nazwo. Vha nga kha ḓi vha vhe na zwiḽiwa zwo eḓanaho, zwiambaro, na fhethu ha u dzula. Fhedzi vha ṱoḓa zwithu zwinzhi. Vha ṱoḓa zwiambaro zwinzhi. Nahone vha ṱoḓa nnḓu khulwane. Hezwi zwithu zwi ṱoḓa tshelede. Nga zwenezwo vha shuma nga maanḓa u itela u wana tshelede nnzhi. Nahone musi vha tshi wana tshelede nnzhi, vha ḓi ṱoḓa nnzhi.

Vhaṅwe vhathu vhahulwane vha dzula vha tshi khou shuma u itela uri vha wane tshelede lune vha sa vhe na tshifhinga tsha u ṱwa na miṱa yavho. Nahone a vha ṋei Mudzimu tshifhinga. Naa tshelede yavho i nga ita uri vha tshile?— Hai. Naa vha nga shumisa tshelede yavho musi vho no fa?— Hai. Ndi nga ṅwambo wa uri vhafu a vha koni u ita tshithu na tshithihi.—Muhuweleli 9:5, 10.

Naa izwi zwi amba uri u vha na tshelede zwo khakhea?— Hai. Ri nga renga zwiḽiwa na zwiambaro nga tshelede. Bivhili i amba uri tshelede i a tsireledza. (Muhuweleli 7:12) Fhedzi arali ri tshi funa tshelede, ri ḓo vha na vhuleme. Ri ḓo nga uḽa munna wa mupfumi wa tsilu we a ḓikuvhanganyela lupfumo, fhedzi a songo pfuma Mudzimuni.

Zwi amba mini u pfuma Mudzimuni?— Zwi amba u vhea Mudzimu u thoma vhutshiloni hashu. Vhaṅwe vhathu vha amba uri vha tenda kha Mudzimu. Vha humbula uri hu ṱoḓea lutendo fhedzi. Fhedzi naa vho pfuma Mudzimuni?— Hai, vha nga munna o pfumaho we a hangwa Mudzimu.

Yesu ho ngo vhuya a hangwa Khotsi awe wa ngei ṱaḓulu. Ho ngo lingedza u ita tshelede nnzhi. Nahone o vha a si na zwithu zwinzhi zwi vhonalaho. Yesu o vha a tshi ḓivha tshithu tshine tsha vha tsha ndeme ngangoho vhutshiloni. Tshithu tsha hone ni a tshi ḓivha?— Ndi u pfuma Mudzimuni.

Edzani u mmbudza, ri nga pfuma hani Mudzimuni?— Ri nga pfuma  Mudzimuni nga u ita zwine zwa mu takadza. Yesu o ri: “Ndi dzula ndi tshi ita zwi mu takadzaho.” (Yohane 8:29) Mudzimu u a takala musi ri tshi ita zwithu zwine a ṱoḓa ri tshi zwi ita. Edzani mmbudza, ndi zwithu zwifhio zwine na nga zwi ita u itela u takadza Mudzimu?— Ni nga vhala Bivhili, na ya miṱanganoni ya Vhukriste, na rabela Mudzimu, na thusa vhaṅwe uri vha gude nga hae. Zwenezwo ndi zwithu zwa ndeme ngangoho vhutshiloni hashu.

Ngauri Yesu o vha o pfuma Mudzimuni, Yehova o mu ṱhogomela. O ṋea Yesu malamba a vhutshilo vhu sa fheli. Arali ri tshi fana na Yesu, Yehova u ḓo ri funa nahone a ri ṱhogomela-vho. Nga zwenezwo, kha ri fane na Yesu nahone ri songo vhuya ra fana na uḽa munna o pfumaho we a hangwa Mudzimu.