MUDZIMU o vhea Adamu na Eva tsimuni ya Edeni. Naho vho fa nga ṅwambo wa u sa thetshelesa, Mudzimu o ita uri zwi konadzee uri vhana vhavho, u katela na riṋe ṋamusi, ri tshile nga u sa fheli Paradisoni. Bivhili i fulufhedzisa uri: “Vha u ḓo vha vhaṋe vha shango ndi vhavhuya, ndi vhone vha u ḓo [tshila] khaḽo’ lini na lini.”—Psalme ya 37:29.

Bivhili i ri vhudza nga ha “ḽiṱaḓulu ḽiswa” na “ḽifhasi ḽiswa.” (Yesaya 65:17; 2 Petro 3:13) Mivhuso ya zwino ya vhathu ndi “maṱaḓulu,” fhedzi Yesu Kristo na vhane vha ḓo vhusa nae ṱaḓulu vha ḓo vhumba “maṱaḓulu maswa.” Zwi ḓo takadza lungafhani musi maṱaḓulu maswa, ane a vha muvhuso wo lugaho wa Mudzimu, a tshi vhusa ḽifhasi ḽoṱhe!

Nga zwenezwo-ha, “ḽifhasi ḽiswa” ndi mini?— Ḽifhasi ḽiswa hu ḓo vha hu vhathu vho lugaho vhane vha funa Yehova. Hafhu musi Bivhili i tshi amba nga ha “ḽifhasi,” nga zwiṅwe zwifhinga i vha i tshi khou amba vhathu vhane vha tshila kha ḽifhasi, hu si mavu. (Genesi 11:1; Psalme ya 66:4; 96:1) Nga zwenezwo, vhathu vhane vha vha ḽifhasi ḽiswa vha ḓo tshila kha ḽino ḽifhasi.

Nga tshenetsho tshifhinga ḽino shango ḽa vhathu vhavhi ḽi ḓo vha ḽi si tsheeho. Humbulani uri Maḓi Mahulu a misini ya Noaxe o fhelisa shango ḽivhi, zwine zwa amba vhathu. Nahone samusi ro zwi guda, ḽino shango ḽivhi ḽi ḓo fheliswa nga Haramagedo. Zwino kha ri vhone uri zwi ḓo vha hani u tshila shangoni ḽiswa ḽa Mudzimu nga murahu ha Haramagedo.

Naa ni a ṱoḓa u tshila tshoṱhe Paradisoni shangoni ḽiswa ḽa  Mudzimu ḽa mulalo?— A huna dokotela ane a nga ita uri ri tshile tshoṱhe. A huna philisi ine ya nga ita uri ri sa fe. Nḓila nthihi fhedzi ine ra nga kona u tshila tshoṱhe ndi nga u sendela tsini na Mudzimu. Nahone Mufunzi Muhulu u ri vhudza nḓila ine ra nga zwi ita ngayo zwenezwo.

Kha ri dzhie Bivhili dzashu roṱhe nahone ri vule kha Yohane ndima 17 ndimana 3. Henefho ri wana maipfi a Mufunzi Muhulu ane a ri: “Vhutshilo vhu sá fheli ndi uri vha ḓivhe iwe, U re Mudzimu nga ngoho Ú woṱhe; vha ḓivhe na Yesu Kristo.”

Yesu o amba uri ri tea u ita mini uri ri kone u tshila nga u sa fheli?— Tsha u thoma, ri tea u dzhenisa nḓivho nga Khotsi ashu wa ṱaḓulu, Yehova, na nga Murwa wawe, we a kumedza vhutshilo hawe a tshi itela riṋe. Hezwi zwi amba uri ri tea u guda Bivhili. Heyi bugu, Gudani Kha Mufunzi Muhulu, i ri thusa u ita nga u ralo.

Fhedzi u guda nga ha Yehova zwi ḓo ri thusa hani uri ri tshile nga hu sa fheli?— Samusi ri tshi fanela u ḽa zwiḽiwa ḓuvha ḽiṅwe na ḽiṅwe, ri tea u guda nga ha Yehova ḓuvha ḽiṅwe na ḽiṅwe. Bivhili i ri: “Muthu ha tshili nga vhuswa fhedzi; u tshila nga maipfi oṱhe a bvaho mulomoni wa Mudzimu.”—Mateo 4:4.

Hafhu ri tea u dzhenisa nḓivho nga Yesu Kristo ngauri Mudzimu o rumela Murwa wawe uri a bvise zwivhi zwashu. Bivhili i ri: “Huno a huna u tshidzwa kha muṅwe.” Nahone Bivhili i dovha ya ri: “A tendaho Murwa u na vhutshilo vhu sá fheli.” (Mishumo 4:12; Yohane 3:36) ‘U tenda’ kha Yesu zwi amba mini?— Zwi amba uri ri fanela fulufhela ngangoho kha Yesu nahone ri zwi ḓivhe uri ri nga si tshile nga hu sa fheli nga nnḓa hae. Naa ri a zwi tenda zwenezwo?— Arali ri tshi zwi tenda, ri ḓo bvela phanḓa u guda kha Mufunzi Muhulu ḓuvha ḽiṅwe na ḽiṅwe, nahone ri ḓo ita zwine a amba.

Iṅwe nḓila yavhuḓi ya u guda kha Mufunzi Muhulu ndi u vhala heyi bugu lunzhi-lunzhi na u sedza zwifanyiso zwayo zwoṱhe na u  elekanya nga hazwo. Lingedzani u fhindula mbudziso dzi tshimbidzanaho na zwenezwo zwifanyiso. Dovhani ni vhale yeneyi bugu na mme aṋu kana khotsi aṋu. Arali vhabebi vhaṋu vhe siho, i vhaleni na vhaṅwe vhathu vhahulwane na vhaṅwe vhana. Naa zwi nga si takadze arali na nga thusa vhaṅwe u guda kha Mufunzi Muhulu zwine vha fanela u ita uri vha tshile nga hu sa fheli shangoni ḽiswa ḽa Mudzimu?—

Bivhili i ri vhudza uri: “Shango ḽi a lovha.” Fhedzi Bivhili i dovha ya ṱalutshedza nḓila ine ra nga tshila ngayo nga hu sa fheli shangoni ḽiswa ḽa Mudzimu. I ri: “Ane a ita zwiné Khotsi a zwi funa u ḓi dzula e hone na lini na lini.” (1 Yohane 2:17) Ngauralo, ri nga tshila hani nga hu sa fheli shangoni ḽiswa ḽa Mudzimu?— Nga u dzhenisa nḓivho nga Yehova na Yesu, Murwa wawe a mu funaho. Fhedzi ri fanela u dovha ra ita kana u tshila u tendelana na zwine ra zwi guda. U nga ri u vhala haṋu heyi bugu zwi nga ni thusa u ita nga u ralo.