ARALI ra fa, naa Mudzimu u ḓo ṱoḓa u ri vusa vhafuni uri ri dovhe ri tshile?— Munna o lugaho ane a pfi Yobo o vha a tshi tenda uri Mudzimu u a ṱoḓa u ita zwenezwo. Nga zwenezwo, musi Yobo a tshi humbula uri u tsini na u fa, o vhudza Mudzimu a ri: ‘U ḓo mmbidza nda aravha.’ Yobo o amba uri Yehova Mudzimu u ḓo ṱuvha, kana u ḓo ṱoḓa nga maanḓa u mu vusa.—Yobo 14:14, 15.

Yesu u nga Yehova Mudzimu, Khotsi awe. Yesu u ṱoḓa u ri thusa. Musi muṅwe munna a re na mapele a tshi amba nae uri, “Arali U tshi funa U nga mphodza,” Yesu o fhindula a ri: “Ndi a funa.” (Maḽeḓeretsendama ndi ashu.) Nahone a fhodza onoyo munna we a vha e na mapele.—Marko 1:40-42.

Yesu o guda kha Khotsi awe u funa vhana. Kha zwiṅwe zwiitea zwivhili kale, Yehova o shumisa vhashumeli vhawe u vusa vhana vhaṱuku vhafuni. Elia o luvhelela Yehova uri a vuse murwa wa muṅwe mufumakadzi we a itela Elia zwithu zwavhuḓi. Nahone Yehova a ita zwenezwo. Yehova o dovha a shumisa mushumeli wawe Elisa uri a vuse mutukana muṱuku.—1 Dzikhosi 17:17-24; 2 Dzikhosi 4:32-37.

Naa a zwi takadzi u ḓivha  uri Yehova u a ri funa nga maanḓa?— Ha humbuli nga riṋe musi ri tshi khou tshila fhedzi. U dovha a ri humbula na musi ro fa. Yesu o amba uri kha Khotsi awe, vhathu vho faho vhane a vha funa vha khou tshila naho vho fa! (Luka 20:38) Bivhili i amba uri ‘naho hu lufu kana vhutshilo, zwa zwino na zwi ḓaho zwi nga si kone u ri fhandekanya na lufuno lwa Mudzimu.’—Vha-Roma 8:38, 39.

Musi Yesu e kha ḽifhasi, o sumbedza uri Yehova u a ṱhogomela vhana vhaṱuku. Khamusi ni kha ḓi zwi humbula uri Yesu o ḓiṋea tshifhinga u itela u amba na vhana nga ha Mudzimu. Fhedzi naa ni a zwi ḓivha uri Mudzimu o ṋea Yesu maanḓa a u vusa vhana vhaṱuku?— Kha ri ambe nga ha tshifhinga tshee Yesu a vusa ṅwananyana wa miṅwaha ya 12, wa munna ane a pfi Yairo.

Yairo o vha a tshi dzula na musadzi wawe na ṅwana wawe muthihi fhedzi tsini na Lwanzhe lwa Galilea. Ḽiṅwe ḓuvha onoyo ṅwananyana a lwala nga maanḓa, nahone Yairo a zwi vhona uri u ḓo fa. A thoma u humbula nga Yesu, munna a mangadzaho we a pfa uri a nga fhodza vhathu. Nga zwenezwo Yairo a ya a mu ṱoḓa. A wana Yesu e khunzikhunzini ya Lwanzhe lwa Galilea, a tshi khou funza vhathu vhanzhi.

Yairo a vhanyuludza vhukati ha tshigwada tsha vhathu nahone a gwadama milenzheni ya Yesu. A amba na Yesu a ri: ‘Ṅwananyana wanga u khou lwala nga maanḓa. Ndi humbela uri ni ḓe ni mu thuse?’ Yesu a mbo ḓi ṱuwa na Yairo nga u ṱavhanya. Gogo ḽa vhathu vhe vha vha vho ḓa u vhona Mufunzi Muhulu na vhone vha tevhela. Fhedzi musi vho no tshimbila tshikhalanyana, ha ḓa vhaṅwe vhanna vhane vha bva muḓini wa Yairo nahone vha ri: “Ṅwananyana wau o fa; Mufunzi U kha ḓi mu netisela’ni?”

Yesu o pfa zwe vhenevho vhanna vha zwi amba. O vha a tshi zwi ḓivha uri Yairo o ṱungufhala vhukuma nge a felwa nga ṅwana wawe muthihi fhedzi. Nga zwenezwo A mu vhudza a ri: ‘U songo ofha. U vhe na lutendo kha Mudzimu, nahone ṅwananyana wau u ḓo tshidzwa.’ Vha bvela phanḓa vha tshi khou tshimbila u swika muḓini  wa Yairo. Vha tshi swika henefho vha wana khonani dza vha muṱani dzi tshi khou lila. Vho vha vho ṱungufhalela uri khonani yavho ṱhukhu yo vha yo fa. Fhedzi Yesu a vha vhudza a ri: ‘Ni songo lila. Ṅwananyana ho ngo fa, o tou eḓela.’

Musi Yesu a tshi khou amba zwenezwo, vhathu vha thoma u sea, ngauri vho vha vha tshi zwi ḓivha uri onoyo ṅwananyana o vha o fa. Ni humbula uri ndi ngani Yesu o amba uri o eḓela?— Ni humbula uri Yesu o vha a tshi khou ṱoḓa u funza vhathu ngudo ifhio?— O vha a tshi khou ṱoḓa u vha ita uri vha ḓivhe uri lufu lu fana na khofhe khulwane. O vha a tshi khou ṱoḓa u vha funza uri nga maanḓa a Mudzimu, a nga vusa muthu lufuni samusi ri tshi nga vusa muthu o eḓelaho.

Yesu a humbela vhathu uri vha bvele nnḓa ha sala vhaapostola vhawe Petro, Yakobo, na Yohane na khotsi a onoyo ṅwananyana na mme awe. Nga zwenezwo a ya hune onoyo ṅwananyana muṱuku a vha hone. A mu fara nga tshanḓa a ri: ‘Ṅwananyana, vuwa!’ Nahone a mbo ḓi vuwa nga u ṱavhanya nahone a thoma u tshimbila! Khotsi awe na mme awe vho vha vho takala nga maanḓa.—Marko 5:21-24, 35-43; Luka 8:40-42, 49-56.

Humbulani nga ha enea mafhungo. Samusi Yesu o kona u vusa onoyo  ṅwananyana muṱuku, naa a nga vusa na vhaṅwe?— Naa ni humbula uri u ḓo zwi ita zwa vhukuma?— Ee, u ḓo zwi ita. Yesu o ri: ‘Hu ḓa tshikhathi, tshiné vhoṱhe vha re zwaloni vha ḓo pfa ipfi [ḽanga] ngatsho’, vha ḓo bvelela.’—Yohane 5:28, 29.

Naa ni humbula uri Yesu u ṱoḓa u vusa vhathu?— Iṅwe tsumbo i re Bivhilini i ri thusa u fhindula yeneyo mbudziso. Zwe zwa itea muḓini wa Naini zwi sumbedza nḓila ine Yesu ḓipfa a ngayo nga ha vhathu vhane vha khou lila mbulungoni.

Muṅwe mufumakadzi u kha muduba wa vhathu vhane vha khou bva muḓini wa Naini, vhane vha khou ya u vhulunga murwa wawe. Munna wawe o vha o no fa, nahone zwino ho vha ho fa ṅwana wawe muthihi fhedzi. Onoyo mufumakadzi o vha o ṱungufhala vhukuma! Vhunzhi ha vhathu vha Naini vho vha vha tshi khou tevhela musi tshitumbu tsha murwa wawe tshi tshi khou ya u vhulungwa nnḓa ha muḓi. Onoyo mufumakadzi o vha a tshi khou lila, nahone vhathu vho vha vha sa koni u mu kwengweledza.

Nga ḽeneḽo ḓuvha, Yesu na vhafunziwa vhawe vho vha vha tshi khou ḓela thungo ya muḓi wa Naini. Musi vhe tsini na khoro ya wonoyo muḓi, vha ṱangana na tshigwada tsha vhathu tshi tshi khou ya u vhulunga murwa wa onoyo musadzi. Musi Yesu a tshi vhona onoyo mufumakadzi a tshi khou lila, a mu pfela vhuṱungu. Mbilu yawe yo kwamiwa nga u ṱungufhala huhulwane ha onoyo mufumakadzi. Zwa ita uri a ṱoḓe u mu thusa.

Nga ipfi ḽa vhulenda na ḽo khwaṱhaho a mu fhumudza, a ri: “U songo lila!” Nḓila ye a amba ngayo na zwe a zwi ita zwa ita uri vhathu vha sedze vha tshi ṱoḓa u vhona zwine zwa ḓo itea. Musi Yesu a tshi sendela tsini na tshitumbu, vhathu vhoṱhe vha fanela u vha vho ḓivhudzisa uri o vha a tshi ḓo ita mini. Yesu a amba nga ipfi ḽo khwaṱhaho a ri: “Muṱhanngana, ndi a U vhudza ndi ri: Vuwa!” A mbo ḓi vuwa nga u ṱavhanya! Nahone a thoma u amba.—Luka 7:11-17.

Edzani u humbula nḓila ye onoyo mufumakadzi a nga vha o ḓipfa  ngayo! Ni nga ḓipfa hani arali ha vuswa muthu ane na mu funa?— Naa izwi a zwi sumbedzi uri ngangoho Yesu u funa vhathu nahone u ṱoḓa u vha thusa?— Edzani u humbula uri zwi ḓo takadza lungafhani shangoni ḽiswa ḽa Mudzimu u ṱanganedza vhathu vho vuswaho vhafuni!—2 Petro 3:13; Ndzumbululo 21:3, 4.

Nga tshenetsho tshifhinga vhathu vhane vha ḓo vuswa vha ḓo vha vhe vhathu vhane ra vha ḓivha, u katela na vhana. Ri ḓo vha ḓivha samusi Yairo o ḓivha ṅwananyana wawe musi Yesu a tshi mu vusa. Vhaṅwe vha ḓo vha vhe vhathu vhe vha fa maḓanani kana zwigidi zwinzhi zwa miṅwaha yo fhiraho. Fhedzi Mudzimu ha nga ḓo vha hangwa nge vha tshila kale-kale.

Naa a zwi takadzi u ḓivha uri Yehova Mudzimu na Murwa wawe Yesu, vha a ri funa nga maanḓa?— Vha ṱoḓa uri ri tshile tshoṱhe, hu si miṅwaha i si gathi fhedzi!