NI A ḓivha uri tshiga ndi mini a thi ri?— Kha Ndima ya 46 ro vhala nga ha tshiga tshine tsha sumbedza uri Mudzimu ha tsha ḓo dovha a fhelisa shango nga maḓi mahulu. Na vhaapostola vho vhudzisa tshiga tshine vha ḓo ḓivha ngatsho uri Yesu o vhuya na uri vhufhelo ha shango vhu tsini.—Mateo 24:3.

Samusi Yesu a tshi ḓo vha a sa vhonali ngei ṱaḓulu, ho vha hu tshi ṱoḓea tshiga tshine vhathu vha ḓo vhona ngatsho uri o no thoma u vhusa. Ndi ngazwo Yesu o amba nga ha zwithu zwine vhafunziwa vhawe vha fanela u zwi ṱhogomela fhano kha ḽifhasi. Musi zwenezwi zwithu zwi tshi itea, zwi ḓo amba uri o no vhuya nahone o no thoma u vhusa ḽiṱaḓulu sa Khosi.

U itela u funza vhafunziwa vhawe ndeme ya u dzula vho fhaṱuwa, Yesu o vha vhudza a ri: “Lavhelesani muhuyu na miri yoṱhe: Arali zwino i tshi ṱuma lurere, ni ri u̗ lavhelesa na ḓivha  nga yone zwauri tshilimo tsho no vha tsini.” (Maḽeḓeretsendama ndi ashu.) Ni nga zwi vhona arali tshilimo tshi tsini. Nahone ni nga ḓivha arali Haramagedo i tsini musi ni tshi khou vhona zwithu zwe Yesu a amba ngazwo zwi tshi khou itea.—Luka 21:29, 30.

Kha heḽi siaṱari na ḽi tevhelaho, ri ḓo vhona zwifanyiso zwa zwithu zwe Yesu a amba uri zwi ḓo vha tshipiḓa tsha tshiga tshine tsha sumbedza uri Muvhuso wa Mudzimu u tsini. Musi zwenezwo zwithu zwoṱhe zwi tshi itea, Muvhuso wa Mudzimu une  Kristo a ḓo vha Muvhusi wawo u ḓo pwashekanya mivhuso yoṱhe, samusi ro zwi vhala kha Ndima ya 46.

Ngauralo sedzani nga vhuronwane zwifanyiso zwi re kha masiaṱari mavhili o fhiraho, nahone ri ḓo amba nga hazwo. Ni nga vhala nga ha zwine na khou zwi vhona kha hezwi zwifanyiso kha Mateo 24:6-14 na Luka 21:9-11. Dovhani ni ṱhogomele nomboro ṱhukhu dzine dza vha kha tshifanyiso tshiṅwe na tshiṅwe. Nomboro dzi fanaho na dzenedzo dzi wanala mathomoni a phara dzine dza ṱalusa tshenetsho tshifanyiso. Zwino kha ri ṱhogomele arali vhunzhi ha zwipiḓa zwa zwiga zwe Yesu a zwi ṋea uri zwi khou ḓadzea ṋamusi.

(1) Yesu o ri: ‘Ni ḓo pfa dzinndwa na mikosi ya nndwa, lushaka lu ḓo vutshela lushaka; muvhuso u ḓo vutshela muvhuso.’ Naa no no pfa vhathu vha tshi khou amba nga dzinndwa?— Nndwa ya u thoma ya shango yo lwiwa u bva nga 1914 u swika nga 1918, nga murahu ha zwenezwo ha tevhela Nndwa ya Vhuvhili ya Shango, u bva nga 1939 u swika nga 1945. Ho vha hu sa athu vhuya ha vha na nndwa dza shango nga phanḓa ha zwenezwo! Zwino hu na dzinndwa shangoni ḽoṱhe. Zwi vhonala u nga ḓuvha ḽiṅwe na ḽiṅwe kha thelevishini, kha radio, na kha gurannḓa, ri pfa nga ha nndwa kana ri vhala nga hadzo.

(2) Yesu o dovha a ri: “Hu ḓo ḓa nḓala . . afho na afho.” Samusi ni tshi zwi ḓivha, vhaṅwe vhathu a vha na zwiḽiwa. Ḓuvha ḽiṅwe na ḽiṅwe hu fa vhathu vha zwigidi nga nṱhani ha u sa vha na zwiḽiwa zwo vha eḓanaho.

(3) Yesu o engedza a ri: ‘Nga thungo ha vha na dwadze.’ Naa ni a ḓivha uri dwadze ndi mini?— Ndi vhulwadze vhune ha vhulaha vhathu vhanzhi. Ḽiṅwe dwadze ḽine ḽa vhidzwa Spanish flu ḽo vhulaha vhathu vha ṱoḓaho u vha milioni dza 20 hu sa athu fhela ṅwaha. Misini yashu hu nga kha ḓi fa vhathu vha fhiraho vhenevho nga dwadze ḽa AIDS. Nahone hu na khentsara, vhulwadze ha mbilu, na maṅwe malwadze ane a vhulaha vhathu vha zwigidi ṅwaha muṅwe na muṅwe.

 (4) Yesu o ṋea tshiṅwe tshipiḓa tsha tshiga, musi a tshi ri: “Hu ḓo ḓa . . midzinginyo afho na afho.” Naa ni a ḓivha uri mudzinginyo ndi mini?— Midzinginyo i ita uri ni pfe u dzinginyea ha ḽifhasi. Nnḓu dzi a wa, nahone vhathu vha a vhulahwa tshifhinga tshoṱhe. U bva nga ṅwaha wa 1914, ho no vha na midzinginyo minzhi ṅwaha muṅwe na muṅwe. Naa no no vhuya na pfa nga ha midzinginyo?—

(5) Yesu o amba uri tshiṅwe tshipiḓa tsha tshiga tshi ḓo vha ‘u anda ha vhuvhi.’ Ndi ngazwo hu na vhuvhava na vhuvemu vhunzhi. Vhathu fhethu hoṱhe vha ofha uri muṅwe muthu a nga pwasha nḓuni dzavho. A hu athu vhuya ha vha na vhutshinyi vhunzhi na dzinndwa kha zwipiḓa zwoṱhe zwa shango sa ṋamusi.

(6) Yesu o ṋea tshipiḓa tsha tshiga tsha ndeme vhukuma musi a tshi ri: “Huno mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe. Ndi hone hu tshi ḓo ḓa vhufhelo.” (Mateo 24:14) Arali ni tshi tenda “mafhungo maḓifha aya,” ni tea u a vhudza vhaṅwe. Nga yeneyo nḓila ni nga ṱanganela kha u ḓadzea ha tshenetshi tshipiḓa tsha tshiga.

Vhaṅwe vhathu vha nga amba uri zwithu zwe Yesu a zwi amba ndi kale zwi tshi khou ḓi itea. Fhedzi zwenezwi zwithu zwoṱhe a zwi athu vhuya zwa itea mashangoni manzhi nga u rali nga tshifhinga tshithihi. Ni vho pfesesa uri tshiga ndi mini?— Zwi amba uri musi ri tshi vhona zwenezwi zwithu zwoṱhe zwi tshi khou itea, heḽi shango ḽivhi hu si kale ḽi ḓo dzhielwa vhudzulo nga shango ḽiswa ḽa Mudzimu.

Musi Yesu a tshi ṋea tshenetshi tshiga, o dovha a amba nga ha tshifhinga tsho khetheaho tsha ṅwaha. O ri: “Hone, rabelani uri mushavho waṋu u si vhe nga tshifhinga tsha mariha.” (Mateo 24:20) Naa ni humbula uri o vha a tshi khou amba mini nga ha zwenezwo?—

Hu nga itea mini arali muthu a tshi fanela uri a shavhe dziedzi nga vhuriha, musi mutsho u tshi ita uri zwi konḓe vhukuma u fara lwendo kana zwi tshi nga vha na khombo?— Arali a kona u shavha, zwi  ḓo vha zwo mu konḓela vhukuma. Naa zwi nga si ṱungufhadze arali muthu a vhulahwa nga muya u rotholaho wa vhuriha nge a sa kone u fara lwendo lwawe nga tshifhinga tshi si na khombo, nga nṱhani ha uri o vha o farakanea nga u ita zwiṅwe zwithu?—

Naa ni a pfesesa uri Yesu o vha a tshi khou amba mini musi a tshi ri vhathu vha songo lindela vhuriha uri vha kone u shavha?— O vha a tshi khou ri vhudza uri samusi ri tshi ḓivha uri Haramagedo i tsini, ri songo lenga u dzhia vhukando ha u sumbedza uri ri funa Mudzimu nga u mu shumela. Arali ra lenga, ri nga kha ḓi siiwa nga tshifhinga. Ngauralo ri ḓo nga vhathu vha tshifhingani tsha Maḓi Mahulu vhe vha pfa tsevho ya Noaxe, fhedzi vha si dzhene nga ngomu gungwani.

Kha tshiṱoho tshi tevhelaho, kha ri ambe nga ha nḓila ine vhuimo ha ḓo vha ngaho musi nndwa khulu ya Haramagedo yo no fhela. Ri ḓo guda nga ha zwe Mudzimu a ri lugiselela zwone riṋe roṱhe vhane ra mu funa na u mu shumela zwino.