NAA huna muthu ane a khou lwala ane na mu ḓivha?— Khamusi na inwi ni ḓo lwala ḽiṅwe ḓuvha. Ni nga kha ḓi farwa nga duda, kana na luṅwa-luṅwa thumbuni. Vhaṅwe vhathu vha lwala nga maanḓa. A vha koni u ima arali vha songo thuswa nga muṅwe muthu. Hezwi kanzhi zwi itea musi muthu o no kalaha kana o no kegula nga maanḓa.

Muthu muṅwe na muṅwe u a lwala nga zwiṅwe zwifhinga. Ni a ḓivha uri ndi ngani vhathu vha tshi lwala, vha tshi vha vhalala, vha fa?— Ḽiṅwe ḓuvha muṅwe munna a sa koni u tshimbila o ḓiswa kha Yesu nahone Yesu a sumbedza uri ndi ngani vhathu vha tshi lwala vha fa. Thetshelesani ndi ni ṱalutshedze eneo mafhungo.

Yesu o vha a tshi dzula muṅwe muḓini u re ḓoroboni i re tsini na Lwanzhe lwa Galilea. O ḓa a vhonwa nga gogo ḽa vhathu. Ho ḓa vhathu vhanzhi lwe vhaṅwe vha sa kone u dzhena nḓuni. Vhaṅwe a vho ngo kona u swika na muṋangoni. Fhedzi vhathu vha ḓi ḓa nga vhunzhi. Vhaṅwe vhathu vha ḓisa muthu o omaho miraḓo we a vha a sa koni na u tshimbila. Zwo ṱoḓa vhanna vhaṋa uri vha mu hwale nga mmbete muṱuku.

Ni a ḓivha uri ndi ngani vho vha vha tshi ṱoḓa u ḓisa onoyu munna a lwalaho kha Yesu?— Vho vha vha tshi tenda uri Yesu u ḓo mu thusa. Vho vha vha tshi tenda uri Yesu o vha a tshi nga mu fhodza honoho vhulwadze. Ni a ḓivha uri vho kona hani u isa onoyo munna o omaho miraḓo kha Yesu samusi nnḓu yo vha yo ḓala vhathu?—

Tshifanyiso tshine na khou tshi vhona hafha tshi sumbedza nḓila ye vha zwi ita ngayo. Vho thoma nga u hwala onoyo munna vha mu isa kha ṱhanga. Yo vha i ṱhanga yo itaho bande. Nga murahu ha zwenezwo, vha phula buli khayo. Vho no fhedza zwenezwo vha tsitsa onoyo munna a  lwalaho e kha mmbete wawe nga ḽeneḽo buli vha mu dzhenisa nḓuni. Vho vha vhe na lutendo luhulwane!

Vhathu vhoṱhe vhe vha vha vhe nḓuni vho mangadzwa vhukuma nga zwenezwo zwithu zwe zwa itea. Onoyo munna o omaho miraḓo we a vha e mmbeteni wawe a dzhena vhukati havho. Naa Yesu o sinyuswa nga zwe zwa itwa nga vhenevho vhanna?— A zwo ngo mu sinyusa na luthihi. O takalela u vhona uri vha na lutendo. O vhudza onoyo munna o omaho miraḓo a ri: “Wo hangwelwa zwivhi zwau.”

Vhaṅwe vhathu vho vhona u nga zwo vha zwi songo fanela uri Yesu a ambe zwenezwo. Vho humbula uri o vha e si na maanḓa a u hangwela zwivhi. U sumbedza uri o vha a tshi kona u hangwela zwivhi, Yesu o vhudza onoyo munna a ri: “Vuwa, U hwale vhulalo hau, U ye hayani hau.”

 Musi Yesu a tshi kha ḓi tou bva u amba zwenezwo, onoyo munna a fhola! Miraḓo yawe yo vha i songo tsha oma. O vha a tshi vho kona u takuwa nga eṱhe nahone a tshimbila. Vhathu vhe vha vhona honovhu vhuṱolo vha mangala. Vho vha vha sa athu vhuya vha vhona tshithu tshi mangadzaho u fana na tshenetsho! Vha renda Yehova nge a vha ḓisela Mufunzi Muhulu, we a ita na u fhodza vhathu malwadze avho.—Marko 2:1-12.

Ri guda mini kha honovhu vhuṱolo?— Ri guda uri Yesu u na maanḓa a u hangwela zwivhi na u fhodza vhathu vha lwalaho. Fhedzi ri dovha ra guda tshiṅwe tshithu tsha ndeme vhukuma. Ri guda uri vhathu vha lwala nga ṅwambo wa tshivhi.

Samusi roṱhe ri tshi lwala nga zwiṅwe zwifhinga, naa izwi zwi amba uri ri vhaitazwivhi?— Ee, Bivhili i amba uri roṱhe ro bebwa ri na tshivhi. Naa ni a ḓivha uri zwi amba mini u bebwa u na tshivhi?— Zwi amba uri ro bebwa ri songo fhelela. Nga zwiṅwe zwifhinga ri ita zwithu zwo khakheaho, naho ri sa zwi funi. Naa ni a ḓivha uri ndi ngani roṱhe ri na tshivhi?—

Ro bebwa ri na tshivhi nga ṅwambo wa uri Adamu, muthu wa u thoma, ho ngo thetshelesa Mudzimu. O tshinya musi a tshi pfuka mulayo wa Mudzimu. Nahone roṱhe ro wana tshivhi kha Adamu. Naa ni a ḓivha uri ro wana hani tshivhi khae? Thetshelesani ndi lingedze u ni ṱalutshedza nga nḓila ine na ḓo kona u pfesesa.

Khamusi no no vhuya na vhona muṅwe muthu a tshi khou baka vhurotho nga pani. Vhurotho vhu ḓo bva vhu hani arali pani ya hone i na kudindi? Ni a zwi ḓivha?— Vhurotho hoṱhe he onoyo muthu a vhu  baka vhu ḓo bva vhu na lwonolwo luswayo, kana kwonokwo kudindi a thi ri?—

Adamu o vha a tshi fana na yeneyo pani, nahone riṋe ri fana na honoho vhurotho. O vha muthu a songo fhelelaho musi a tshi pfuka mulayo wa Mudzimu. Zwo vha zwi tshi tou nga o wana kudindi, kana luswayo lwa u sa fhelela. Nga zwenezwo, musi a tshi vha na vhana, vha ḓo vha hani?— Vhana vhawe vhoṱhe vha ḓo vha na lwonolwu luswayo lwa u sa fhelela.

Vhana vhanzhi a vha bebiwi vhe na u sa fhelela huhulwane hune na nga kona u hu vhona. A vha bebiwi vhe na mulenzhe muthihi kana tshanḓa tshithihi. Fhedzi u sa fhelela havho ndi huhulwane lune vha a lwala, nahone nga u ya ha tshifhinga, vha fa.

Vhaṅwe vhathu vha a lwala nga maanḓa u fhira vhaṅwe. Ndi ngani? Naa ndi nga ṅwambo wa uri vha na zwivhi zwinzhi?— Hai, vhathu vhoṱhe vha bebiwa vhe na tshivhi tshi linganaho. Roṱhe ri bebiwa ri songo fhelela. Nga u ya ha tshifhinga, roṱhe ri ḓo farwa nga vhulwadze. Na vhathu vhane vha lingedza u thetshelesa milayo yoṱhe ya Mudzimu, vhane vha sa ite zwithu zwivhi vha a lwala.

Nga zwenezwo ha, ndi ngani vhaṅwe vhathu vha tshi lwalesa u fhira vhaṅwe?— Hu na zwiitisi zwinzhi. Vha nga kha ḓi vha vha si na zwiḽiwa zwinzhi. Kana vha nga kha ḓi vha vha sa ḽi zwiḽiwa zwavhuḓi. Vha nga kha ḓi vha vha tshi ḽesa makhekhe na maḽegere. Tshiṅwe tshiitisi hu nga kha ḓi vha uri vha a dzedza nga maanḓa zwa ita uri vha vuwe vha tsheena khofhe. Kana a vha ambari zwiambaro zwi dudelaho musi hu na phepho. Vhaṅwe vhathu vha na mivhili i songo khwaṱhaho, nahone a i koni u lwisana na malwadze, naho arali vha nga lingedza u ḓiṱhogomela.

 Naa hu ḓo vhuya ha vha na tshifhinga tshine ra sa ḓo lwala? Naa tshivhi tshi ḓo vhuya tsha fheliswa?— Yesu o itela mini uḽa munna we a vha o oma miraḓo?— Yesu o mu hangwela zwivhi nahone a mu fhodza. Nga yeneyo nḓila, Yesu o sumbedza zwine ḽiṅwe ḓuvha a ḓo zwi itela vhoṱhe vhane vha lingedza vhukuma u ita zwo lugaho.

Arali ra sumbedza uri a ri ṱoḓi u ita tshivhi, nahone ri vhenga u ita zwithu zwo khakheaho, Yesu u ḓo ri fhodza. Tshifhingani tshi ḓaho u ḓo fhelisa u sa fhelela hune ra vha naho zwino. Hezwi u ḓo zwi ita samusi o no vha Khosi ya Muvhuso wa Mudzimu. Tshivhi a tshi nga ḓo fheliswa tshoṱhe kha riṋe nga luthihi. Tshi ḓo fheliswa nga zwiṱuku nga zwiṱuku. Musi tshivhi tshashu tsho no fheliswa tshoṱhe, a ri tsha ḓo dovha ra lwala. Ri ḓo vha na mutakalo wavhuḓi. I ḓo vha phaṱutshedzo yavhuḓi lungafhani yeneyo.