1, 2. Ndi ufhio mushumo wa u fhaṱa we na sedzana nawo nahone ndi ngani zwi zwa ndeme nga u rali u ṱhogomela nḓila ine na fhaṱa ngayo?

KHA ri ri no farakanea nga mushumo wa u fhaṱa. Ndi kale ni tshi khou ita wonoyo mushumo nahone zwi kha ḓi ḓo dzhia tshifhinga tshilapfu uri ni u fhedze. Wonoyo mushumo u a konḓa, fhedzi u a takadza. No ḓiimisela u ita zwoṱhe zwi re maanḓani aṋu uri ni u fhedze, ngauri nḓila ine na khou fhaṱa ngayo i ḓo kwama vhutshilo haṋu na vhumatshelo haṋu. Ndi ngani? Ngauri tshifhaṱo tshine na khou tshi fhaṱa ndi vhumatshelo haṋu!

² Mufunziwa Yuda o ombedzela uri ri fanela u fhaṱa vhumuthu hashu. Musi a tshi khadeledza Vhakriste uri vha “ḓi-vhulungele ngomu lufunoni lwa Mudzimu,” o dovha a amba tshithu tshine tsha ḓo vha thusa u ita zwenezwo, o ri: “Ni vhe vho ḓi-fhaṱelaho kha lutendo lwashu lukhethwa-khethwa.” (Yuda 20, 21) Ndi dzifhio dziṅwe nḓila dzine na nga fhaṱa ngadzo vhumuthu haṋu na u khwaṱhisa lutendo lwaṋu u itela uri ni dzule lufunoni lwa Mudzimu? Kha ri ṱhogomele nḓila tharu dzine dza ḓo ri thusa u fhaṱa vhumuya hashu.

3-5. (a) Sathane u ṱoḓa uri ni dzhie hani ṱhoḓea dza Yehova? (b) Ri tea u vha na mavhonele afhio nga ha ṱhoḓea dza Mudzimu nahone zwenezwi zwi tea u kwama hani nḓila ine ra ḓipfa ngayo? Fanyisani.

³ Ya u thoma, ri fanela u khwaṱhisa lutendo lwashu nga milayo  ya Mudzimu. Musi ni tshi khou guda yeneyi bugu, no vhala nga ha ṱhoḓea dzo vhalaho dza Yehova malugana na vhuḓifari ho lugaho. Ni dzhia hani dzenedzo ṱhoḓea? Sathane u ṱoḓa u ni fhura uri ni dzhie milayo ya Yehova, maitele awe na zwilinganyo zwawe zwi zwithu zwi songo lugaho, zwine zwa tsikeledza. Enea maano o shuma ngei Edeni nahone o a shumisa u bva tsheetsho. (Genesi 3:1-6) Naa maano awe a ḓo shuma kha inwi? Zwi ḓitika nga mavhonele aṋu.

⁴ Sa tsumbo, kha ri ri ni khou tshimbila phakhani yo nakaho na mbo ḓi vhona uri hu na ḓaraṱa ndapfu yo paḓaho tshipiḓa tsha yeneyo phakha. Tshipiḓa tshi re nga ngei ha ḓaraṱa tshi vhonala tsho naka. U thomani ni nga kha ḓi humbula uri yeneyo ḓaraṱa i ni thivhela u ya henefho fhethu ho nakaho. Naho zwo ralo, musi ni tshi tou hasha maṱo, na vhona ndau i tshi khou dodela tshiṅwe tshipuka henefho nga ngomu! Zwenezwo zwi mbo ḓi ni ita uri ni vhone uri yeneyo ḓaraṱa yo itelwa u ni tsireledza. Naa hu na tshivhanda tshine tsha khou ni dodela zwa zwino? Ipfi ḽa Mudzimu ḽi a sevha: “Dzivhuluwani ni fhaṱuwe! Swina ḽaṋu Diabolo u mona-mona vhunga ndau i vhombaho, iné ya ṱoḓa ané ya mu mila.”—1 Petro 5:8.

⁵ Sathane ndi tshivhanda tshi re na vhuhali. Nga ṅwambo wa uri Yehova ha ṱoḓi ri tshi zhongondedzwa nga Sathane, o ri vhetshela milayo u itela u ri tsireledza kha “maano” manzhi a onoyo muvhi. (Vha-Efesa 6:11) Nga zwenezwo musi ri tshi elekanya nga ha milayo ya Mudzimu, ri tea u zwi vhona uri o ri vhetshela yone nga ṅwambo wa uri u a ri funa, samusi e Khotsi ashu wa ṱaḓulu. Arali ra dzhia milayo ya Mudzimu nga yeneyo nḓila, ri ḓo zwi vhona uri yo itelwa uri tsireledza na u ita uri ri takale. Mufunziwa Yakobo o ṅwala a ri: “Ané a sedzesa mulayo wo vuleaho, mulayo u ṋeaho vhathu vhu-ḓi-langi, wonoyo mulayo a si ú litshe . . . Wa u ralo u ḓo shudufhala nga u shuma hawe.”—Yakobo 1:25.

6. Ndi ifhio nḓila yavhuḓi vhukuma ya u fhaṱa lutendo kha milayo yo lugaho ya Mudzimu na maitele awe? Ṋeani tsumbo.

⁶ U tshila u tendelana na ndaela dza Mudzimu ndi nḓila yavhuḓi vhukuma ya u fhaṱa lutendo lwashu kha Muṋei wa  Mulayo na kha vhuṱali vhune ra vhu wana khayo. Sa tsumbo, “mulayo wa Kristo” u katela ndaela ya u funza vhaṅwe “zwoṱhe zwe [a vha] laya.” (Vha-Galata 6:2; Mateo 28:19, 20) Vhakriste vha dzhiela nṱha ndaela ya u kuvhangana u itela vhurabeli na vhukonani vhu fhaṱaho. (Vha-Heberu 10:24, 25) Ndaela dza Mudzimu dzi katela na ṱhuṱhuwedzo ya uri ri rabele Yehova misi yoṱhe ri sa fhidzi nahone zwi tshi bva mbiluni. (Mateo 6:5-8; 1 Vha-Thesalonika 5:17) Musi ri tshi tshila u tendelana na ndaela dzo raloho, ri ḓo zwi vhona zwavhuḓi uri dzi bva ha Mudzimu ane a ri funa. Arali ra i thetshelesa ri ḓo wana dakalo na u fushea, zwine ra nga si vhuye ra zwi wana kha ḽino shango ḽi re na khakhathi. Musi ni tshi elekanya nga ha nḓila ye na vhuyelwa ngayo nga u tshila u tendelana na milayo ya Mudzimu, naa lutendo lwaṋu a lu khwaṱhi lu tshi ya?

7, 8. Ipfi ḽa Mudzimu ḽi khwaṱhisa hani vhane vha vhilaedziswa nga uri vha nga kha ḓi sa kona u dzula vha tshi ita zwo lugaho musi vha tshi khou ḓi aluwa?

⁷ Nga zwiṅwe zwifhinga vhaṅwe vha vhilaedziswa ngauri zwi  ḓo vha konḓela vhukuma u tshila u tendelana na milayo ya Yehova musi vha tshi khou ḓi aluwa. Vha ofha uri hu na hune vha ḓo khakha hone. Arali ni tshi ḓipfa nga yeneyo nḓila, humbulani maipfi a tevhelaho: “Yehova Mulamuleli wau Mukhethwa wa Isiraele u ri: Nṋe Yehova Mudzimu wau ndi U funza zwi farisaho; ndi U tshimbidza kha yau nḓila, ine wa pfi U fare yone. Yawee! Ngavhe U pfe ndi tshi U laya, ndi misi mulalo wau u tshi nga mulambo; zwivhuya zwau ndi misi zwi tshi nga magabelo a lwanzhe.” (Yesaya 48:17, 18) Zwi ḓo vha zwavhuḓi u elekanya nga ha nḓila ine eneo maipfi a ṱuṱuwedza ngayo.

⁸ Kha dzenedzi ndimana Yehova u ri humbudza uri ri ḓo vhuyelwa arali ra mu thetshelesa. U ri fulufhedzisa uri ri ḓo vhuyelwa nga nḓila mbili arali ra ita nga u ralo. Ya u thoma, mulalo washu u ḓo nga mulambo—u ḓo dzika, wa anda, wa sa fhele. Ya vhuvhili, zwivhuya zwashu zwi ḓo nga magabelo a lwanzhe. Arali na ima khunzi-khunzini na lavhelesa magabelo a lwanzhe a tshi khou gaba, a zwi timatimisi uri ni a zwi vhona uri a ḓo ita nga u ralo lwa tshifhinga tshilapfu. Ni a zwi ḓivha uri magabelo a ḓo bvela phanḓa a tshi gaba, a hashela maḓi henefho khunzi-khunzini nga hu sa fheli. Yehova u amba uri zwivhuya zwaṋu—buḓo ḽaṋu ḽa u ita zwo lugaho—zwi ḓo tou ralo. Arali na ḓiimisela u fulufhedzea khae, u ḓo ni thusa uri ni sa vhuye na kundwa u tevhela milayo yawe! (Psalme ya 55:22) Naa mafulufhedziso o raloho a takadzaho ha iti uri ni fhaṱe lutendo lwaṋu kha Yehova na kha ṱhoḓea dzawe dzo lugaho?

9, 10. (a) Ndi ngani u vhibva tshi tshipikwa tshavhuḓi tshine Vhakriste vha fanela u tshi swikelela? (b) U vha na mavhonele a muya zwi ri thusa hani uri ri takale?

⁹ Nḓila ya vhuvhili ya u fhaṱa vhumuya haṋu i dzumbululwa kha maipfi a tevhelaho o hevhedzwaho: ‘Kha ri fhirele phanḓa kha u vhibva.’ (Vha-Heberu 6:1, vhambedzani NW.) U vhibva ndi tshipikwa tshavhuḓi tshine Mukriste a fanela u tshi swikelela. Naho ri nga si kone u vha vhathu vho fhelelaho kha ano maitele, ri nga kona u vha vhathu vho vhibvaho. Zwiṅwe hafhu,  Vhakriste vha takadzwa vhukuma nga u shumela Yehova musi vha tshi khou ḓi vhibva. Ndi ngani zwo ralo?

¹⁰ Mukriste o vhibvaho ndi muthu ane a funa zwithu zwa muya. Ú sedza zwithu nga nḓila ine Yehova a zwi sedza ngayo. (Yohane 4:23) Paulo o ṅwala a ri: “Ngauri vha ṋama vha ṱoḓa zwa ṋama, vha muya vha ṱoḓa zwa muya.” (Vha-Roma 8:5) U sedza zwithu nga iṱo ḽa ṋama zwi ita uri muthu a sa takale, ngauri zwi mu ita uri a vhe na tseḓa, a vhe tsilu nahone a livhise ṱhogomelo kha zwithu zwi vhonalaho. U sedza zwithu nga iṱo ḽa muya zwi ita uri muthu a takale, ngauri zwi mu ita uri a livhise ṱhogomelo kha Yehova “Mudzimu o takalaho.” (1 Timotheo 1:11, NW) Muthu ane a funa zwithu zwa muya u fhisetshela u takadza Yehova nahone u ḓi dzula e na dakalo naho o sedzana na mulingo. Ndi ngani? Milingo i ri ṋea tshibuli tsha u sumbedza uri Sathane ndi muzwifhi na u ṱahulela u fulufhedzea, u itela uri ri takadze Khotsi ashu wa ṱaḓulu.—Mirero 27:11; Yakobo 1:2, 3.

11, 12. (a) Paulo o amba mini nga ha “ṱhalukanyo” ya Mukriste nahone ipfi ḽo ṱalutshedzelwaho nga uri ‘ḓowedza’ ḽi amba mini? (b) Muvhili u fanela u gudiswa hani uri u khwaṱhe?

¹¹ Muthu u fanela u ḓiḓowedza u itela uri a fune zwithu zwa muya nahone a vhibve nga lwa muya. Ṱhogomelani ndimana i tevhelaho: “Zwiḽiwa zwo dziaho ndi zwa vho vuledzaho, ndi avho vho gudaho vha fhedza, vha vha na ṱhalukanyo yo ḓowelaho u khethekanya vhuḓi na vhuvhi.” (Vha-Heberu 5:14) Musi Paulo a tshi amba nga ha u ‘ḓowedza’ ṱhalukanyo yashu, o shumisa ipfi ḽa Lugerika ḽine zwa vhonala uri ḽo vha ḽi tshi shumiseswa fhethu ha u ita nyonyoloso ḓanani ḽa u thoma ḽa miṅwaha ngei Gerika, ngauri ḽi nga ṱalutshedzelwa ngauri ‘u ḓiḓowedza u fana na muitanyonyoloso.’ Ṱhogomelani nḓila ye vha vha vha tshi ita ngayo nyonyoloso.

¹² Musi ri tshi tou bebwa, mivhili yashu yo vha i sa koni u ita tshithu. Sa tsumbo, ṅwana ha koni u langa zwanḓa na milenzhe yawe. Ndi ngazwo a tshi isa zwanḓa zwawe ngeno na ngei, a ita a tshi ḓininga khofheni nahone zwa ita uri a lile. Nga zwiṱuku nga zwiṱuku musi ṅwana a tshi khou ḓi aluwa,  u ḓigudisa u langa miraḓo yawe. U thoma nga u tou swenda, a dedengela nahone a fheleledza a tshi vho tou gidima. * Fhedzi hu pfi mini nga muitanyonyoloso? Musi ni tshi vhona muthu o raloho a tshi thamuwa nahone a ita tshifindinkodo muyani nga nḓila i mangadzaho, ni mbo ḓi zwi ṱhogomela uri o fhedza tshifhinga tshilapfu a tshi khou ḓowedza muvhili wawe. Muitanyonyoloso ho ngo sokou vuwa e na honoho vhukoni—o shisha mabiko a tshi khou ḓiḓowedza. Bivhili i amba uri honoho u ḓowedza muvhili “[h]u lamulela kha zwi sí zwinzhi.” Edzani u vhona nḓila ine zwa vhuyedza ngayo u ḓowedza ṱhalukanyo yashu!—1 Timotheo 4:8.

13. Ri nga ḓowedza hani ṱhalukanyo yashu?

¹³ Kha yeneyi bugu, ro haseledza zwithu zwinzhi zwine zwa ḓo ni thusa u ḓowedza ṱhalukanyo yaṋu uri ni kone u dzula ni tshi fulufhedzea kha Yehova samusi ni muthu wa muya. Humbulani nga ho dzikaho nga ha maitele na milayo ya Mudzimu musi ni tshi ita phetho ḓuvha ḽiṅwe na ḽiṅwe. Tshifhinga tshoṱhe musi ni tshi ṱoḓa u ita phetho, ḓivhudziseni: ‘Ndi ifhio milayo na maitele a Bivhili zwine zwa kwamea kha enea mafhungo? Ndi nga zwi shumisa hani? Ndi buḓo ḽifhio ḽine ḽa nga takadza Khotsi anga wa ṱaḓulu?’ (Mirero 3:5, 6; Yakobo 1:5) Arali na ita phetho dzaṋu nga yeneyo nḓila, ni ḓo ḓowedza ṱhalukanyo yaṋu. U ita zwenezwi zwi ḓo ita uri ni dzule ni muthu wa muya ngangoho.

14. Ri tea u ita mini uri ri kone u aluwa muyani, fhedzi ndi tsevho ifhio ine ra ṋewa yone?

 ¹⁴ Naho ri tshi nga vhibva siani ḽa ṋama, u aluwa muyani ndi maitele a bvelaho phanḓa. Muthu u tea u ḽa u itela uri a aluwe. Nga zwenezwo Paulo o ri: “Zwiḽiwa zwo dziaho ndi zwa vho vuledzaho.” Zwine zwa ḓo ni thusa u fhaṱa lutendo lwaṋu ndi u dzula ni tshi ḽa zwiḽiwa zwo dziaho zwa muya. Ni ḓo vha ni tshi khou sumbedza vhuṱali arali na shumisa zwine na khou zwi guda nahone Bivhili i ri: ‘Vhuṱali ndi tshithu tshihulwane.’ Nga zwenezwo, ri tea u ḓiimisela u ḓikanzwa nga mafhungo-ngoho a ndeme a bvaho ha Khotsi ashu. (Mirero 4:5-7; 1 Petro 2:2) Fhedzi a ro ngo tea u huduluwa kana u ḓikukumusa nga ṅwambo wa vhuṱali na nḓivho yashu. Ri tea u dzula ri tshi khou ḓiṱolisisa u itela uri u ḓihudza kana vhuṅwe vhushayanungo zwi sa sime midzi nahone zwa hula mbiluni dzashu. Paulo o ṅwala a ri: “Ḓi-sedzeni arali ní kha lutendo, ḓi-lingeni!”—2 Vha-Korinta 13:5.

15. Ndi ngani lufuno lu lwa ndeme u itela uri muthu a aluwe muyani?

¹⁵ Naho nnḓu yo no fhela u fhaṱiwa, mushumo u kha ḓi bvela phanḓa. Ndi zwa ndeme uri i dzule i tshi ṱhogomelwa na u lugiswa fhaḽa na fhaḽa, nahone i nga kha ḓi engedzwa arali zwi tshi ṱoḓea. Ri tea u ita mini uri ri vhe vhathu vho vhibvaho na u dzula ri tshi funa zwithu zwa muya? Tshithu tsha ndeme vhukuma ndi lufuno. Ri tea u bvela phanḓa ri tshi funa Yehova na vhatendi nga riṋe. Arali ri si na lufuno, nḓivho yashu yoṱhe na mishumo yashu zwi ḓo vha mahandana—u fana na phosho i dinaho. (1 Vha-Korinta 13:1-3) Lufuno lu ḓo ita uri ri vhe Vhakriste vho vhibvaho nahone ri bvele phanḓa ri tshi aluwa muyani.

16. Ndi mahumbulele a mufuda-ḓe ane a ṱuṱuwedzwa nga Sathane, nahone Yehova o ri ṋea tshishumiswa tshifhio tshine ra nga ḓitsireledza ngatsho?

¹⁶ Kha ri ṱhogomele nḓila ya vhuraru ya mushumo waṋu wa u fhaṱa. Ni tea u ṱhogomela nḓila ine na humbula ngayo u itela uri ni ḓifhaṱe ni vhe mutevheli wa vhukuma wa Kristo. Sathane, ane a vha muvhusi wa ḽino shango, u na vhukoni ha u ita uri vhathu vha vhe na mahumbulele o khakheaho, vha sa vhe na fulufhelo,  vha nyabwe, vha sa ḓifulufhele nahone vha fulufhuwe. (Vha-Efesa 2:2) Mahumbulele o raloho a na khombo kha Mukriste samusi muṱwa u tshi nga bveledza khombo kha tshifhaṱo tsha mabulannga. Tshi takadzaho ndi uri Yehova o ri ṋea tshishumiswa tsha ndeme tshine ra nga ḓitsireledza ngadzo—tshenetsho tshishumiswa ndi fulufhelo.

17. Ipfi ḽa Mudzimu ḽi sumbedza hani ndeme ya fulufhelo?

¹⁷ Bivhili i amba nga ha mafumo o fhamba-fhambanaho a muya ane ra nga ḓitsireledza ngao kha Sathane na ḽino shango. Tshitsireledzi tsha ndeme ndi nguwane “u fulufhela u tshidzwa.” (1 Vha-Thesalonika 5:8) Ḽiswole ḽa tshifhingani tsha musi hu tshi ṅwalwa Bivhili ḽo vha ḽi tshi zwi ḓivha uri ḽo vha ḽi tshi nga vhulahwa arali ḽa sa ambara nguwane. Kanzhi nguwane yo vha i tshi itwa nga tsimbi nahone nga ngomu ha mometshedzwa vhukuse kana mukumba u itela uri swole ḽi sa vhaisale kha ṱhoho. Samusi nguwane i tshi tsireledza ṱhoho, fulufhelo ḽi nga tsireledza muhumbulo waṋu, nḓila ine na humbula ngayo.

18, 19. Yesu o vhea tsumbo ifhio malugana na u dzula ri na fulufhelo nahone ri nga mu edzisa hani?

¹⁸ Yesu o vhea tsumbo yavhuḓi ya u dzula u na fulufhelo. Humbulani zwithu zwe a zwi konḓelela vhusikuni ha u fhedza ha vhutshilo hawe kha ḽifhasi. O fheṱiwa nga khonani yawe khulwane nga ṅwambo wa tshelede. Muṅwe a ita na u mu landula. Vhaṅwe vha mu ṱutshela vha shavha. Vhathu vha shangohaya ḽahawe vho mu ṱanutshela, vha mu kumedza zwanḓani zwa Vharoma uri vha mu vhulahe nga nḓila i vhavhaho. Zwi vhonala zwi tshi pfala u amba uri Yesu o pfiswa vhuṱungu vhu fhiraho vhune ra nga vhuya ra vhu tshenzhela. O thuswa nga mini? Vha-Heberu 12:2 i a fhindula: “Ri ḓi isa maṱo kha Yesu, Murangi na Muvuledzi wa lutendo, we naho ó fanelwa nga dakalo a konḓelela [“danda ḽa tshengedzo,” NW], a tenda u nyadziwa, a kona u yo’ dzula thungo ya tsha u ḽa kha khuluṋoni ya Mudzimu.” Yesu o dzula a tshi humbula nga ha “dakalo” ḽo vhewaho phanḓa hawe.

¹⁹ Ndi dakalo ḽifhio ḽe ḽa vha ḽo vhewa phanḓa hawe? O vha a tshi zwi ḓivha uri arali a konḓelela, o vha a tshi ḓo thusa kha u  khethwa ha dzina ḽa Yehova. O vha a tshi ḓo ṋea vhuṱanzi vhu re khagala ha uri Sathane ndi muzwifhi. Ḽeneḽo fulufhelo ḽo vha ḽi tshi ḓo ita uri Yesu a takale vhukuma! O vha a tshi zwi ḓivha uri Yehova o vha a tshi ḓo fhaṱutshedza vhukuma u fulufhedzea hawe—na uri hu si kale u ḓo dovha a ṱangana na Khotsi awe. Ḽeneḽo fulufhelo ḽo khwaṱhisa Yesu musi o sedzana na zwiimo zwi konḓaho. Ri tea u ita zwi fanaho. Na riṋe ri na dakalo ḽo vhewaho phanḓa hashu. Yehova o ṋea muṅwe na muṅwe washu ndugelo ya u thusa u ita uri dzina ḽawe ḽihulwane ḽi khethwe. Ri nga sumbedza uri Sathane ndi muzwifhi nga u khetha Yehova uri a vhe Muvhusahoṱhe washu na nga u ḓivhulungela lufunoni lwa Khotsi ashu hu sa londwi milingo ine ra nga sedzana nayo.

20. Ndi mini zwine zwa nga ni thusa uri ni dzule ni tshi humbula zwithu zwi fhaṱaho na u vha na fulufhelo?

²⁰ Yehova u swela u lambedza vhashumeli vhawe vha fulufhedzeaho. (Yesaya 30:18; Maleaxi 3:10) U takalela u ṋea vhashumeli vhawe zwithu zwo teaho zwine vha zwi tama nga mbilu yoṱhe. (Psalme ya 37:4) Dzulani no livhisa ṱhogomelo kha u ḓadzea ha mafulufhedziso a Mudzimu. Ni songo vhuya na tenda u tshinywa nga mahumbulele mavhi a ḽino shango ḽa Sathane. Arali na ṱhogomela uri muya wa ḽino shango u vho thoma u tshinya muhumbulo na mbilu yaṋu, rabelani Yehova nga mbilu yoṱhe uri a ni ṋee ‘mulalo wawe, u fhiraho u ṱalukanya hoṱhe.’ Wonoyo mulalo wa Mudzimu u ḓo linda mbilu na muhumbulo waṋu.—Vha-Filipi 4:6, 7.

21, 22. (a) Ndi fulufhedziso ḽifhio ḽi takadzaho ḽe ḽa lavhelelwa nga vha “gogo ḽihulu”? (b) Ndi fulufhedziso ḽifhio ḽa Vhukriste ḽe na ḽi lavhelela nga maṱo matswuku nahone no ḓiimisela u ita mini?

 ²¹ Ndi fulufhelo ḽavhuḓi lungafhani ḽine na nga humbula nga haḽo! Arali ni muṅwe wa vha “gogo ḽihulu,” ane a ḓo bva ‘maṱunguni mahulu,’ humbulani nga ha vhutshilo vhune na ḓo ḓiphina ngaho hu si kale. (Ndzumbululo 7:9, 14) Musi Sathane na madimoni awe vho no fheliswa, ni ḓo ḓipfa no rulwa nga nḓila ine zwa nga konḓa uri ni i humbule zwino. A hu na na muthihi kha riṋe a sa athu vhuya a sedzana na mutsiko wa ṱhuṱhuwedzo yo tshinyalaho ya Sathane. Musi wonoyo mutsiko u si tsheeho, zwi ḓo takadza lungafhani u shuma u itela u shandula ḽino ḽifhasi uri ḽi vhe paradiso ri tshi livhiswa nga Yesu na vhavhusi nae vha 144 000! Zwi a nyanyula u vha na fulufhelo ḽa uri malwadze na vhuholefhali hoṱhe zwi ḓo fheliswa, vhafunwa vhashu vha ḓo vuswa mavhiḓani, vha tshila nga nḓila ye Mudzimu a vha o livha uri ri tshile ngayo! Musi ri tshi khou ḓi fhelela nga zwiṱuku nga zwiṱuku, ri ḓo wana malamba mahulwane, fulufhedziso ḽo dzumbululwaho kha Vha-Roma 8:21—‘vhugala ha vhana vha Mudzimu.’

²² Yehova u ṱoḓa uri ni wane mbofholowo i sa ṱalutshedzei. Fhedzi ri fanela u thetshelesa uri ri wane yeneyo mbofholowo. Ri fanela u ḓidina vhukuma ri thetshelese Yehova ḓuvha ḽiṅwe na ḽiṅwe. Nga zwenezwo-ha, bvelani phanḓa ni tshi ḓifhaṱa kha lutendo lukhethwa-khethwa, u itela uri ni dzule lufunoni lwa Mudzimu nga hu sa fheli!