Ha Vhoṱhe Vha Funaho Yehova:

Yesu o ri: “Ndi hone ni tshi ḓo ḓivha mafhungo-ngoho, huno mafhungo-ngoho a ḓo ni vhofholola.” (Yohane 8:32) Eneo maipfi a ṱuṱuwedza lungafhani! Ee, zwi a konadzea u ḓivha mafhungo-ngoho, na kha ano ‘maḓuvha a vhufhelo’ a lemelaho o ḓalaho mazwifhi. (2 Timotheo 3:1) Naa ni kha ḓi zwi humbula musi ni tshi thoma u pfa mafhungo-ngoho o ṱalutshedzwaho ipfini ḽa Mudzimu? Zwi fanela u vha zwo ni takadza lungafhani!

Naho zwi zwa ndeme u vha na nḓivho yo teaho ya mafhungo-ngoho na u a vhudza vhaṅwe tshifhinga tshoṱhe, ri fanela u dovha ra ḓifara u tendelana nao. Uri ri kone u ita zwenezwo, ri fanela u ḓivhulungela lufunoni lwa Mudzimu. Zwenezwi zwi katela na mini? Maipfi e Yesu a a amba vhusikuni ha nga phanḓa ha lufu lwawe a fhindula yeneyi mbudziso. O vhudza vhaapostola vhawe vha fulufhedzeaho uri: “Arali ni tshi ita zwiné milayo yanga ya amba, ndi hone ní kha lufuno lwanga, vhunga na nṋe ndi tshi ita zwiné milayo ya Khotsi-anga ya amba, nda dzula ndí kha lufuno lwawe.”—Yohane 15:10.

Ṱhogomelani uri Yesu o dzula kha lufuno lwa Mudzimu nga u thetshelesa ndaela dza Khotsi awe. Na riṋe ri fanela u ita nga u ralo ṋamusi. U itela uri ri dzule lufunoni lwa Mudzimu, ri fanela u tshila u tendelana na mafhungo-ngoho ḓuvha ḽiṅwe na ḽiṅwe. Nga eneo madekwana, Yesu o ri: “Arali izwo ni  tshi zwi ḓivha, ni na mashudu ni tshi zwi ita.”—Yohane 13:17.

Ri fulufhela nga mbilu yoṱhe uri heyi bugu i ḓo ni thusa uri ni bvele phanḓa ni tshi shumisa mafhungo-ngoho vhutshiloni haṋu nahone na ḓivhulungela ‘lufunoni lwa Mudzimu uri ni wane vhutshilo vhu sa fheli.’—Yuda 21.