Ndima Ya 83

Ú Mvumvuswa nga Mufarisei

YESU u kha ḓi vha muḓini wa Mufarisei a ḓivhaleaho nahone u kha ḓi bva u fhodza muthu o kukumuwaho muvhili. Musi a tshi vhona vhaeni ngae vha tshi khetha madzulo a phanḓa zwiḽiwani, u funza ngudo nga ha u ḓiṱukufhadza.

Zwenezwo Yesu u a ṱalutshedza: “Arali wó vhidzelwa tshimima nga muṅwe-vho, U songo yo dzula kha vhudzulo ha tsini, hu sa ḓo vha hó vhidzwa na ané a U fhira. Huno musi hu tshi ḓa we a vhidza iwe na ene, a vhó amba na iwe a ri: Ṋea hoyo vhudzulo! wa vhó ya vhudzuloni ha kule wó ṱhavhiswa dziṱhoni.”

Ngauralo Yesu u a eletshedza: “Hone arali wó vhidzwa, tshimbila U yo dzula vhudzuloni ha kule, uri musi hu tshi ḓa we a U vhidza, a amba na’we a ri: Khonani yanga, pfuka U sendele ngei phanḓa! ndi hone U tshi ḓo huliswa, vhoṱhe vho dzulaho na iwe vha tshi zwi vhona.” A tshi phetha, Yesu u ri: “Ngauri vhoṱhe vhané vha ḓi-hudza vha ḓo ṱukufhadzwa; ané a ḓi-ṱukufhadza u ḓo huliswa.”

Nga murahu, Yesu u amba na Mufarisei we a mu ramba nahone u ṱalutshedza nḓila ya u lugiselela tshiswiṱulo tshi ṋeaho Mudzimu thendo dza vhukuma. “Arali wó lugisa tshiswiṱulo namusi tshi tshilalelo, U songo vhidza khonani dzau na vha haṋu na mashaka au na vhahura vhau vha vhapfumi; uri vha sa ḓo U vhidza-vho, vha U ṋea-vho zwe wa vha ṋea. Khwine, U tshi ita tshimima U vhidze vhatshinyali na zwihole na vha ṱudzaho na mabofu. Ndi hone U tshi ḓo vha na mashudu; ngauri avho a vha na tsha u U ṋea-vho.”

U ṋea vha si na tshavho zwiḽiwa zwo raloho zwi ḓo ḓisa dakalo kha muṋei ngauri, samusi Yesu a tshi ṱalutshedza muṋe wa muḓi, “U ṋewa-vho hau hu ḓo vha ha musi vho lugaho vha tshi vuwa vhafuni.” U ṱalusa ha Yesu izwi zwiḽiwa zwi ṱhonifheaho zwi humbudza mueni ngae muṅwe mufuda wa zwiḽiwa. Onoyu mueni uri: “Mashudu, ané a ḓo ḽa vhuswa muvhusoni wa Mudzimu!” Naho zwo ralo, a si vhoṱhe vhane vha takalela lwo fanelaho hetsho tshilavhelelwa tshi takadzaho, samusi Yesu a tshi bvela phanḓa u sumbedza vhanzhi.

“A ruma muḓinḓa wawe . . . a amba na vho vhidzwaho a ri: Iḓani, zwoṱhe zwo lugiswa! Vhoṱhe nga muthihi vha thoma u landula. Wa u thoma a ri: Ndo renga tsimu, huno ndi fanela uri ndi bve ndi yo i tandula; ndi a U humbela ndi ri, U ṋyambe U ri ndo landula. Muṅwe a ri: Ndo renga phulu dza dzhogo ṱhanu, ndi khou ya u dzi edzisa; ndi a U humbela ndi ri, U ṋyambe U ri ndo landula. Muṅwe a ri: Ndo vhinga musadzi, ndi tshone tshi nkundisaho u ḓa.”

Ndi zwiitisi zwi sa pfali lungafhani! Tsimu kana zwifuwo kanzhi zwi ṱolisiswa zwi sa athu u rengwa, nga zwenezwo zwo vha zwi songo ṱavhanyiswa zwa vhukuma u zwi sedza nga murahu. Zwi ngaho zwenezwo, mbingano ya muthu a yo ngo fanela u mu thivhela u ṱanganedza u rambiwa huhulwane nga u rali. Ngauralo a tshi pfa zwenezwo zwiitisi, onoyo muṋe u a sinyuwa nahone u laedza muḓinḓa wawe:

“Ṱavhanya U bve U ye mililani na mikotoni ya muḓi; vhatshinyali na zwihole na mabofu na vha ṱudzaho U vha ḓise ngeno ngomu. Muḓinḓa a ri: Murena, zwe wa ndaedza ndo ita; hone vhudzulo vhu tshee hone. Murena a amba na muḓinḓa a ri: Ibvá, U ye magondoni na dzikhurani U vha kombetshedze vha dzhene, uri nnḓu yanga i ḓale. . . . Na muthihi wa vhaḽa vhanna, vhe nda vha vhidza, haho’ ané a ḓo thetshela tshimima tshanga.”

Ndi vhuimo vhufhio vhu ṱalutshedzwaho nga tshenetsho tshifanyiso? Ee, “murena” a lugiselelaho zwiḽiwa u imela Yehova Mudzimu; “muḓinḓa” a rambaho, Yesu Kristo; nahone “tshimima tshihulu,” zwibuli zwa u tendelana na Muvhuso wa ṱaḓulu.

Vhe vha thoma u rambiwa u ḓa uri vha tendelane na Muvhuso, zwihuluhulu vho vha vhe vharangaphanḓa vha vhurereli vha Vhayuda vha misini ya Yesu. Naho zwo ralo, vho hana honoho u rambiwa. Nga zwenezwo, hu tshi thoma zwihuluhulu nga Pentekoste ya 33 C.E., u ramba ha vhuvhili ho iswa kha Vhayuda vha nyadziwaho na vha fhasi. Fhedzi a si vhanzhi vho aravhaho u itela u ḓadzisa zwikhala zwa 144 000 Muvhusoni wa Mudzimu wa ṱaḓulu. Nga zwenezwo nga 36 C.E., nga murahu ha miṅwaha miraru na tshipiḓa, u ramba ha vhuraru na ha u fhedza ho iswa na kha vha si Vhayuda vha songo rubaho, nahone u kuvhanganywa ha vhenevho ho bvela phanḓa u swika misini yashu. Luka 14:1-24.

▪ Ndi ngudo ifhio ya u ḓiṱukufhadza ine Yesu a i funza?

▪ Muṋe wa muḓi a nga lugiselela hani zwiḽiwa zwine zwa ṋea Mudzimu thendo, nahone ndi ngani zwi tshi ḓo mu ṋea dakalo?

▪ Ndi ngani zwiitisi zwa u sa ḓa zwa vhaeni vho rambiwaho zwi sa pfali?

▪ Ndi mini tshi imelwaho nga tshifanyiso tsha Yesu tsha “tshimima tshihulu?”