Ndima Ya 6

Ṅwana wa Fulufhedziso

NṰHANI ha u humela Nazareta, Yosefa na Maria vha dzula Betlehema. Nahone musi Yesu e na maḓuvha a malo, vha a mu rubisa, samusi Mulayo wa Mudzimu wo ṋewaho Mushe u tshi laedza. Zwi vhonala hafhu u mukhuvha u ira ṅwana wa mutukana dzina ḽawe nga ḓuvha ḽa vhumalo. Ngauralo vha ira ṅwana wavho dzina ḽa Yesu, samusi Gabriele o vha laedza u thomani.

Hu fhira tshifhinga tshine tsha ṱoḓa u vha ṅwedzi, nahone Yesu u na maḓuvha a 40. Zwino vhabebi vhawe vha mu isa ngafhi? Nḓuni khethwa kha ḽa Yerusalema, hune ha tou vha khilomithara dzi si gathi u bva hune vha khou dzula hone. U ya nga Mulayo wa Mudzimu wo ṋewaho Mushe, nga murahu ha maḓuvha a 40 musi wo no beba murwa, mme u fanela uri a ṋekedze tshidzimu tsha u kunakiswa nḓuni khethwa.

Ndi zwine Maria a zwi ita. U ḓisa maivha mavhili maṱuku, sa tshidzimu tshawe. Hezwi zwi sumbedza zwiṅwe zwithu malugana na vhuimo ha zwa ikonomi ha Yosefa na Maria. Mulayo wa Mushe u sumbedza uri hu fanela u ṋekedzwa ngwana, i re na ndeme nga ho engedzeaho u fhira zwiṋoni. Fhedzi arali mme a si nayo, maivha-muronzhe mavhili kana maivha mavhili a ḓo vha o eḓana.

Nḓuni khethwa muṅwe mukalaha u dzhia Yesu a mu kuvhatedza. Dzina ḽawe ndi Simeoni. Mudzimu o mu dzumbululela uri ha nga fi musi a sa athu u vhona Kristo, kana Messia o fulufhedziswaho nga Yehova. Musi Simeoni a tshi ḓa nḓuni khethwa nga heḽi ḓuvha, o livhiswa nga muyamukhethwa kha ṅwana o takulwaho nga Yosefa na Maria.

Musi Simeoni a tshi takula Yesu u livhuha Mudzimu, a tshi ri: “Muṋe wanga, zwino wo vhofholola mulanda wau uri a ṱuwe ó rudza mbilu vhunga wó amba; nangoho maṱo anga o vhona tshitshidzi tshau, tshe wa tshi itela tshakha dzoṱhe, Tshedza tsha u vhonetshela vha nnḓa, thendo ya vhathu vhau vha Isiraele.”

Yosefa na Maria vha a akhamala musi vha tshi pfa hezwi. Zwenezwo Simeoni u a vha fhaṱutshedza nahone u amba na Maria uri ṅwana wawe “o vhewa uri a vhe tshiwisi na tshivusi tsha vhanzhi vha Isiraele” na uri vhuṱungu, u fana na pfumo ḽi fhiraho, vhu ḓo rumbula mbilu yawe.

A re hone nga hetshi tshifhinga ndi muporofita wa musadzi a re na miṅwaha ya 84 ane a pfi Ana. Zwi re zwone ndi uri ha fhidzi u vha hone nḓuni khethwa. Nga tshenetsho tshifhinga u a sendela tsini nahone u thoma u livhuha Mudzimu na u amba nga ha Yesu kha vhoṱhe vho thetshelesaho.

Yosefa na Maria vha takalela hezwi zwiitea zwoṱhe nḓuni khethwa! Vhukuma, hezwi zwoṱhe zwi vha khwaṱhisela uri onoyo ṅwana ndi Ene o Fulufhedziswaho wa Mudzimu. Luka 2:21-38; Levitiko 12:1-8.

▪ Ndi lini hune zwa vhonala zwi mukhuvha u ṋea ṅwana wa mutukana wa Isiraele dzina ḽawe?

▪ Ndi mini zwe zwa vha zwi tshi ṱoḓea kha mme wa Muisiraele musi murwa wawe o no vha na maḓuvha a 40, nahone u itwa ha iyi ṱhoḓea hu dzumbulula vhuimo ha zwa ikonomi ha Maria nga nḓila-ḓe?

▪ Ndi vhonnyi vhane vha limuha zwine Yesu a vha zwone nga itshi tshifhinga, nahone izwi vha zwi sumbedza hani?