Ndima Ya 94

Ṱhoḓea ya U Rabela na ya U Ḓiṱukufhadza

U THOMANI, musi e Yudea, Yesu o amba tshifanyiso nga ha vhuhulwane ha u futelela thabeloni. Zwino, lwendoni lwawe lwa u fhedza lu yaho Yerusalema, u dovha a ombedzela ṱhoḓea ya u sa litsha u rabela. Khamusi Yesu u tshee Samaria kana Galilea musi a tshi vhudza vhafunziwa vhawe hetshi tshiṅwe tshifanyiso:

“Kha muṅwe muḓi ho vha hu na muhaṱuli we a vha a sa ofhi Mudzimu, a sá londi na muthu. Muḓini wonoyo ho vha hu na muthu wa tshilikadzi. Uyo a ḓi ḓa ha muhaṱuli a ri: Ndamulele, ndi na swina ḽanga! Muhaṱuli a hana ka-nzhi; a vhuya a elekanya a ri: Naho ndi sa ofhi Mudzimu, na vhathu ndi sa vha londi, ndi ḓo mu lamulela, ngauri u a nnetisa, musadzi uyu; a ḓo vhuya a nṱhupha.”

Zwenezwo Yesu u ṱalutshedza tshifanyiso tshawe, a tshi ri: “Ipfani zwe muhaṱuli a songo lugaho a amba. Mudzimu a nga litsha hani u lamulela vhanangiwa vhawe vha mu vhidzaho masiari na vhusiku, naho ó lenga.”

Yesu ha khou amba uri Yehova Mudzimu u fana na muhaṱuli a songo lugaho. Nṱhani hazwo, arali muhaṱuli a songo lugaho a tshi nga kona u aravha kha dzenedzo khumbelo dzi bvelaho phanḓa, a zwi faneli u timatimisa uri Mudzimu, o lugaho tshoṱhe na wavhuḓi, u ḓo fhindula musi vhathu vhawe vha sa litshi u rabela. Ngauralo Yesu u bvela phanḓa uri: “Ndi a ni vhudza ndi ri: [Mudzimu] u ḓo ṱavhanya u vha lamulela.”

Kanzhi khaṱulokwayo a i ṋewi vha ḓiṱukufhadzaho na vhashayi, hu uri vha re na maanḓa na vho pfumaho kanzhi vha a thakhiwa. Naho zwo ralo, Mudzimu ha nga ḓo ita fhedzi uri vhavhi vha ṱarafiwe zwo vha tea, fhedzi u ḓo ita vhungoho ha uri vhashumeli vhawe vha haṱulwe nga khaṱulokwayo nga u vha ṋea vhutshilo vhu sa fheli. Fhedzi ndi vhathu vhangana vhane vha tenda vho khwaṱhisa uri Mudzimu u ḓo ḓisa khaṱulokwayo nga u ṱavhanya?

A tshi ambela nga ho khetheaho kha lutendo lu tshimbidzanaho na maanḓa a thabelo, Yesu u a vhudzisa: “Hone, Murwa-muthu a tshi ḓa, naa ni ri u ḓo wana hú na lutendo naa?” Naho heyi mbudziso yo litshwa i songo fhindulwa, fhedzi ṱhalutshedzo i nga kha ḓi vha i uri lutendo lwo raloho lu ḓo vha lu songo anda musi Kristo a tshi swika maanḓani a Muvhuso.

Vhukati ha vhane vha khou thetshelesa Yesu hu na vhane vha ḓipfa vhe kha lutendo lwo teaho. Vha a ḓifulufhela uri vho luga, nahone vha sedzela vhaṅwe fhasi. Vhaṅwe vha vhafunziwa vha Yesu vha nga kha ḓi katelwa na kha hetshi tshigwada. Nga zwenezwo u livhisa tshifanyiso tshi tevhelaho kha vho raloho:

“Vhathu vhavhili vho vhuya vha gonya nḓuni khethwa u yo rabela, muṅwe e Mufarisei, muṅwe e wa-lutho. Mufarisei a ima a rabela a ri: Mudzimu, ndi a U livhuha zwiné ndi si fane na vhaṅwe vhathu: vha mavemu, vha so ngo lugaho, dziphombwe, namusi e hoyu wa-lutho. Ndi ḓi-dzima zwiḽiwa luvhili nga vhege; zwoṱhe zwiné nda vha nazwo’, kha fumi ḽazwo ndi U bvisela tshithihi.”

Vhafarisei vha ḓivhelwa u ṱongisa u luga havho na u takadza vhaṅwe. Maḓuvha avho o ḓoweleaho a u ḓidzima havho ha vhufhura ndi nga Misumbuluwo na Ḽavhuṋa, nahone nga vhufhura vha ita na u bvisa tsha fumi na kha miroho miṱukuṱuku ya tsimuni. Miṅwedzi i si gathi yo fhiraho, u nengwa havho vhathu zwavho ho vhonala vhukatini ha Vhuṱambo ha Mishasha musi vha tshi ri: “Vhathu fhedzi vha sá ḓivhiho mulayo [ndi uri, ṱhalutshedzo ye Vhafarisei vha i ṋea wone] ndi vhone vho xedzwaho.”

A tshi isa phanḓa tshifanyiso tshawe, Yesu u amba nga ha onoyo o “xedzwaho”: “Wa-lutho a ima nga kule, á sa funi na u takusela maṱo ṱaḓulu; a sokou rwa khana yawe a ri: Mudzimu, mpfumelele nṋe mu-ita-zwivhi!” Nge wa-lutho a tenda nga u ḓiṱukufhadza nga ha vhushayanungo hawe, Yesu u ri: “Ndi a ni vhudza ndi ri: Hoyu o tsela nḓuni yawe zwó mu nakela, zwi tshi fhira zwa houḽa. Ngauri ané a ḓi-hudza, u ḓo ṱukufhadzwa; ané a ḓi-ṱukufhadza, u ḓo huliswa.”

Nga zwenezwo Yesu u dovha a ombedzela ṱhoḓea ya u ḓiṱukufhadza. Nge vha aluswa vhathuni vhane vha ṱuṱuwedzwa nga Vhafarisei vha ḓiitaho vho lugaho na hune vhuimo ha nṱha zwa ombedzelwa tshifhinga tshoṱhe, a zwi mangadzi uri na vhafunziwa vha Yesu na vhone vha a kwamea. Nga zwenezwo, ndi ngudo dzavhuḓi lungafhani dza u ḓiṱukufhadza dzine Yesu a dzi funza! Luka 18:1-14; Yohane 7:49.

▪ Ndi ngani muhaṱuli a songo lugaho a tshi thetshelesa khumbelo ya tshilikadzi, nahone ndi pfunzo ifhio ine ya funzwa nga tshifanyiso tsha Yesu?

▪ Yesu u ḓo ṱoḓa lutendo lufhio musi a tshi vhuya?

▪ Yesu u livhisela kha vhafhio tshifanyiso tshawe nga ha Mufarisei na wa-lutho?

▪ Ndi mavhonele afhio a Vhafarisei ane a fanela u iledzwa?