Ndima Ya 81

Dziṅwe Ndingedzo dza u Vhulaha Yesu

SAMUSI vhu vhuriha, Yesu u khou tshimbila fhethu ho tsireledzeaho hu ḓivhiwaho sa guḓani ḽa Salomo. Ndi nga thungo ha thembele. Henefha Vhayuda vha mu tanga nahone vha thoma uri: “U ḓo dzula wo faredza mimuya yashu wa guma’fhi? Arali Ú Kristo ri vhudze zwi pfale.”

Yesu u a fhindula, “Ndo ni vhudza, ni si tende.” Yesu ho ngo vha vhudza lwo livhaho uri ndi ene Kristo, sa zwe a vhudza musadzi wa Musamaria tshisimani. Naho zwo ralo, o dzumbulula u ḓiṱalusa hawe musi a tshi vha ṱalutshedza uri u bva ṱaḓulu nahone o vha e hone musi Abrahamu a sa athu u vha hone.

Naho zwo ralo, Yesu u ṱoḓa vhathu vha tshi ḓiphethela uri ndi ene Kristo nga u vhambedza mishumo yawe na ye Bivhili ya dzula yo amba uri Kristo o vha a tshi ḓo i ita. Ndi ngazwo u thomani o laedza vhafunziwa vhawe uri vha si vhudze muthu uri ndi ene Kristo. Nahone ndi ngazwo a tshi bvela phanḓa u vhudza havha Vhayuda vha re na vengo uri: “Mishumo iné nda shuma nga dzina ḽa Khotsi-anga ndi yone ine ya nṱanzielela. Hone inwi a ni tendi.”

Ndi ngani vha sa tendi? Nga ṅwambo wa u sa vha na vhuṱanzi ha uri Yesu ndi Kristo? Hai, fhedzi nga tshiitisi tshine Yesu a tshi ṋea musi a tshi vha vhudza uri: “A ni nngu dzanga; ndi zwe nda ni vhudza. Nngu dzanga dzi pfa ipfi ḽanga; nṋe ndi a dzi ḓivha, huno dzi a ntevhela. Huno nṋe ndi dzi ṋea vhutshilo vhu sa fheli; a dzi nga lovhi na lini na lini; a huna ane a ḓo dzi thuba tshanḓani tshanga. Ene Khotsi o nṋeaho nngu dzanga ndi muhulwane kha vhoṱhe, huno a huna a konaho u dzi thuba tshanḓani tsha Khotsi.”

Zwenezwo Yesu u ṱalusa vhushaka hawe ha tsini-tsini na Khotsi awe, a tshi ṱalutshedza: “Nṋe na Khotsi ri vhathihi.” Samusi Yesu e kha ḽifhasi nahone Khotsi awe e ṱaḓulu, zwi tou vha khagala uri ha khou amba uri ene na Khotsi awe ndi vhathihi nga lwa thevhedzaipfi, kana nga lwa ṋama. Nṱhani hazwo, u amba uri ndi vhathihi nga ndivho, uri vha na vhuthihi.

Vho sinyuswa nga maipfi a Yesu, Vhayuda vha doba matombo a u mu vhulaha, u fana na zwe vha ita u thomani, vhukatini ha Vhuṱambo ha Mishasha. A tshi livhana nga tshivhindi na vhe vha vha vha tshi ḓo mu vhulaha, Yesu u ri: “Ndo ni vhonisa mishumo minzhi yavhuḓi; ni tshi nkanḓa nga matombo ni itela mushumo ufhio we nda ita?”

Vha a fhindula: “A ri U kanḓi nge wa ita mishumo yavhuḓi, ri U kanḓa nge wa sema Mudzimu ngeno Ú muthu.” Samusi Yesu a songo vhuya a ḓivhidza mudzimu, ndi ngani Vhayuda vha tshi amba zwenezwi?

Zwi vhonala uri ndi nga ṅwambo wa uri Yesu u na maanḓa ane vha tenda uri ndi a Mudzimu fhedzi. Sa tsumbo, o sokou amba nga ha “nngu” uri, “ndi dzi ṋea vhutshilo vhu sa fheli,” zwine hu si vhe na muthu ane a nga zwi ita. Naho zwo ralo, Vhayuda vha nyadza mbuno ya uri Yesu u tenda uri u wana maanḓa a bvaho ha Khotsi awe.

Uri Yesu u ḓiamba uri ndi muṱuku kha Mudzimu, u dovha a sumbedza nga u vhudzisa uri: “Naa mulayoni [kha Psalme ya 82:6] a ho ngo ṅwalwa ha pfi: ndo amba nda ri ni vhadzimu? Huufha vhaḽa vho vhudzwaho fhungo ḽa Mudzimu vha tshi pfi Vhadzimu, . . . zwino nṋe we Khotsi a ṋyita mukhethwa, a nthuma nda ḓa shangoni, ni ri ndi sema Mudzimu ndi tshi ri: Ndi̗ Murwa wa Mudzimu?”

Samusi Maṅwalo a tshi vhidza na vhahaṱuli vha vhathu vha songo lugaho “vhadzimu,” ndi vhukhakhi vhufhio vhune vhenevha Vhayuda vha nga vhu wana kha Yesu nga u amba uri, “Ndi̗ Murwa wa Mudzimu?” Yesu u a engedza: “Arali ndí sa shumi mishumo ya Khotsi-anga, ni nga litsha zwaṋu u ntenda. Huno arali ni sa tendi nṋe, tendani-ha mishumo iné nda khou i shuma, uri ni ṱalukanye ni zwi ḓivhe zwauri Khotsi u kha nṋe, huno nṋe ndi kha Khotsi.”

Musi Yesu a tshi amba zwenezwi, Vhayuda vha lingedza u mu fara. Fhedzi a ponyoka, sa zwe a ita mathomoni Vhuṱamboni ha Mishasha. U a ṱuwa Yerusalema nahone u tshimbila nga vhukati ha Mulambo wa Yorodane u swika he Yohane a thoma hone u lovhedza hu ṱoḓaho u vha miṅwaha miṋa yo fhiraho. Hafha fhethu zwi vhonala hu si kule na vhugabeloni ha tshipembe ha Lwanzhe lwa Galilea, lwendo lwa maḓuvha mavhili kana o engedzeaho u bva Yerusalema.

Vhathu vhanzhi vha ḓa ha Yesu henefha nahone vha thoma uri: “Yohane naho á so ngo vhuya a ita vhuṱolo, hone zwe a ri vhudza a tshi amba uyu, ndi mafhungo-ngoho zwoṱhe.” Zwenezwo vhanzhi vha tenda Yesu kha hezwi. Yohane 10:22-42; 4:26; 8:23, 58; Mateo 16:20.

▪ Yesu u ṱoḓa uri vhathu vha mu ṱalule nga mini sa Kristo?

▪ Yesu na Khotsi awe ndi vhathihi hani?

▪ Ndi ngani zwi tshi vhonala uri Vhayuda vha ri Yesu u khou ḓiita mudzimu?

▪ Muredzo wa Yesu u bvaho kha Dzipsalema u sumbedza hani uri ha khou ṱoḓa u eḓana na Mudzimu?