Ndima Ya 95

Dzingudo nga ha U Ṱala na nga ha U Funa Vhana

YESU na vhafunziwa vhawe vha nḓilani i yaho Yerusalema u itela u ḽa Paseka ya 33 C.E. Vha pfuka Mulambo wa Yorodane nahone vha fara nḓila i fhiraho nga tshiṱirikini tsha Perea. Yesu o vha e Perea dzivhege dzi si gathi dzo fhiraho, fhedzi nga tshenetsho tshifhinga o ḓo vhidzwa Yudea ngauri khonani yawe Lazaro o vha a tshi lwala. Musi e Perea, Yesu o amba na Vhafarisei nga ha u ṱala, nahone zwino vha dovha vha vusa eneo mafhungo.

Vhukati ha Vhafarisei hu na zwikolo zwa mihumbulo yo fhamba-fhambanaho nga ha u ṱala. Mushe o amba uri musadzi a nga ṱaliwa nga ṅwambo wa “zwi sa ḓivhalei kha ene.” Vhaṅwe vha tenda uri hezwi zwi ambela kha u sa kuna fhedzi. Fhedzi vhaṅwe vha dzhia “zwi sa ḓivhalei” zwi tshi katela na u khakha huṱukuṱuku. Nga zwenezwo, vha tshi itela u linga Yesu, Vhafarisei vha a vhudzisa: “Naa ndi zwone naa arali munna a tshi ṱala musadzi wawe arali hú na tshe a mu dina ngatsho’?” Vha na vhungoho ha uri naho tshi tshini tshine Yesu a ḓo tshi amba tshi ḓo mu dzhenisa khakhathini na Vhafarisei vhane vha vha na mavhonele o fhambanaho na awe.

Yesu u fhindula yeneyo mbudziso nga vhuṱali, a sa ambi nga ha muhumbulo naho u ufhio wa muthu, fhedzi a tshi amba nga ha nḓila ye u thomani mbingano ya vha yo itiswa zwone. U a vhudzisa: “Naa a no ngo vhala zwauri, o vhumbaho muthu, o mbo ḓi vhumba munna na musadzi, a amba a ri: Ndi zwone zwiné munna a ḓo ṱutshela khotsi-awe na mme-awe ngazwo’ a nambatela musadzi wawe; huno vhuvhili havho vha ḓo vha ṋama nthihi! Ndi zwone-ha a vha tsha ḓo vha vhavhili, vha ḓo vha ṋama nthihi. Huno zwino, zwo vhofhekanywaho nga Mudzimu muthu a songo zwi fhandakanya.”

Yesu u sumbedza uri ndivho ya Mudzimu ya u thoma, ndi uri vho vhinganaho vha dzule vhoṱhe, uri vha si ṱale. Arali izwo zwo ralo, Vhafarisei vha a aravha, “Mushe huufha ó ri laya u mu ṋea luṅwalo lwa u ṱala na u mu fheletshedza?”

Yesu u a fhindula: “Mushe a tshi ni tendela u ṱala vhasadzi vhaṋu o itela dzimbilu dzaṋu dzi konḓaho; kale hazwo zwo vha zwí songo ralo.” Ee, musi Mudzimu a tshi thoma tshilinganyo tsha ngoho tsha mbingano tsimuni ya Edeni, ho ngo lugiselela na u ṱala.

Yesu u bvela phanḓa u vhudza Vhafarisei uri: “A vha nṋe ndi ri: Ané a vhuya a ṱala musadzi wawe nga tshiṅwe arali hú si vhupombwe [u bva kha Lugerika, por·neiʹa], a dzea muṅwe, u ita vhupombwe.” Nga zwenezwo u sumbedza uri por·neiʹa, zwine zwa vha u ḓifara huvhi ha u ṱangana nga dzimbeu ho vhifhesaho, ndi tshone tshiitisi tshi tendelwaho nga Mudzimu tsha u ṱala.

Vha tshi ṱhogomela uri mbingano i fanela u vha mbofho ya nga hu sa gumi ine ha vha na mutheo muthihi fhedzi wa u ṱala, vhafunziwa vha sudzulusea u ri: “Arali mafhungo a munna na musadzi ó ralo, hu nga vha khwine arali muthu a sa dzei.” A zwi timatimisi uri ane a khou humbula nga ha mbingano u fanela u ṱhogomela nga ho dzikaho uri mbofho ya mbingano ndi ya nga hu sa gumi!

Yesu u bvela phanḓa u amba nga ha u sa vha mbinganoni. U ṱalutshedza uri vhaṅwe vhatukana vha bebwa vhe dzikhombe, vha sa koni u vhinga nga ṅwambo wa uri vha si na vhukoni kha zwa u ṱangana nga dzimbeu. Vhaṅwe vho itwa dzikhombe nga vhathu, vho holefhadzwa lwa tshiṱuhu kha sia ḽa zwa u ṱangana nga dzimbeu. Mafheleloni, vhaṅwe vha a ḓifara kha lutamo lwa u vhinga na kha u ṱangana nga dzimbeu u itela uri vha ḓiṋekedze nga vhuḓalo kha mafhungo a tshimbidzanaho na Muvhuso wa ṱaḓulu. Yesu u phetha nga uri: “A konaho u dzula e khombe [e siho mbinganoni] nga a ralo.”​—NW.

Zwino vhathu vha thoma u ḓisa vhana vhavho ha Yesu. Naho zwo ralo, vhafunziwa vha dzivhisa vhana nahone vha lingedza u vha pandela, lu sa timatimisi vha tshi ṱoḓa u tsireledza Yesu kha mutsiko u sa ṱoḓei. Fhedzi Yesu u ri: “Litshani vhana vha ḓe ha nṋe; ni songo vha dzivhisa, ngauri muvhuso wa Mudzimu ndi wa vha u ralo. Ngoho, ndi a ni vhudza, arali muthu á sa ṱanganedzi muvhuso wa Mudzimu vhunga ṅwana, ha nga dzheni khawo’.”

Yesu u ṋea ngudo dzavhuḓi lungafhani! U itela uri ri ṱanganedze Muvhuso wa Mudzimu, ri fanela u edzisa u ḓiṱukufhadza na u funzea ha vhana vhaṱuku. Fhedzi tsumbo ya Yesu i dovha ya sumbedza uri ndi zwihulwane lungafhani, zwihuluhulu kha vhabebi, u fhedza tshifhinga vhe na vhana vhavho. Zwino Yesu u sumbedza lufuno lwawe kha vhana vhaṱuku nga u vha kuvhatedza na u vha fhaṱutshedza. Mateo 19:1-15; Doiteronomio 24:1; Luka 16:18; Marko 10:1-16; Luka 18:15-17.

▪ Ndi mavhonele afhio o fhamba-fhambanaho ane Vhafarisei vha vha nao nga ha u ṱala, nahone vha linga Yesu hani?

▪ Yesu u sedzana hani na u lingwa hawe nga Vhafarisei, nahone u vha ṋea mini sa tshone tshiitisi fhedzi tsha u ṱala?

▪ Ndi ngani vhafunziwa vha Yesu vha tshi ri ndi khwine u sa vhinga, nahone ndi u ambelela hufhio hune Yesu a hu ṋea?

▪ Ndi mini zwine Yesu a ri funza zwone nga ha u shumisana hawe na vhana?