Ndima Ya 78

Dzulani No Luga!

MUSI o no sevha magogo nga ha vhupangwa, na u eletshedza vhafunziwa vhawe nga ha u sa vhilaela zwi songo fanela nga ha zwithu zwi vhonalaho, Yesu u a khuthadza: “U si ofhe iwe sambi ḽiṱuku, ngauri zwi funwaho nga Khotsi ndi u ni fha muvhuso.” Zwenezwo a dzumbulula uri ndi vha tshivhalo tshiṱuku fhedzi (vhe nga murahu vha ṱalulwa sa vha 144 000) vhane vha ḓo vha Muvhusoni wa ṱaḓulu. Vhunzhi ha vhane vha ṱanganedza vhutshilo vhu sa fheli vha ḓo vha vhalanda vha wonoyo Muvhuso vha kha ḽifhasi.

Ndi tshifhiwa tshavhuḓi lungafhani, “muvhuso”! A tshi ṱalusa maaravhele o fanelaho ane vhafunziwa vha fanela u vha nao musi vho no u ṱanganedza, Yesu u a vha khadeledza: “Rengisani thakha yaṋu ni ṋee vhatshinyali.” Ee, vha fanela u shumisa thundu yavho u itela u vhuyedza vhaṅwe muyani nahone nga zwenezwo vha fhaṱe “lupfumo lu sá fheleli lwa ngei ṱaḓulu.”

Lu tevhelaho Yesu u khuthadza vhafunziwa vhawe u dzula vho ḓilugisela u vhuya hawe. U ri: “Dzulani nó ḓi-vhofha khundu, na mbone dzi tshi duga. Ni nge vhathu vho lindelaho muṋe wavho, ané a tshi bva vhuṱamboni a ḓa a omba-omba, vha kona u ṱavhanya u mu vulela. Mashudu, vhaṱhannga vhané muṋe wavho musi a tshi ḓa a vha wana vhó fhaṱuwa. Ngoho ndi a ni vhudza, u ḓo ganya nguvho a ri vha dzule zwiḽiwani, a ḓa a vha kanzwa.”

Kha hetshi tshifanyiso, u dzula vho ḓilugisa ha vhashumeli vha muṋe u swika a tshi vhuya hu vhonala nga musi vhashumi vha tshi kanyela nguvho dzavho khunduni nahone vha bvela phanḓa u ita mishumo yavho u swikela ḽi tshi kovhela vha tshi shumisa mbone dzavho dzo ḓalaho mapfura. Yesu u a ṱalutshedza: ‘Mashudu vhane muṋe wavho naho a tshi ḓa nga tshikhathi tsha vhuvhili [hu ṱoḓaho u vha u bva kha iri ya ṱahe vhusiku u swika vhukati ha vhusiku] kana tsha vhuraru [u bva vhukati ha vhusiku u swika nga iri ya vhuraru nga matsheloni] tsha vhusiku a vha wana vhó luga.’

Muṋe u ṋea vhashumeli vhawe malamba nga nḓila i songo ḓoweleaho. U vha dzudza zwiḽiwani a thoma u vha kanzwa. U vha fara hu si sa dziphuli, fhedzi sa khonani dzi fulufhedzeaho. Ndi malamba avhuḓi lungafhani a u bvela havho phanḓa vha tshi shumela muṋe wavho vhusiku hoṱhe vha tshi lindela a tshi vhuya! Yesu u fhedza nga uri: “Na inwi dzulani nó ḓi-lugisa, ngauri a ni ḓivhi tshikhathi tshiné Murwa-muthu a ḓo ḓa ngatsho’.”

Zwino Petro u a vhudzisa: “Murena, tshifanyiso itsho U vhudza riṋe kani, kana U vhudza vhoṱhe?”

Nṱhani ha uri a fhindule nga u tou livha, Yesu u vha itela tshiṅwe tshifanyiso. U a vhudzisa: “Mukoma a fulufhedzeaho wa vhuṱali ndi nnyi, ane muṋe wawe a mu vhea uri a vhuse vhalanda vhawe a vha ṋee mikovhe yavho nga tshifhinga tshazwo. Mashudu, mukoma uyo, arali muṋe wawe a tshi ḓa a mu wana a tshi ralo. Ngoho, ndi a ni vhudza, u ḓo mu kumedza thakha yawe yoṱhe a i vhuse.”​—NW.

“Muṋe” zwi tou vha khagala uri ndi Yesu Kristo. “Mukoma” u fanyisela vha “sambi ḽiṱuku” ḽa vhafunziwa sa tshigwada, nahone “vhalanda” hu ambiwa nga tshigwada tshenetsho tsha vha 144 000 vhane vha ṱanganedza Muvhuso wa ṱaḓulu, fhedzi hoyu mubulo u ombedzela mushumo wavho nga muthu nga muthihi. “Thakha” ine mukoma a fulufhedzeaho a ṋewa yone uri a i vhuse ndi madzangalelo a vhuhosini a muṋe a re kha ḽifhasi, ane a katela na vhalanda vha Muvhuso vha re kha ḽifhasi.

A tshi bvela phanḓa na tshenetsho tshifanyiso, Yesu u sumbedza uri zwi nga konadzea uri vhaṅwe vha tshigwada tsha mukoma vha si fulufhedzee, a tshi ṱalutshedza: “Mukoma uyo ngavhe a ambe mbiluni yawe a ri: Muṋe wanga u a lenga u vhuya! a thoma u rwa vhaṱhannga na vhasidzana, a ḽa a nwa a kambiwa, Muṋe wawe u ḓo ḓa musi á so ngo zwi humbula, nga tshikhathi tshiné a si tshi ḓivhe, . . . onoyo u ḓo rwiwa nga ṱhamu nnzhi.”

Yesu u amba uri u ḓa hawe ho ḓisa tshifhinga tshi vhavhaho kha Vhayuda, samusi vhaṅwe vha tshi ṱanganedza pfunzo dzawe vhaṅwe vha sa dzi ṱanganedzi. Nga miṅwaha miraru yo fhiraho, o lovhedzwa maḓini, fhedzi zwino ndovhedzo yawe lufuni i khou ya u fhelani, nahone u vho ri: “Ndi kha ḓi vha ndo farwa nga nyofho ngafha’ni í sa thu u vuledzwa!”

Musi o no vhudza vhafunziwa vhawe hezwi zwithu, Yesu a dovha a amba na magogo. U pfiswa vhuṱungu nga tshipimbi tshavho vha sa funi u ṱanganedza vhuṱanzi ha uri ndi nnyi na zwine ha amba zwone. U ri: “Musi ni tshi vhona gole ḽó takuwa thungo ya Vhukovhela, ni ḓo ri: Mvula i ḓo na! nangoho ya na. Huno musi muya u tshi bva thungo ya Vhurwa ni ri: Ḓuvha ḽi ḓo fhisa! Nangoho ḽa fhisa. Inwi vhadzia-u-ḓi-fhura! Kudzulele kwa zwa ṱaḓulu na zwa fhasi ni a kona u ku sedza; huno tshifhinga tshino ndi mini ni sa tshi sedzi?” Luka 12:32-59.

▪ Ndi vhangana vhane vha vhumba vha “sambi ḽiṱuku,” nahone vha ṱanganedza mini?

▪ Yesu u ombedzela hani ṱhoḓea ya uri vhafunziwa vhawe vha dzule vho luga?

▪ Kha tshifanyiso tsha Yesu, “muṋe,” “mukoma,” “vhalanda,” na “thakha” ndi vhonnyi?