Ndima Ya 117

E Vhuṱunguni Tsimuni

MUSI Yesu a tshi fhedza u rabela, ene na vhaapostola vhawe vha 11 vha fulufhedzeaho vha imba nyimbo dza u renda Yehova. Zwenezwo vha bva nḓuni ya nṱha, vha bvela kha swiswi ḽo dzikaho ḽa vhusiku, nahone vha vhuyelela ngei seli ha Govha ḽa Kidironi vho livha ḽa Bethania. Fhedzi vhe nḓilani, vha ima fhethu hune vha hu takalela, tsimuni ya Getsemane. I muvhunduni wa Thavha ya Miṱwari. Yesu o vha a tshi anzela u ṱangana na vhaapostola vhawe henefha vhukati ha miri ya miṱwari.

A tshi sia vhaapostola vha malo​—khamusi tsini na khoro ya tsimu​—u a vha laya: “Dzulani afha ndi range u yo rabela fhaḽa.” Zwenezwo a dzhia vhaṅwe vhararu​—Petro, Yakobo, na Yohane—​nahone a tshimbilela vhukati ha tsimu. Yesu u thoma u ṱungufhala na u tetemela. U a vha vhudza a ri: “Muya wanga wo ṱungufhala tshoṱhe lwa u isa lufuni. Dzulani afha ni tshese na nṋe.”

A tshi fhirela phanḓanyana, Yesu u wela fhasi nahone tshifhaṱuwo tshawe tsho kwatamela fhasi a thoma u rabela o ḓiṋekedzela a ri: “Khotsi-anga! arali zwi tshi konea, tshinwelo itshi kha tshi nṱutshele. Hone, hu songo itwa zwi funwaho nga nṋe; hu itwe zwi funwaho nga iwe.” Naa u amba mini? Ndi ngani a tshi “ṱungufhala tshoṱhe lwa u isa lufuni”? Naa u khou landula phetho yawe ya u fa na u ṋekedza tshirengululi?

Na kathihi! Yesu ha khou humbela uri a songo tsha fa. Na muhumbulo wa u shavha lufu lwa tshiṱhavhelo, we wa vhuya wa ambiwa nga Petro, u a mu nengisa. Nṱhani hazwo, u vhuṱunguni ngauri u tshuswa nga nḓila ine zwenezwino a ḓo fa ngayo​—sa ḽivemu ḽivhi​—zwi ḓo ḓisa samba kha dzina ḽa Khotsi awe. Zwino u a zwi ṱhogomela uri nga awara dzi si gathi dzi ḓaho u ḓo vhambiwa kha danda sa muthu muvhi vhukuma​—ndi samba ḽingafhani kha Mudzimu! Hezwi ndi zwone zwine zwa mu dina.

Musi Yesu o no rabela tshifhinga tshilapfu, u a vhuya a wana vhaapostola vhararu vha tshi khou kumedza. A tshi amba na Petro, u ri: “Naa ni kundwa u dzedza na nṋe tshikhathi tshithihi zwatsho naa? Fhaṱuwani ni rabele uri ni si dzhene milingoni.” Naho zwo ralo, a tshi ṱhogomela mutsiko we vha vha vhe fhasi hawo na uri ḽo vha ḽo no vha vhusikusa, u ri: “Muya wone u a funa, ṋama yone i ro shaya maanḓa.”

Zwenezwo Yesu a vhuyelela lwa vhuvhili nahone a humbela Mudzimu uri a bvise “tshinwelo itshi” khae, ndi uri, mushumo we Yehova a mu ṋea wone. Musi a tshi vhuya, u dovha a wana havha vhararu vho eḓela nṱhani ha uri vha vhe vha tshi khou rabela uri vha si dzhene milingoni. Musi Yesu a tshi amba navho, a vha ḓivhi zwine vha fanela u mu fhindula ngazwo.

Mafheleloni, lwa vhuraru, Yesu u a ṱuwa, kha tshikhala tshine tombo ḽi tshi poswa ḽa swika, nahone a gwadama nga magona, nga mukosi muhulu na miṱodzi, a rabela a ri: “Khotsi-anga, arali U tshi funa, ṱusa tshinwelo itshi kha nṋe.” Yesu u pfa vhuṱungu vhuhulwane nga ṅwambo wa samba ḽine lufu lwawe sa ḽivemu lwa ḓo ḽi ḓisa kha dzina ḽa Khotsi awe. Ee, u vhonwa mulandu sa musemi​—ane a sema Mudzimu​—ndi zwi sa konḓeleleiho lungafhani!

Naho zwo ralo, Yesu u bvela phanḓa u rabela: “Hu si vhe u ita zwi funwaho nga nṋe; itá zwi funwaho nga iwe.” Yesu nga u fulufhedzea u ṋekedza lufuno lwawe kha lufuno lwa Mudzimu. Kha hezwi, muruṅwa a vhonala a tshi bva ṱaḓulu nahone a mu khwaṱhisa nga maṅwe maipfi a ṱuṱuwedzaho. Zwi vhonala uri muruṅwa u vhudza Yesu uri Khotsi awe u a mu takalela.

Naho zwo ralo, ndi muhwalo muhulwane lungafhani u re mahaḓani a Yesu! Vhutshilo ha ene muṋe ha lini na lini na ha vhathu vhoṱhe ho vha vhu khomboni. Mutsiko wa maḓipfele ndi muhulwane. Ngauralo Yesu u bvela phanḓa a tshi futelela vhukuma u rabela, nahone biko ḽawe ḽi vho nga marotha a malofha musi ḽi tshi rothela fhasi. The Journal of the American Medical Association, i ṱhogomela uri “naho hezwi zwi sa anzeli u itea, biko ḽa malofha . . . ḽi nga bvelela kha vhuimo ha maḓipfele o tsikeledzea vhukuma.”

Nga murahu, Yesu u vhuyelela lwa vhuraru kha vhaapostola vhawe, nahone a dovha a vha wana vho eḓela. Vho netiswa nga vhuṱungu vhuhulu. U a huwelela: “Naa ni kha ḓi vha nó eḓela nó awela? Litshani u ralo; tshikhathi tsho swika. Vhonani, Murwa-muthu u yo kumedzwa zwanḓani zwa vhaita-zwivhi. Takuwani, nḓarieni, vhonani, o ṋyambululaho o swika.”

Musi a kha ḓi amba, Yudasi Iskariote u a swika, a tshi fheletshedzwa nga gogo ḽihulu ḽo hwalaho mbone na maḓenzhe na mafumo. Mateo 26:30, 36-47; 16:21-23; Marko 14:26, 32-43; Luka 22:39-47; Yohane 18:1-3; Vha-Heberu 5:7.

▪ Musi vho no bva nḓuni ya nṱha, Yesu u isa vhaapostola ngafhi, nahone u ita mini henefho?

▪ Musi Yesu a tshi khou rabela, vhaapostola vha khou ita mini?

▪ Ndi ngani Yesu e vhuṱunguni, nahone u humbela Mudzimu mini?

▪ Ndi mini zwine zwa sumbedzwa nga biko ḽa Yesu musi ḽi tshi nga marotha a malofha?