Ndima Ya 90

Fulufhelo ḽa Mvuwo ya Vhafu

YESU mafheleloni u swika nnḓa ha muḓi wa Bethania, muḓi une wa vha khilomithara dzine dza nga vha tharu u bva Yerusalema. A tou vha maḓuvha a si gathi u bva tshee Lazaro a fa na u vhulungiwa. Dzikhaladzi dzawe Maria na Martha vha kha ḓi lila, nahone vhathu vhanzhi vho ḓa hayani havho u vha khuthadza.

Musi vha tshi khou lila, muṅwe muthu u ḓivhadza Martha uri Yesu u nḓilani. Nga zwenezwo u a ṱuwa nahone u ṱavhanya u itela u mu ṱanganedza, zwi vhonala uri ho ngo vhudza murathu wawe. A tshi ḓa ha Yesu, Martha u dovholola zwe ene na murathu wawe vha vha vho zwi amba lunzhi-lunzhi vhukatini ha maḓuvha maṋa o fhiraho: “Arali wó vha U fhano, ndi misi khaladzi yanga á so ngo fa.”

Naho zwo ralo, Martha u sumbedza fulufhelo, a tshi sumbedza uri Yesu a nga kha ḓi itela khaladzi awe tshiṅwe tshithu. U ri: “Ndi a zwi ḓivha zwauri zwine wa humbela Mudzimu, Mudzimu u ḓo U ṋea.”

Yesu u a fulufhedzisa: “Khaladzi yau u ḓo vuwa.”

Martha u pfesesa Yesu uri u khou amba nga ha u vuswa ha vhafu ha kha ḽifhasi ha tshifhinga tshi ḓaho, he Abrahamu na vhaṅwe vhashumeli vha Mudzimu vha hu lindela-vho. Ngauralo u a fhindula: “Ndi a zwi ḓivha zwauri u ḓo vuwa musi vhafu vha tshi vuwa nga ḓuvha ḽa vhufhelo.”

Naho zwo ralo, Yesu u ṋekedza fulufhelo u itela u mu rudza mbilu nga u ṱavhanya, a tshi fhindula: “U vuwa na vhutshilo ndi nṋe.” U humbudza Martha uri Mudzimu o mu ṋea maanḓa a u kunda lufu, nga uri: “A ntendaho u ḓo tshila naho a tshi fa. Huno a tshilaho a tshi ntenda, ha nga fi na lini na lini.”

Yesu ha khou vhudza Martha uri vha fulufhedzeaho nga tshenetsho tshifhinga a vha nga ḓo fa. Hai, fhedzi mbuno ine a khou i ita ndi ya uri u tenda khae hu nga isa vhutshiloni vhu sa fheli. Honoho vhutshilo vhu ḓo takalelwa nga vhathu vhanzhi musi vha tshi vuswa vhafuni nga ḓuvha ḽa u fhedza. Fhedzi vhaṅwe vha fulufhedzeaho vha ḓo ponyoka vhufhelo ha haya maitele a zwithu a kha ḽifhasi, nahone kha vhenevha maipfi a Yesu a ḓo vha a ngoho nga ho livhaho vhukuma. A vha tsha ḓo fa na kathihi! Nga murahu ha haya mafhungo a swayeaho, Yesu u vhudzisa Martha, “Enea mafhungo U a a tenda naa?”

U a fhindula: “Murena, Iina; ndi a tenda zwauri ndi iwe Kristo Murwa wa Mudzimu o ḓaho shangoni.”

Zwenezwo Martha u humela murahu nga u ṱavhanya u yo vhidza murathu wawe, u mu vhidzela nga thungo: “Mufunzi o ḓa, u khou U vhidza.” Nga u ṱavhanya Maria u a bva nḓuni. Musi vhaṅwe vha tshi mu vhona a tshi ṱuwa, vha mu tevhela, vha tshi humbula uri u khou ya tshaloni.

A tshi ḓa ha Yesu, Maria u wela milenzheni yawe a tshi khou lila. U ri: “Murena, arali wó vha U fhano, ndi misi khaladzi yanga á so ngo fa.” Yesu u kwamea vhukuma musi a tshi vhona Maria na magogo a vhathu vhane vha khou mu tevhela vha tshi khou lila. U a vhudzisa: “No mu vhea ngafhi?”

Vha a fhindula: “Murena, iḓá U vhone.”

Yesu na ene u a lila, a tshi ita uri Vhayuda vha ri: “Vhonani, o vha a tshi mu funa hani!”

Vhaṅwe vha a elelwa uri Yesu, tshifhingani tsha Vhuṱambo ha Mishasha miṅwedzi i si gathi yo fhiraho, o fhodza muṱhannga we a bebwa e bofu, nahone vha a vhudzisa: “Naa o konaho u bonyolosa maṱo a bofu, ha ngo kona u thivhela uri muthu uyu a si fe?” Yohane 5:21; 6:40; 9:1-7; 11:17-37.

▪ Mafheleloni Yesu u swika lini tsini na Bethania, nahone hu na vhuimo vhufhio henefho?

▪ Ndi mutheo ufhio une Martha a vha nawo wa u tenda kha u vuwa ha vhafu?

▪ Yesu u kwamea hani nga lufu lwa Lazaro?