Ndima Ya 129

Huṅwe U Ḓivhonadza

VHAFUNZIWA vha tshee vho ṱungufhala. A vha pfesesi uri ndi ngani vhiḓa ḽi si na tshithu, kana u tenda mivhigo ya vhafumakadzi. Ngauralo nga murahu nga Swondaha, Kleopa na muṅwe mufunziwa vha ṱutshela Yerusalema vha ya Emausi, hune ha nga ṱoḓa u vha vhukule ha khilomithara dza 11.

Vhe nḓilani, musi vha tshi khou haseledza zwiitea zwa ḽeneḽo ḓuvha, muṅwe mutsinda u a tshimbila navho. U a vhudzisa: “Naa ndi maipfi-ḓe aya, ané na fhindulana ni tshi khou tshimbila.”

Vhafunziwa vha a ima, zwifhaṱuwo zwavho zwo ṱungufhala, nahone Kleopa u a fhindula: “Ndi’we mueni U woṱhe kani wa Yerusalema, ané a si ḓivhe zwo vhaho hone henefho maḓuvha ano?” U a vhudzisa: “Zwifhio?”

Vha a fhindula: “Zwa Yesu wa Nazareta. . . . Zwauri vho-tshifhé vhahulwane na vhavhusi vho mu ṋekedza khaṱhuloni ya u mu vhulaha, vha mu vhamba . . . Á vha riṋe ro vha ro fulufhela uri ndi ene we a pfi u ḓo ḓa u rengulula Isiraele.”

Kleopa na khonani yawe vha ṱalutshedza zwiitea zwi mangadzaho zwa ḽeneḽo ḓuvha​—muvhigo wa zwo vhonwaho zwi mangadzaho zwa vharuṅwa na vhiḓa ḽi si na tshithu—​fhedzi zwenezwo vha amba uri vho tshuswa nga hezwi zwithu malugana na zwine zwa amba zwone. Onoyo mutsinda u a vha sola: “Yawee, inwi matsilu, vhadzia-mbilu dza dzithotho, ni sá tendi zwoṱhe zwe vhaporofita vha amba! Naa maṱhupho enea Kristo ha ngo pfi u ḓo a vhona naa, a kona u dzhena lupenyoni lwawe?” Zwenezwo a vha ṱalutshedza zwe zwa ambiwa maṅwaloni makhethwa nga ha Kristo.

Mafheleloni vha swika tsini na Emausi, nahone onoyo mutsinda a ḓiita u nga u khou fhira. Vha tshi ṱoḓa u pfa zwo engedzeaho, vhafunziwa vha a khadeledza: “Dzula na riṋe, ngauri hu vhó nga madekwana, ḓuvha ḽo no ḓi kovhela.” Ngauralo u a dzula a ḽa navho. Musi a tshi rabela nahone a tshi ṅwata tshinnkwa a tshi vha ṋekedza, vha a ṱhogomela uri vhukuma ndi Yesu e muvhilini wa ṋama. Fhedzi zwenezwo a ngalangala.

Zwino vha a pfesesa uri ndi ngani onoyo mutsinda o vha a tshi ḓivha zwinzhi nga u ralo! Vha a vhudzisa: “Nandi, mbilu dzashu dzo vha dzi si khou swa naa ngomu hashu, musi a tshi amba na riṋe rí nḓilani, musi a tshi ri vulela maṅwalo?” Nga u ṱavhanya, vha vhuyelela Yerusalema, he vha wana vhaapostola na vhe vha vha vho kuvhangana navho. Musi Kleopa na khonani yawe vha sa athu u amba tshithu, vhaṅwe vha ḓivhadza nga dakalo vha ri: “Nangoho Murena o vuwa, o vhonwa nga Simoni.” Zwenezwo vhenevho vhavhili vha anetshela nḓila ye Yesu a vhonala ngayo khavho. Holu ndi lwa vhuṋa ḓuvhani ḽeneḽo he a vhonala kha vhafunziwa vhawe vho fhamba-fhambanaho.

Nga khathihi fhedzi Yesu u vhonala lwa vhuṱanu. Naho miṋango yo hoṋwa ngauri vhafunziwa vha khou ofha Vhayuda, u a dzhena, o ima vhukati havho, nahone u ri: “Mulalo na inwi.” Vha a tshuwa, vha tshi humbula uri vha khou vhona tshirunzi. Ngauralo, a tshi ṱalutshedza uri a si tshirunzi, Yesu u ri: “Ni tshenuwa’ni? Mihumbulo iyo i dzhenela’ni dzimbiluni dzaṋu? Vhonani zwanḓa zwanga na milenzhe yanga, ni ḓivhe zwauri ndi nṋe. Mpfareni ni vhone, ngauri tshirunzi a tshi na dziṋama na marambo, zwiné na vhona ndí nazwo’.” Naho zwo ralo, vha a timatima u tenda.

U itela u vha thusa uri vha tende zwa vhukuma uri ndi Yesu, u a vhudzisa: “Ni na zwiḽiwanyana fhano?” Musi o no ṱanganedza tshipiḓa tsha khovhe yo gotshiwaho nahone a i ḽa, u ri: “Ndi one mafhungo e nda amba na’nwi zwiḽa ndí kha ḓi vha na inwi [phanḓa ha lufu lwanga]; ngauri zwo fanela u khunyelela zwoṱhe zwo ṅwalwaho zwi tshi amba nṋe mulayoni wa Mushe na kha vhaporofita na kha Dzipsalme.”

Zwi re zwone ndi uri a tshi khou isa phanḓa zwine zwa vho nga o no vha na pfunzo ya Bivhili navho, Yesu u a funza: “Maṅwalo o zwi amba zwauri Kristo u ḓo shengedzwa, a vuwa vhafuni nga ḓuvha ḽa vhuraru; na uri kha tshakha dzoṱhe hu ḓo ḓivhadzwa dzinani ḽawe u rembuluwa na u hangwelwa zwivhi, ha thomiwa nga Yerusalema. Inwi ni dziṱhanzi dza mafhungo aya.”

Nga tshiṅwe tshiitisi Thoma haho muṱanganoni hoyu wa ndeme wa nga madekwana a Swondaha. Ngauralo vhukatini ha maḓuvha e a tevhela, vhaṅwe vha mu vhudza nga dakalo vha ri: “Ro vhona Murena.”

Thoma u a hanedza: “Ndá sa vhona ntho ya mbambo zwanḓani zwawe, nda longa munwe wanga fhaḽa he ha vha hu na mbambo, nda longa tshanḓa tshanga lurumbuni lwawe, ndi nga si vhuye nda tenda.”

Ee, nga murahu ha maḓuvha a malo vhafunziwa vha a dovha vha ṱangana ngomu nḓuni. Zwino Thoma u navho. Naho miṋango yo hoṋiwa, Yesu u dovha a ima vhukati havho nahone a ri: “Mulalo kha inwi!” Zwenezwo, a tshi amba na Thoma, u a mu humbela: “Ḓisa munwe wau ngeno U vhone zwanḓa zwanga; ḓisa tshanḓa tshau U longe lurumbuni lwanga. U songo vha a sa tendiho.”

Thoma u a huwelela: “Murena wanga! Mudzimu wanga!”

Yesu u a vhudzisa: “Wó no mbona U vhó tenda. Vha na mashudu vhané naho vhá so ngo vhona, vha ḓi tenda.” Luka 24:11, 13-48; Yohane 20:19-29.

▪ Ndi zwifhio zwine mutsinda a ṱoḓa u zwi ḓivha kha vhafunziwa vhavhili vhane vha khou ya Emausi?

▪ Ndi mini zwine mutsinda a zwi amba zwine zwa ita uri dzimbilu dza vhafunziwa dzi fhisee?

▪ Vhafunziwa vha zwi limuha hani uri onoyo mutsinda ndi nnyi?

▪ Musi Kleopa na khonani yawe vha tshi vhuyelela Yerusalema, ndi ufhio muvhigo u takadzaho une vha u pfa?

▪ Ndi u vhonala hufhio ha vhuṱanu hune Yesu a hu ita kha vhafunziwa vhawe, nahone hu itea mini vhukatini haho?

▪ Hu itea mini nga murahu ha maḓuvha a malo musi Yesu o no vhonala lwa vhuṱanu, nahone mafheleloni Thoma u fushea hani uri Yesu u khou tshila?